Read cisena Aroma 2 Bible Online

Aroma 2 - cisena bible

Aroma 2

¹Na tenepo, iwe unatonga andzako nkhabe pakutunira. Thangwi usakoneseka wekha pa pire pinatonga iwe, thangwi iwe unatonga, usacita pibodzi-bodzi.

²Ife tisadziwa kuti kutonga kwa Mulungu kuna ale anacita pinthu penepi, nkhwa ndimo mwene.

³Na tenepo, ngakhala iwe munthu pyako, usaakonesa andzako iwe mbucita pibodzi-bodzi, usanyerezera kuti unakwanisa kuthawa ntsiku ya kutongwa na Mulungu?

⁴Peno nkhulongera kuti iwe usapwaza udidi ukulu wa Mulungu, kuphata ntima kwace, na kupirira kwace, mbukhonda dzindikira kuti udidi wa Mulungu ndiwo unakukwata kuti iwe uchunyuke kudawa kwako?

⁵Mbwenye na thangwi ya upoka wako na kuuma kwako ntima, usanjipisa kuipirwa kwa Mulungu kuna iwe wekha ene, pa ntsiku eneyi ya kuipirwa kwa Mulungu angadza kapangisa kutonga kwace kwakulungama.

⁶Mulungu anabwezera m'bodzi na m'bodzi, na pire pidacita iye.

⁷Iye anadza kapasa upulumuki wakukhonda kumala kuna ale anakakamira kucita udidi, anasaka mbiri, anasaka cilemedzo na kukhala m'maso kwenda na kwenda.

⁸Mbwenye kunadza kaoneka kuipirwa na kusirizwa kwa Mulungu kuna ale anyaumbirimi, anakhonda kubvera pya ndimo mwene mbatowera pyakuipa.

⁹Nyatwa na kutsukwala kukulu kunadza kaoneka kuna anthu onsene anacita kuipa. Kutomera kuna madjuda, mpaka kuna agerego.[4]

¹⁰Mbwenye mbiri, na kulemebza, na ntendere pinadza kaoneka kuna onsene anacita udidi. Kutomera kuna madjuda, mpaka kuna agerego.

¹¹Thangwi kuna Mulungu nkhabeko tsankhulo.

¹²Onsene anadawa mbasowa mwambo, na kusowa kwawo Mwambo, anafambo. Mbwenye onsene anadawa mbadziwa Mwambo, anatongwa na Mwambo.

¹³Thangwi anyakulungama pamaso pa Mulungu si ale anabva mwambo tayu, mbwenye ale anautoweza, ndiwo anafuna kucemerwa anyakulungama.

¹⁴Ndimo mwene, ngakhala ale adakhonda kukhala madjuda adasoweka mwambo, asacita na manyerezero a munsolo mwawo pire pinatongwa na mwambo iwo mbasowa mwambo, penepi pyene ndiwo mwambo wawo.

¹⁵Iwo asapangisa na macitiro awo kuti, pinatongwa na mwambo pyalembwa muntima mwawo. Manyerezero awo a muntima asaapangisa kuti penepi ndimo mwene, pontho ndzeru zawo zinacita panango mbaziakonesa, panango mbaziabvunulira, zisapangisambo penepi.

¹⁶Pyonsene ipi pinati pioneke pa ntsiku inafuna tonga Mulungu pinthu pyakubisala pya anthu, kubulukira muna Mwana wace Kirixtu Yezu, ninga Mphangwa Zadidi zinalonga ine.

¹⁷Apo iwe unalonga kuti “ndine n'djuda,” mbuphatirira mwambo pontho mbugaya na Mulungu,

¹⁸iwe unadziwa kufuna kwa Mulungu pontho usadziwa kusankhula cadidi ndi cipi, thangwi mwambo usakupfundzisa,

¹⁹pontho iwe usanyinda kuti ndiwe anaphata nsenzi maboli-boli, ninga cieza ca ale ali n'cidima,

²⁰nyakulanga anthu akusoweka ndzeru, mpfundzisi wa ana ang'ono, thangwi usanyindira kuti mu mwambo, unako kudziwa kwakukwana na undimo mwene.

²¹Kodi iwe unapfundzisa andzako, watani khonda pfundzisika wekha ene? Iwe usalonga lekani kuba, usaba?

²²Iwe usakhondesa upombo, usapomba? Iwe anaipirwa na alungu apezi, usaabera pinthu pya n'nyumba zawo za ntsembe?

²³Iwe unagaya na mwambo, usapwaza Mulungu na kukhonda kubvera mwambo?

²⁴Thangwi ninga mudalembwa ipyo m'Bukhu ya Mulungu kuti: “Na thangwi yanu, dzina ya Mulungu isaxoliwa pakati pa anthu adakhonda kukhala madjuda.”

²⁵Kusibza ndi kwadidi, ungakoya mwambo. Mbwenye iwe ungakhonda kukoya mwambo, kusibza kwako ndi kwapezi.

²⁶Ngakhala ale adakhonda kusibza asakoya pinalonga mwambo, Mulungu nkhabe kuaona ninga asibza?

²⁷Na tenepo, ule adacita cipo adzati kusibza mbwenye asakoya Mwambo, anadza kakonesa iwe una Mwambo wakulembwa na udasibza, thangwi wakhonda kutoweza mwambo.

²⁸Thangwi kukhala n'djuda si kupangizika manungo basi tayu, pontho kusibza si kule kwa manungo basi tayu.

²⁹Nkhabe! Cinacitisa munthu n'djuda ndi cire ciri n'kati, pontho kusibza kwa munthu kuli muntima. Penepi pisabulukira mu Nzimu, nkhabe bulukira mu Mwambo wakulembwa. Munthu unowu nkhabe simbwa na anthu tayu, mbwenye asasimbwa na Mulungu.