Read cisena Aroma 5 Bible Online

Aroma 5 - cisena bible

Aroma 5

¹Mphapo pa kulungamiswa kudacitwa ife na cikhulupiro, tina ntendere na Mulungu, na thangwi ya Mbuya wathu Yezu Kirixtu,

²adakwanisa kutipitisa mwa kukoma ntima uku kwa Mulungu na thangwi ya cikhulupiro, mudakhala ife cincino dzololo, pontho mbatitsandzaya na kudikhira mbiri ya Mulungu.

³Si penepi basi tayu. Ife tisatsandzayambo pa nyatwa, thangwi tisadziwa kuti nyatwa isabala kupirira,

⁴kupirira kusabala uunthu wakufunika, uunthu wakufunika usabala kudikhira.

⁵Cidikhiro nkhabe kutinyengeza, thangwi Mulungu atikhutulira m'mitima mwathu kutifuna kudaticita Iye, kubulukira mu Nzimu Wakucena udatipasa Iye.

⁶Thangwi mukhasowa ife mphambvu, mudakwana iwo n'dzidzi wace, Kirixtu afera anyakudawa.

⁷Pisanentsa pikulu kakamwe gumanika munthu anafera munthu ndzace wakulungama. Ande, panango asagumanika munthu anafuna kufera munthu wadidi.

⁸Mbwenye Mulungu asapangisa kufuna kudaticita Iye, pa kutifera kudacita Kirixtu, ife mbatiri anyakudawa.

⁹Ninga cincino talungamiswa na ciropa ca Kirixtu, ndimo mwenedi kuti na Iye, tinapulumuswa n'kati mwa kuipirwa kwa Mulungu!

¹⁰Thangwi ngakhala pa n'dzidzi ukhakhala ife anyamalwa a Mulungu, tadza kasekesana na Iye na thangwi ya kufa kwa Mwana wace, ndiye tani cincino, pakumala kusekesana kwathu na Mulungu, tinati tipulumuswedi na upulumuki wa Kirixtu.

¹¹Si penepi basi tayu, mbwenye tisatsandzayambo muna Mulungu na thangwi ya Mbuya wathu Yezu Kirixtu, ule adaticitisa kuti cincino tisekesane na Mulungu.

¹²Na tenepo, ninga kudawa kwapita pantsi pano na mamuna m'bodzi basi, kudawa kweneku mbukubala kufa, tenepambo kufa kwapita kuli anthu onsene, thangwi onsene adawa.

¹³Thangwi anthu mbadzati kupaswa Mwambo, kudawa kukhalipo kale pantsi pano. Mbwenye kudawa kwakhonda kutsalakanwa, na kusoweka kwa mwambo.

¹⁴Mbwenye kufa kukhatonga kuna anthu onsene, kutomera midzidzi ya Adhamu mpaka ya Mozesi, na kuna ale ene adakhonda kucita kudawa kwakulandana na kukhonda kubvera kwa Adhamu. Adhamu unowu akhali cithundzi-thundzi ca ule akhafuna kudza.

¹⁵Mbwenye muwoni udatipasa Mulungu pezi pyene, wasyana na kudawa kwa Adhamu. Thangwi ngakhala azinji asafa na thangwi ya kudodomeka kwa m'bodzi basi, ndiye tani kukoma ntima kwa Mulungu, ndi kukulu kakamwe. Pontho muwoni wa kukoma ntima kwa mamuna m'bodzi Yezu Kirixtu, wadzala na kutaikira kuna azinji.

¹⁶Muwoni wa Mulungu si sawa-sawa na nyatwa zidadzeswa na kudawa kwa mamuna m'bodzi basi tayu. Thangwi na kudawa kwa munthu m'bodzi, kwabwera kutongwa kudadzesa kukoneswa. Mbwenye kukoma ntima kwa Mulungu kwakunda kudawa kwa anthu azinji, mbukudzesa kulungama.

¹⁷Ngakhala na kudawa kwa munthu m'bodzi basi, kufa kwatoma kutonga na thangwi yace, ndiye tani ale adatambira kuna Mulungu kukoma ntima kwace kukulu kakamwe na muwoni wakulungama? Iwo anati atonge mu upulumuki upsa na mphambvu za munthu m'bodzi basi, Yezu Kirixtu.

¹⁸Na tenepo, ninga kudawa kabodzi basi kwacita kuti anthu onsene akoneswe, tenepambo na cibodzi basi cakulungama, cacita kuti kukoma ntima kwa Mulungu kubwere kuna anthu onsene.

¹⁹Na tenepo, ninga kukhonda kubvera kwa mamuna m'bodzi basi azinji acitwa kuti akhale anyakudawa, sawa-sawambo na thangwi ya kubvera kwa munthu m'bodzi basi, azinji anadza kakhala akulungama.

²⁰Mwambo wabwera toera kudodomeka kuinjipe. Mbwenye panainjipa kudawa, kukoma ntima kwa Mulungu kusadzaleratu kakamwe mbakutaikira,

²¹ninga kudawa kwakunda mbukubweresa kufa, tenepambo kukoma ntima kwa Mulungu kukundembo na thangwi yakulungama, toera kupasa upulumuki wakukhonda kumala muna Yezu Kirixtu Mbuya wathu.