Read cisena Aroma 7 Bible Online

Aroma 7 - cisena bible

Aroma 7

¹Abale anga, ndisalonga na imwe ninga anthu akudziwa mwambo. Kodi imwe nkhabe dziwa kuti mwambo una mphambvu kuna munthu pa n'dzidzi onsene unakhala iye m'maso?

²Ndi ninga tenepa: Pa mwambo, nkazi wa pa banja asatongwa kuti akhale pabodzi na mamuna wace mbali m'maso. Mbwenye mamuna angafa, iye asudzuka pa mwambo wa pa banja.

³Na thangwi eneyo, iye angagumana na mamuna unango mbacita na iye banja mamuna wace mbali m'maso, asalongwa kuti asacita upombo. Mbwenye mamuna wace angafa, iye asudzuka pa mwambo. Na tenepo, angasembwa na mamuna unango, nkhabe anafuna kumulonga kuti ali kucita upombo.

⁴Tenepa, abale anga, imwe mwafambo pa Mwambo, pa thangwi ya manungo a Kirixtu, toera mukhale wa mamuna unango, ule adalamuka pa kufa, kuti tibale misapu kuna Mulungu.

⁵Thangwi pikhatongwa ife na nyama, kusirira kuipa kukhaphata basa m'manungo mwathu kwalamusirwa na mwambo, mbatikhabala misapu ikhatiyendesa kwa kufa.

⁶Mbwenye cincino, na kufa pa pire pikhatimanga kale, tasudzuka pa Mwambo toera tiphate basa na makhaliro mapsa a Nzimu Wakucena, mbatikhonda kutoweza makhaliro akale a Mwambo wakulembwa.

⁷Tinalonganji mphapo? Kuti Mwambo ndi kudawa? Nkhabe citika! Ndimo mwene, mwambo mbudakhonda kundipangisa kudawa, ine mbidacimwana dziwa kudawa. Thangwi mwambo mbudakhonda kulonga kuti: “Leka sirira.” Kusirira ine mbidakudziwa tayu.

⁸Mbwenye kudawa, na kuona njira idapangizwa iye na mitemo, kwabala kusirira konsene kwa kusiyana-siyana n'kati mwanga. Thangwi ungasoweka Mwambo, kudawa kwafa.

⁹Kale ene ine sikhali na Mwambo tayu. Mbwenye mudabwera ntemo, kudawa kwalamuka pontho, ine mbandifa.

¹⁰Iwo ene ntemo ukhafuna kudzesa upulumuki, wandidzesera kufa.

¹¹Thangwi kudawa, na kuona njira idapangizwa iye na ntemo unowu, kwandinyengerera, kwandipha.

¹²Ndimo mwene, Mwambo ndi wakucena, pontho mitemo ndi yakucena, yakulungama na yadidi.

¹³Na tenepo, cadidi candidzesera kufa? Nkhabe citika! Mbwenye toera kudawa kupangizike kuti ndi kudawa, kwandisosera kufa kubulukira pa udidi. Na tenepo, na thangwi ya mitemo, kudawa kwapangizikeratu kudawa kwace.

¹⁴Thangwi tisadziwa kuti Mwambo ndi wa nzimu, mbwenye ine ndine wa nyama, ndaguliswa kuna kudawa ninga n'dzakazi wa madawi.

¹⁵Ine nkhabe kupidziwa pinacita ine. Thangwi siri kucita pinafuna ine tayu, mbwenye ndiri kucita pire pinazonda ine.

¹⁶Mphapo ngakhala ndisacita pire pinakhonda funa ine, ndisatawirira kuti mwambo ndi wadidi.

¹⁷Na tenepo, sinebve anapicita tayu, mbwenye ndi kudawa kuli muna ine.

¹⁸Ndisadziwa kuti muna ine, peno tilonge kuti, m'manungo mwanga,[9] nkhabemo udidi. Thangwi ine ndisafuna kucita udidi, mbwenye ndisacimwana kuucita.

¹⁹Thangwi pinacita ine si udidi unafuna ine tayu, mbwenye kuipa kunakhonda ine, ndiko kunacita ine.

²⁰Mphapo ngakhala ndisacita pinakhonda funa ine, anapicita sinebve tayu, mbwenye ndi kudawa kuli muna ine.

²¹Na tenepo, ndisagumana n'kati mwanga mwambo uxu: Ndingafuna cita udidi, kudawa kuli pabodzi na ine.

²²Thangwi n'kati mwanga ndisafuna Mwambo wa Mulungu,

²³mbwenye ndisaona mwambo unango mbuphata basa m'manungo mwanga, mbugwa nkhondo na mwambo wa ndzeru zanga, mbundicita n'dzakazi wa mwambo wa kudawa kunaphata basa m'mapindi a manungo anga.

²⁴Munthu wakucherenga ninga ine! Mbani anafuna kundiombola pa manungo awa a kufa?

²⁵Ndisapereka takhuta kuna Mulungu na thangwi ya Yezu Kirixtu Mbuya wathu. Na tenepo, ine ndekha mu ndzeru zanga, ndine n'dzakazi wa Mwambo wa Mulungu. Mbwenye pa nyama, ine ndine n'dzakazi wa mwambo wa kudawa.