Read cisena 1 Akorintu 1 Bible Online

1 Akorintu 1 - cisena bible

1 Akorintu 1

¹Ine Paulu, adacemerwa na kufuna kwa Mulungu kuti ndikhale mpoxtolo wa Kirixtu[1] Yezu, ndiri pabodzi na m'bale wathu Soxiteni.

²Ndisalembera abale a gereja ya Mulungu iri ku nzinda wa Korintu, kuna iwo adaceneswa muna Kirixtu Yezu, mbacemerwa kuti akhale mbumba ya Mulungu, pabodzi na onsene ale anacemera m'makhundu onsene dzina ya Mbuya Yezu Kirixtu, Mbuya wawo na wathu.

³Kukoma ntima na ntendere unabulukira kuna Mulungu Baba wathu, na kuna Mbuya Yezu Kirixtu, mbipikhale na imwe.

⁴Kazinji kene ndisapereka takhuta kuna Mulungu wanga pa thangwi yanu, na thangwi ya kukoma ntima kwace kudakupasani Iye muna Kirixtu Yezu.

⁵Thangwi muna Iye imwe mwapfumiswa pa pyonsene, pa fala yonsene na pa kudziwa konsene,

⁶thangwi umboni wa Kirixtu wasimbisiswa muna imwe,

⁷toera mukhonde kusowa muwoni ubodzi wa mu Nzimu, pa n'dzidzi unadikhira imwe kupangizika kwa Mbuya wathu Yezu Kirixtu.

⁸Pontho Iye anadza kakupasani phinga mpaka pakumalisa, kuti mukhonde kukhala anthu akusandikwa pa ntsiku ya kubwera kwa Mbuya wathu Yezu Kirixtu.

⁹Mulungu, adakucemerani kuti muphatane na Mwana wace Yezu Kirixtu, Mbuya wathu, ndi wakunyindirika.

¹⁰Abale anga, ndisakuphembani pikulu kakamwe na dzina ya Mbuya wathu Yezu Kirixtu, kuti monsene mulonge cinthu cibodzicene, toera pakhonde kuoneka phambulo pakati panu, mbwenye muphatane pa manyerezero anu, na ndzeru zibodzi zene.

¹¹Abale anga, anthu anango a pa nyumba ya Kolowe, andipanga kuti pakati panu imwe nkhabe kubverana.

¹²Ndisalonga thangwi m'bodzi na m'bodzi wanu asalonga kuti: “Ine ndine wa Paulu,” unango, “Ine ndine wa Apolo,” peno “Ine ndine wa Pedhru.[2]” Pontho anango asalonga kuti: “Ine ndine wa Kirixtu.”

¹³Kodi Kirixtu agawika? Nkhulongera kuti Paulu akhomerwa pa ntanda na thangwi yanu? Mwatambira batixmu na dzina ya Paulu?

¹⁴Ndisapereka takhuta kuna Mulungu, thangwi nkhabe m'bodzi wanu adatambirisa ine batixmu. Adatambirisa ine batixmu ndi Kirixpu na Gayo basi,

¹⁵na tenepo nkhabe munthu anafuna kulonga kuti atambira batixmu na dzina yanga.

¹⁶Pontho ndatambirisambo batixmu mudzi wa Xitefana. Ndiwo basi anakumbukira ine kuti ndaatambirisa batixmu, nkhabebve anango anakumbukira ine.

¹⁷Thangwi Kirixtu hadandituma kwenda katambirisa batixmu tayu, mbwenye andituma kwenda kamwaza Mphangwa Zadidi. Si na mafala a udziwisi wa anthu tayu, toera ntanda wa Kirixtu ukhonde kupwazwa.

¹⁸Thangwi mphangwa za ntanda wa Kirixtu, ndi udzemwa kuna ale anataika, mbwenye kuna ife anapulumuswa, ndi mphambvu za Mulungu.

¹⁹Thangwi pyalembwa kuti: “Ndinafudza udziwisi wa anyakudziwisa, mbandimalisa ndzeru za anyandzeru.”

²⁰Ali kupi nyandzeru? Ali kupi nyakudziwisa mwambo? Ali kupi nyakubvundzisa wa midzidzi ino? Kodi udziwisi wa dziko ino, Mulungu hadaucita udzemwa tayu?

²¹Thangwi Mulungu, na udziwisi wace, hadasiya kuti anthu an'dziwe na udziwisi wawo tayu, mbakomerwa kupulumusa ale anatawira, kubulukira pa mphangwa zinacemera iwo za udzemwa.

²²Madjuda asaphemba pidzindikiro pya pirengo, agerego[3] asasaka udziwisi,

²³mbwenye ife tisamwaza mphangwa za Kirixtu adakhomerwa pa ntanda. Kirixtu unowu, kuna madjuda nkhuxola, pontho kuna ale adakhonda kukhala madjuda ndi udzemwa.

²⁴Mbwenye kuna ale adacemerwa, madjuda na agerego ene, Kirixtu ndi mphambvu za Mulungu na udziwisi wa Mulungu.

²⁵Thangwi cire cinaoneka ninga ndi udzemwa wa Mulungu, ndi udziwisi ukulu kakamwe kupiringana udziwisi wa anthu, pontho cire cinaoneka ninga ndi kupolola kwa Mulungu, ndi kuwanga kukulu kakamwe kupiringana kuwanga kwa anthu.

²⁶Abale anga, lang'anani kucemerwa kudacitwa imwe na Mulungu. Mukhali pang'ono anyakudziwisa pamaso pa anthu, pang'ono anyamphambvu, pontho pang'ono adabalwa na anthu a mbiri.

²⁷Mbwenye Mulungu asankhula pire pya udzemwa pikhanyerezera anthu, toera kupasa manyadzo anyakudziwisa, pontho asankhula pire pinaona anthu kuti ndi pyakusowa mphambvu, toera kupasa manyadzo anyamphambvu.

²⁸Iye asankhula pinthu pyakucepeseka pa dziko, pyakupwazika, na pyakusowa basa, kuti afudze pire pinabasa,

²⁹toera asoweke munthu wa kugaya patsogolo pana Mulungu.

³⁰Mbwenye ndi thangwi yace idacita kuti imwe mukhale muna Kirixtu Yezu, unowu adadza kakhala udziwisi wa Mulungu kuna ife, ulungami, kuperekeka kuna Mulungu na kuombolwa,

³¹ninga mudalemberwa ipyo kuti: “Ule anagaya, mbagaye muna Mbuya.”