Read cisena 1 Akorintu 10 Bible Online

1 Akorintu 10 - cisena bible

1 Akorintu 10

¹Abale anga, ine nkhabe funa kuti imwe muduwale pidacitwa na a mbuya athu kale. Iwo onsene akhakhala pantsi pa khole, pontho onsene awambuka bara.

²Pa kuphatana kwawo na Mozesi, onsene atambira batixmu mu khole na m'bara.

³Onsene adya cakudya cibodzicene ca mu nzimu.

⁴Pontho amwa cakumwa cibodzicene ca mu nzimu. Thangwi akhamwa madzi a pa mwala wa mu nzimu, ukhaaperekera. Mwala unowu ukhali Kirixtu.

⁵Mbwenye Mulungu hadakomerwa na azinji awo tayu, pontho mbamala kufa n'thando.

⁶Pinthu penepi pyacitika toera kutipangisa kuti tikhonde kusirira pyakuipa ninga iwo.

⁷Lekani kulambira alungu apezi, ninga pidacita anango awo, ninga mudalemberwa ipyo kuti: “Mbumba yakhala pantsi toera kudya na kumwa. Pakumala yalamuka mbibvina.”

⁸Mbatilekeni kucita pyalukwali ninga pidacita anango awo, mbafa pikwi makumawiri na pitatu pya anthu pa ntsiku ibodzi basi.

⁹Mbatilekeni kulesera Kirixtu[12] ninga pidacita anango awo, mbamalisira kuphiwa na nyoka.

¹⁰Lekani kudungunya ninga pidacita anango awo, mbamala kuphiwa na nyakufudza.

¹¹Pinthu penepi pyacitika kuna iwo ninga cipangizo, pontho pyalembwa toera kuticenjeza ife adafika ntsiku zakumalisa.

¹²Na tenepo, ule ananyerezera kuti ali dzololo, mbacite mphole toera akhonde kugwa.

¹³Manyengerero anabva imwe, ndiwo anabvambo anthu anango. Pontho Mulungu ndi wakunyindirika. Iye nkhabe kukusiyani mbamunyengererwa kupiringana mphambvu zanu. Mbwenye mungapita mwakunyengererwa, Iye ene Mulungu anakusakirani njira ya kubuluka nayo, toera mukwanise kupirira.

¹⁴Na thangwi eneyo, imwe abale akufunika, thawani pya kulambira alungu apezi.

¹⁵Ndisalonga na anthu a ndzeru. Nyerezerani mwekha ene pire pinalonga ine.

¹⁶Kodi ndiko ya nkhombo inakuza na ife Mulungu, si kuphatana na ciropa ca Kirixtu tayu? Nkate unamenyerana ife, si kuphatana na manungo a Kirixtu tayu?

¹⁷Ife pakukhala kwathu azinji ndife manungo mabodzi basi. Thangwi ulipo n'kati ubodzi basi, pontho tonsene tisadya nkate ubodzi ene.

¹⁸Lang'anani mbumba ya Izarayeli. Ale anadya pya ntsembe, hali pabodzi tayu pa guwa ya ntsembe?

¹⁹Na tenepo, ndi ninji pinalonga ine? Kuti ntsembe inayikhirwa dzimunthu ndi pinthu? Peno dzimunthu ndi cinthu?

²⁰Nkhabe! Ine ndisalonga kuti ntsembe zinaikhirwa madzimunthu, hasazipereka kuna Mulungu tayu, mbwenye kuna mizimu ya kuipa. Pontho ine nkhabe funa kuti imwe muphatane na mizimu ya kuipa.

²¹Nkhabe kucitika kumwa ndiko ya Mbuya na ndiko ya mizimu ya kuipa. Pontho lekani kudya pa thando ya Mbuya na pa thando ya mizimu ya kuipa.

²²Kodi tinansosera nchanje Mbuya? Ife tina mphambvu za kupiringana Iye?

²³Anango asalonga tenepa: “Pyonsene pisatawiriswa,” mbwenye si pyonsene pinaphedzera tayu. “Pyonsene pisatawiriswa,” mbwenye si pyonsene pinamanga tayu.

²⁴Mbakhonde kuoneka munthu anasaka udidi wace, mbwenye mbaoneke anasaka udidi wa ndzace.

²⁵Dyaani pyonsene pinaguliswa m'misika mbamukhonda kubvundzisa, na thangwi ya manyerezero anu a muntima.

²⁶Thangwi “dziko, na pyonsene pina iyo, ndi pya Mbuya.”

²⁷Ungacemerwa kwenda kadya na nyakukhonda kutawira Yezu, ungapifuna ndoko, mbudya pyonsene pinakupasa iye, mbukhonda kubvundza cinthu, na thangwi ya manyerezero ako a muntima.

²⁸Mbwenye munthu angakupanga kuti: “Ipi pyaikhirwa ntsembe madzimunthu,” leka kudya. Na thangwi ya ule adakupanga, pontho na thangwi ya manyerezero a muntima.[13]

²⁹Siri kulongera manyerezero a muntima mwako tayu, mbwenye a munthu unango. Mphapo thangwi yanji kusudzuka kwanga kusatongwa na manyerezero a muntima a munthu unango?

³⁰Ngakhala ine ndiri kudya mbindipereka takhuta kuna Mulungu, thangwi yanji pontho ndiri kusandikwa na pire pidaperekera ine takhuta kuna Mulungu?

³¹Na tenepo, imwe mungadya, mungamwa, peno mungacita cinthu cinango, citani pyonsene toera kupasa mbiri Mulungu.

³²Lekani kugwegwedusa madjuda, peno agerego, peno abale a Gereja ya Mulungu.

³³Pontho ine ndisasaka na njira zonsene kutsandzaisa anthu onsene. Thangwi siri kusaka udidi wanga ndekha tayu, mbwenye udidi wa anthu onsene, toera iwo apulumuswe.