Read cisena 1 Akorintu 13 Bible Online

1 Akorintu 13 - cisena bible

1 Akorintu 13

¹Mbidakhala ine ndisakwanisa kulonga malongero onsene a anthu na a maanju, mbandisowa kufunana, ndinakhala ninga simbi, peno ninga ng'oma inalira.

²Mbidakhala ine ndina muwoni wakulonga ciporofeta, mbandidziwa pyakubisala pyonsene na kudziwa konsene, pontho mbandikhala na cikhulupiro cakukwanisa kuthukusa mapiri, mbandisowa kufunana, mbidakhala cinthu tayu.

³Mbidapasa anyakucherenga pyonsene pina ine, pontho mbandipereka manungo anga toera apisiwe,[15] mbandisowa kufunana, nkhabe cibodzi cikhafuna kundiphedzera.

⁴Kufunana kusabala kupirira, kufunana kusabala udidi. Nkhabe kubala bibvu, nkhabe kubala kugaya, nkhabe kubala kupikuza.

⁵Nkhabe kucitira ndzace pyakuipa, nkhabe saka kucita kufuna kwace, nkhabe cimbiza na kuipirwa, nkhabe koyera ndzace nyongo.

⁶Kufunana nkhabe kukomerwa na pyakukhonda kulungama, mbwenye asakomerwa na pya ndimo mwene.

⁷Kufunana kusaphimbira pyonsene, kusakhulupira pyonsene, kusadikhira pyonsene, kusawangisira pyonsene.

⁸Kufunana cipo kusamala. Mbwenye kulonga ciporofeta kusadza kamala, kulonga malongero akusiyana-siyana kunadza kamala, kudziwa kunadza kamala.

⁹Thangwi pinadziwa ife, na ciporofeta cinalonga ife, si pyakukwana tayu.

¹⁰Mbwenye cingadza kabwera cakukwana, cire cidakhonda kukhala cakukwana cinadza kamala.

¹¹Pikhali ine mwana, ndikhalonga ninga mwana, ndikhanyerezera ninga mwana, ndikhali na ndzeru za ciwana. Pidakula ine, ndasiya kucita pya ciwana.

¹²Thangwi cincino tisaona ninga pa supeyo, nkhabe kuonesa mwadidi. Mbwenye pa n'dzidzi unowu ungafika, tinadza kamuona mwakukwana nkhope na nkhope. Cincino ndisadziwa pang'ono, mbwenye kutsogolo ndinati ndidziwe mwakukwana ninga munadziwika ine.

¹³Na tenepo, cincino pinasala ipi pitatu: Kukhulupira, kudikhira na kufunana. Mbwenye pa pyonsene ipi, cikulu kakamwe ndi kufunana.