Read cisena 1 Akorintu 16 Bible Online

1 Akorintu 16 - cisena bible

1 Akorintu 16

¹Pa thangwi ya nsonkho-nsonkho unacitirwa mbumba ya Mulungu, citani ninga mudalonga ine kuna abale a magereja a ku dziko ya Galasya.

²Pa ntsiku ya Dimingu, m'bodzi na m'bodzi wanu, mbapambule ntengo wa pire pidawina iye mbapiyikha pa khundu, toera muleke kusonkhesana n'dzidzi unafika ine.

³Na tenepo, ine ndingafika, ndinalemba matsamba mbandiapasa amuna adasankhula imwe, mbindiatuma kwenda ku Djerusalema na miyoni yanu.

⁴Ndingaona kuti pisafunika kuti ine ndiyendembo, iwo anaenda pabodzi na ine.

⁵Ndingamala kupita na kudziko ya Masedhonya, ndinadza kakuonani, thangwi ndinapita na kweneku.

⁶Panango ine ndinakhala na imwe n'dzidzi pang'ono, peno ndinakhala mpaka kupita na imwe pabodzi n'dzidzi wa khoni, toera mundiphedze pa ulendo, kule kunafuna kwenda ine.

⁷Cincino sinafuna kupita mbindikuonani basi tayu, thangwi ndisadikhira kukhala midzidzi mingasi na imwe, Mbuya angapifuna.

⁸Mbwenye ndinakhala mu Efesu mpaka pa phwandu ya Pentikoxti,

⁹thangwi ndafungulirwa nsuwo ukulu toera ndikwanise kuphata basa mwadidi, pontho alipo anyamalwa azinji.

¹⁰Timoti angafika kuna imwe, ncitireni pyonsene toera iye akhonde gopa cinthu pa n'dzidzi unakhala iye pabodzi na imwe, thangwi iye asaphatira basa Mbuya sawa-sawa ninga ine.

¹¹Na tenepo, mbaleke oneka munthu wakumpwaza. M'phedzeni kuti apitirize na ulendo mu ntendere, toera iye akwanise kubwerera pontho kuna ine. Ine ndisan'dikhira pabodzi na abale.

¹²Pa thangwi ya m'bale wathu Apolo, ndankakamiza kuti abwere pabodzi na abale kudza kakuonani. Iye akhonderatu kakamwe kwenda cincino, mbwenye anadza kaenda n'dzidzi wace ungakwana.

¹³Lang'anirani, mbamukhala dzololo pa kukhulupira. Khalani amuna a cipapu, pontho mukhale a mphambvu.

¹⁴Citani pyonsene na kufunana.

¹⁵Imwe musadziwa kuti mudzi wa Xitefana ndiwo udatoma kutawira Yezu mu dziko ya Akaya, pontho iwo ali kutsalakana kuphatira basa mwadidi mbumba ya Mulungu. Ndisakuphembani abale anga,

¹⁶kuti muabvere anthu ninga enewa, na onsene anabverana mbaphata basa pabodzi na iwo.

¹⁷Ndatsandzaya na kubwera kwa Xitefana, Furutunatu na Akaiku, thangwi iwo andicitira pikhadasala kuti imwe mundicitire.

¹⁸Iwo akhurudza ntima wanga, pontho akhurudzambo mitima yanu. Asimbeni anthu ninga enewa.

¹⁹Abale a magereja a ku dziko ya Azya, asakumwanyikani. Akila na Pirisila asakumwanyikani pikulu muna Mbuya, pontho na nsoka wa anyakutawira Yezu unakhala mbugumanyikana pa nyumba pawo.

²⁰Abale onsene a kuno asakumwanyikani. Mwanyikanani m'bodzi na m'bodzi na mpsompsono wa ciubale.

²¹Ine Paulu ndisalemba m'mwanyikiro uyu na manja anga.

²²Ngakhala alipo anakhonda kufuna Mbuya, mbapaswe dzedze. Bwerani Mbuya![20]

²³Kukoma ntima kwa Mbuya Yezu, mbakukhale na imwe.

²⁴Tambirani kukufunani kunakucitani ine monsene, muna Kirixtu Yezu. Ameni.[21]