Read cisena 1 Akorintu 5 Bible Online

1 Akorintu 5 - cisena bible

1 Akorintu 5

¹Pisabveka konsene kwene, kuti pakati panu pana ulukwali. Ulukwali kuti na anthu ene anakhonda kudziwa Mulungu nkhabe kuucita, kufikira kuti m'bodzi wanu akwata nkazi wa babace.

²Penepi imwe musagaya napyo? Mukhafunika mutsukwale pikulu kakamwe, mbamunthamangisa pakati pa nsoka wanu, munthu unowu adacita penepi.

³Ine siri na imwe pabodzi pa nyama tayu, mbwenye mu nzimu ndiri na imwe. Pontho ndamala kunkonesa kale ule adacita pinthu penepi, ninga ndiri na imwe pabodzi.

⁴Imwe mungagumanyikana pabodzi pene mu dzina ya Mbuya Yezu, ine mbindikhala na imwe pabodzi mu nzimu, mphambvu za Mbuya wathu Yezu mbizikhalambo penepo,

⁵mamuna unowu mperekeni kuna Sathani, toera nyama yace ifudziwe, nzimu wace upulumuke pa ntsiku inabwera Mbuya.[7]

⁶Kugaya kwanu si kwadidi tayu. Imwe nkhabe kupidziwa kuti ntombwe pang'ono basi wa kutupisa na iwo mikate, usatupisa ufa onsene wa kumunyiwa?

⁷Tayani ntombwe wakale wa kutupisa na iwo mikate, toera mukhale ufa upsa wakumunyiwa, ninga imwe ndimwedi ufa wakumunyiwa wakusowa ntombwe. Thangwi Kirixtu, Mwana Bira wathu wa Paxkwa, acitwa ntsembe.

⁸Na thangwi eneyo, ticiteni phwandu ya Paxkwa, si na ntombwe wakale wa kutupisa na iwo mikate tayu, si na ntombwe wa pyakuipa peno wa madawi tayu, mbwenye ndi na mikate yakusowa ntombwe, ya kulungama na ya ndimo mwene.

⁹Ndakupangani kale pa tsamba idakulemberani ine, kuti imwe lekani kubvungazikana na anthu anacita pyalukwali.

¹⁰Na tenepo, siri kulongera kuna anthu anacita pyalukwali adakhonda kudziwa Mulungu tayu. Si kuna anthu a dziko ino akuumirwa na kobiri, kuna mambava, peno kuna analambira alungu a pezi tayu. Mbidakhala ndi tenepo, imwe mukhafunika mubuluke pa dziko ino.

¹¹Mbwenye cincino ndisakulemberani kuti muleke kubvungazikana na ule analonga kuti ndi m'bale wanu mbacita pontho pyalukwali, mbakhala nyakuumirwa na kobiri, nyakulambira alungu a pezi, nyapseda, nyakuledzera, peno mbakhala mbava. Na anthu enewa, lekani na kudya na iwo kwene.

¹²Ndinakwanisa tani ine kutonga anthu ali kunja kwa abale a gereja? Imwe nkhabe tonga ale ali n'kati mwa nsoka wanu?

¹³A kunja anadza katongwa na Mulungu. “N'thamangiseni mphapo pakati panu munthu unowu wa kuipa.”