Read cisena 1 Akorintu 8 Bible Online

1 Akorintu 8 - cisena bible

1 Akorintu 8

¹Pa thangwi ya pyakudya pinaikhirwa ntsembe madzimunthu, tisadzindikira kuti tonsene tinako “kudziwa’’. Mphapo kudziwa kweneku kusadzesa kupikuza, mbwenye kufunana kusamanga.

²Ule ananyerezera kuti asadziwa cinthu, adzati kucidziwa ninga munafunikira ico tayu.

³Mbwenye ule anafuna Mulungu, unowu asadziwika na Mulungu.

⁴Na tenepo, na thangwi ya pyakudya pinaikhirwa ntsembe madzimunthu, tisadziwa kuti dzimunthu si cinthu pa dziko tayu, pontho alipo Mulungu m'bodzi basi, nkhabebve unango.

⁵Thangwi ngakhala kudzulu peno pantsi pano alipo anacemerwa alungu, alipodi “alungu’’ azinji na “a mbuya’’ azinji,

⁶mbwenye kwa ife alipo Mulungu m'bodzi basi, Baba, adacita pinthu pyonsene, pontho tiri m'maso toera ticite kufuna kwace. Pontho alipo Mbuya m'bodzi basi, Yezu Kirixtu, adabwera na pinthu pyonsene, pontho tiri m'maso kubulukira muna Iye.

⁷Mbwenye si onsene anadziwa penepi tayu. Anango adadzowerera madzimunthu, na lero asadya pyakudya penepi ninga ntsembe ya madzimunthu. Pontho na kucepa kwa manyerezero awo a muntima, pisaaswipisa.

⁸Mbwenye si cakudya cinaticita kuti Mulungu atitawire tayu. Thangwi tingakhonda kudya, nkhabe cinaluza ife, tingadya, nkhabe cinawina ife.

⁹Mbwenye citani mphole kuti kusudzuka kwanu, kukhonde kukhala cinthu cakugwegwedusa ale adasowa mphambvu.

¹⁰Thangwi ngakhala unango ali kuona iwe unapidziwa mwadidi uli pa thando ya kudya inaikhirwa ntsembe madzimunthu, ana manyerezero akucepa a muntima, nkhabe kukundiwa mbadza kadyambo pyakudya pidaikhirwa ntsembe madzimunthu?

¹¹Tenepa, usapha m'bale wako adaferwambo na Kirixtu, ana manyerezero akucepa a muntima, na thangwi ya kudziwa kwako.

¹²Na tenepo, mungadawisira abale anu mbamuataisa manyerezero awo akucepa a muntima, musadawisira Kirixtu.

¹³Na thangwi eneyo, ngakhala cire cinadya ine cisagwegwedusa m'bale wanga, sinadyabve nyama tayu, toera ndikhonde kugwegwedusa m'bale wanga.