Read cisena 2 Akorintu 1 Bible Online

2 Akorintu 1 - cisena bible

2 Akorintu 1

¹Ine Paulu, mpoxtolo wa Kirixtu[1] Yezu na kufuna kwa Mulungu, pabodzi na m'bale Timoti, tisalembera abale a gereja ya Mulungu iri ku nzinda wa Korintu, na kuna mbumba ya Mulungu yonsene ya ku dziko yonsene ya Akaya.

²Kukoma ntima na ntendere unabulukira kuna Mulungu Baba wathu na kuna Mbuya Yezu Kirixtu, mbipikhale na imwe.

³Mbasimbwe Mulungu Baba wa Mbuya wathu Yezu Kirixtu, Baba wa ntsisi, pontho Mulungu wa kumatamiza konsene,

⁴ule anatimatamiza pa nyatwa zathu zonsene, toera kuti na kumatamiza kudatambira ife ene kuna Mulungu, tikwanise kumatamiza ale ali mu nyatwa zakusiyana-siyana.

⁵Thangwi ninga nyatwa za Kirixtu zadzala mbizitaikira kuna ife, kumatamizwa kwathu kwadzalambo mbukutaikira kubulukira muna Kirixtu.

⁶Mbwenye ngakhala tisaona nyatwa, ndi toera imwe mumatamizwe pontho mupulumuswe. Ngakhala tisamatamizwa, ndi toera imwe mumatamizwembo, kumatamizwa kweneku kunakupasani kupirira toera muwangisire nyatwa zibodzi zene zinaona ife.

⁷Pontho kudikhira kwathu pa thangwi yanu kuli dzololo, thangwi tisadziwa kuti sawa-sawa ninga imwe musakhala nanthu pa nyatwa zathu, munakhalambo nanthu pa kumatamizwa kwathu.

⁸Abale anga, ife nkhabe funa kuti imwe mukhale anthu akukhonda kudziwa nyatwa zidaona ife ku dziko ya Azya. Nyatwa zenezi zapiringana kakamwe mphambvu zathu za kupirira, mbatifikira kunyerezera kuti nkhabe kudza kapulumukabve.

⁹Ndimo mwene, ife tikhadatongerwa kale kufa, toera tikhonde kunyindirika tekha ene, mbwenye tinyindire Mulungu, analamusa anyakufa.

¹⁰Iye atiombola pontho anati atiombole pa nyatwa eneyi ikulu ya kufa. Muna Iye tinaco cidikhiro ca kuti anati apitirize basi na kutiombola,

¹¹pa n'dzidzi unatiphedza imwe na miphembero yanu. Na tenepo, azinji anati apereke takhuta na thangwi yathu, na udidi udacitirwa ife na azinji.

¹²Kugaya kwathu ndi uku: Kuti manyerezero athu a muntima asacita umboni wa kuti ife tisafamba n'dziko, maka-maka pa kubverana kwathu na imwe mwakukwana pontho na mwa ndimo mwene udabulukira kuna Mulungu, mbukhonda kukhala ninga munafunira udziwisi wa anthu, mbwenye ndi kukoma ntima kwa Mulungu.

¹³Thangwi nkhabe pinthu pinakulemberani ife kuti imwe nkhabe kwanisa kupiona peno kupibvesesa. Pontho ndisadikhira kuti munapibvesesa pyonsene,

¹⁴ninga imwembo mwapibva pinango pidalonga ife, kuti ndife mbiri yanu, sawa-sawa ninga imwe ndimwe mbiri yathu, pa Ntsiku ya Yezu Mbuya wathu.

¹⁵Na cinyindiro ceneci, pakutoma ndikhanyerezera kudza kakuonani toera mupaswe nkhombo kawiri

¹⁶pa kwenda kwanga ku dziko ya Masedhonya, na pakubwerera kwanga kuna imwe ndingabuluka kweneko, toera mundiphedze pa ulendo wanga wa kwenda ku dziko ya Djudeya.

¹⁷Pidanyerezera ine penepi, nkhulongera kuti ndikhacita pya mu nsolo mwanga? Peno nkhulongera ndisapicita ninga munapicitira anthu a dziko, mbandilonga pa n'dzidzi ubodzi ene “ande’’, peno “nkhabe?”

¹⁸Mbwenye ninga Mulungu ndi wakunyindirika, sawa-sawa mphangwa zathu kuna imwe si za kuti “ande’’ peno “nkhabe’’ tayu,

¹⁹thangwi Mwana wa Mulungu, Yezu Kirixtu analonga ife pakati panu, ine na Silivano[2] pontho na Timoti, si wa “Ande’’ peno wa “nkhabe’’ tayu. Mbwenye mwa Iye, “Ande’’ asagumanika kale na kale.

²⁰Thangwi pipikiriro pyonsene pidacita Mulungu, pyonsene pyagumana “ande’’ muna Kirixtu. Na thangwi eneyo, kubulukira muna Iye, tisalongambo “Ameni’’, toera kupasa mbiri Mulungu.

²¹Mbwenye ndiye Mulungu anacita kuti ife na imwe tikhale dzololo muna Kirixtu. Iye atidzodza

²²mbatidhinda toera tikhale ace, mbaikha Nzimu wace m'mitima mwathu ninga cipanda.

²³Mulungu mbandiphe pyace, ngakhala ndi uthambi pinalonga ine kuti pidakhonda ine kupita pontho na ku Korintu, ndi toera udidi wanu.

²⁴Si kuti tisafuna tikunde kukhulupira kwanu tayu, mbwenye tisaphedzana na imwe kuti mukhale akutsandzaya. Thangwi na cikhulupiro, imwe muli dzololo.