Read cisena 2 Akorintu 10 Bible Online

2 Akorintu 10 - cisena bible

2 Akorintu 10

¹Ine Paulu, munthu wa mafala “akufewa’’ ndingakhala na imwe nkhope na nkhope, mbwenye ndingakhala kutali ndisalonga mafala “akuuma’’, ndisakuphembani na kupicepesa pontho na kukhurudzika kwa Kirixtu!

²Pontho ndisakuphembani kuti, ndingakhala na imwe pabodzi, lekani kundikakamiza kuti ndilonge pinthu pyakuuma kakamwe, sawa-sawa ninga cipapu cinanyerezera ine kucita kuna anango ananyerezera kuti ife tisapicita ninga anthu a dziko ino.

³Ande, ife ndife anthu ene pyathu, mbwenye mamenyero athu a nkhondo, asiyana na anacita anthu.

⁴Pida pinamenya na ife nkhondo si pya dziko ino tayu, mbwenye pina mphambvu muna Mulungu za kufudza mipanda ya anyankhondo.

⁵Tisafudza ndzeru pontho na kupikuza konsene kunapingiza njira zonsene za kudziwa Mulungu, mbatitapata manyerezero awo onsene kuti akhale akubvera Kirixtu.

⁶Pontho tinakhala akusasanyika toera kuchunyusa kukhonda kubvera konsene, male mungadziwa kuti imwe mwakwana pakubvera.

⁷Imwe musalang'ana pinthu piri pakweca basi. Ngakhala munthu asanyinda kuti ndi wa Kirixtu, asafunika anyerezere pontho ekha ene kuti ifembo ndife a Kirixtu ninga iye.

⁸Thangwi ngakhala ine ndisapikuza pikulu na thangwi ya mphambvu za utongi zidapaswa ine na Mbuya, sinamanyadzo napyo tayu, thangwi mphambvu zenezi ndi toera kukuwangisani, si toera kukufudzani tayu.

⁹Ine nkhabe funa kuti pikhale ninga ndisasaka kukuthusani na matsamba anga anakulemberani ine.

¹⁰Thangwi anango asalonga tenepa: “Mafala analemba iye mbakuuma pontho ana mphambvu, mbwenye munthu wace ungamuona nkhabe pangisa, pontho mafala ace mbakupwazika.”

¹¹Anthu enewa analonga tenepo, mbadziwe kuti pire pinalonga ife pa tsamba mbatiri kutali na imwe, ndi penepi pinafuna kucita ife tingakhala dhuzi.

¹²Thangwi ife nkhabe kupikuza kuti tikhale sawa-sawa peno tilandane na anango anasimbika okha ene. Mbwenye anthu enewa angapipima mbalandanisika okha ene, asapicita na kusowa kwawo ndzeru.

¹³Mphapo ife nkhabe kupikuza kupiringana migano inafunika, mbwenye kupikuza kwathu kusamalisira pa basa idatipasa Mulungu, inafika na kuna imwe enembo.

¹⁴Ife nkhabe kupitiriza kwenda kutsogolo na kugaya kwathu tayu, ninga mbidakhonda kufika kuna imwe, thangwi ife tafika kale mpaka kuna imwe na Mphangwa Zadidi za Kirixtu.

¹⁵Tenepo, ife nkhabe kupiringana migano yathu, mbatipikuza na mabasa anacita anango. Cidikhiro cathu ndi ca kuti: Pa n'dzidzi unaenda mbicikula cikhulupiro canu, mabasa athu akule kakamwe pakati panu,

¹⁶toera tikwanise kumwaza Mphangwa Zadidi m'pisa pinango piri kutali na imwe, mbatikhonda kupikuza na basa idamala kucitwa kale m'pisa pya anango.

¹⁷Mbwenye, “Ule anagaya, mbagaye muna Mbuya,”

¹⁸thangwi munthu nkhabe kusimbwa angasimbika ekha ene, mbwenye asasimbwa na Mulungu.