Read cisena 2 Akorintu 3 Bible Online

2 Akorintu 3 - cisena bible

2 Akorintu 3

¹Kodi nkhulongera kuti tiri kutoma pontho kusimbika tekha ene? Peno nkhulongera pisafunika matsamba a kuticitira umboni kuna imwe, peno tsamba yakubuluka kuna imwe, ninga pinacita anthu anango?

²Imwe ene ndimwe tsamba yathu, idalembwa m'mitima mwathu, yakudziwika pontho mbioniwa na anthu onsene.

³Imwe musapangisa kuti ndimwe tsamba ibodzi ya Kirixtu idabulukira pa basa yathu, idakhonda kulembwa na tinta, mbwenye na Nzimu Wakucena wa m'maso, pontho idakhonda kulembwa pa matabwa a mwala mbwenye m'matabwa a mitima ya anthu.

⁴Ceneco ndi cinyindiro cina ife patsogolo pana Mulungu, kubulukira muna Kirixtu.

⁵Si kuti tinakwanisa tekha ene kunyerezera pinthu ninga pisabulukira muna ife tayu, mbwenye mphambvu zathu zisabuluka kuna Mulungu.

⁶Iye atipasa mphambvu toera tikhale anyabasa a cibverano cipsa, cidakhonda kukhala ca Mwambo wakulembwa, mbwenye ca Nzimu. Thangwi Mwambo wakulembwa usapha, Nzimu usapulumusa.

⁷Basa idadzesa kufa yalembwa pa myala na malemba, mbwenye basa eneyi yabwera na mbiri kakamwe, ya kuti ana a Izarayeli akhacimwana kulang'anisa nkhope ya Mozesi na maso awo, na thangwi ya kuyetimira kwa nkhope yace. Mbwenye kuyetimira kweneku kukhali kwakumala.

⁸Ndiye tani basa ya Nzimu, nkhabe khala ya mbiri ikulu kakamwe?

⁹Ngakhala basa idadzesa kutongwa ikhali ya mbiri, ndiye tani mbiri inafuna kudza kakhala na basa inabala ulungami!

¹⁰Thangwi pire pikhakhala na mbiri kale ene, cincino nkhabebve mbiri, tingalandanisa na mbiri ikulu kakamwe ya cincino.

¹¹Ngakhala pire pyakumala pyapangizika na mbiri, ndiye tani mbiri inafuna kudza kakhala na pire pya kwenda na kwenda!

¹²Na tenepo, na thangwi ya cidikhiro cathu ceneco, tisalonga mbatikhonda kugopa cinthu.

¹³Ife nkhabe kucita ninga Mozesi, akhagudumira nkhope yace na nguwo toera ana a Izarayeli akhonde kuona kuti kuyetimira kuli kumala.

¹⁴Ndimo mwene, manyerezero awo afungwa, mpaka lero nguwo eneyi ibodzi-bodzi iciripo angaona mabukhu a cibverano cakale. Nguwo eneyi hidabuluswa tayu, thangwi iyo isabuluswa ungakhala muna Kirixtu basi.

¹⁵Ndimo mwene, na lero, iwo angaona mwambo wa Mozesi, nguwo isagudumira mitima yawo.

¹⁶Mbwenye munthu angazungunuka mbatawira Mbuya, nguwo isabuluswa.

¹⁷Lang'anani, Mbuya ndi Nzimu, pontho panakhala Nzimu wa Mbuya, penepo pana kusudzuka.

¹⁸Pontho ife tonsene, pakulang'ana mbiri ya Mbuya ninga pa supeyo na nkhope yakukhonda kugudumirwa, tisacinjiwa toera tikhale cipangizo cace. Tenepa, mbiri isakula muna ife ntsiku na ntsiku. Mbiri eneyi isabuluka kuna Mbuya, Iye Nzimu.