Read cisena 2 Akorintu 4 Bible Online

2 Akorintu 4 - cisena bible

2 Akorintu 4

¹Na tenepo, pakupaswa kwathu basa iyi na ntsisi zidabverwa ife, mbatilekeni kumala mphambvu.

²Mbwenye ife tisakhonda macitiro akubisala na akupasa manyadzo. Tisakhonda kulonga pya uthambi, peno kudodomesa fala ya Mulungu. Mbwenye tisapangisa pakweca pyonsene pya ndimo mwene patsogolo pana Mulungu, kuti munthu ana manyerezero adidi a muntima, akhonde kupenula.

³Mbwenye ngakhala Mphangwa zathu Zadidi zinalonga ife zabisala, zabisalira ale anataika.

⁴Iye mulungu wa dziko ino, afunga ndzeru za anyakukhonda kutawira, toera akhonde kuona cieza ca Mphangwa Zadidi za mbiri ya Kirixtu, cipangizo ca Mulungu.

⁵Thangwi mphangwa zinamwaza ife si zathu tayu, mbwenye tisalonga Yezu Kirixtu ninga Mbuya, pontho ife ndife adzakazi kwa imwe na thangwi ya Yezu.

⁶Thangwi Mulungu adalonga kuti: “Pa cidima mbapagake cieza,” Iye ene agaka m'mitima mwathu, toera kutipasa cieza ca kudziwa mbiri ya Mulungu inaonekera pa nkhope ya Kirixtu.

⁷Mbwenye tinayo mpfuma eneyi mu pyombo pya dongo, toera kupangisa kuti mphambvu eneyi yakupiringana pyonsene yabuluka kuna Mulungu, si kuna ife tayu.

⁸M'makhundu onsene tisathabuswa, mbwenye nkhabe kukundiwa. Panango tisakhala na kupenula, mbwenye nkhabe kumala mphambvu.

⁹Tisazondiwa, mbwenye nkhabe kusiyiwa. Tisaphekeswa, mbwenye nkhabe kuphiwa.

¹⁰Tisadzesa kazinji kene m'manungo mwathu kufa kwa Yezu, toera upulumuki wa Yezu upangizikembo m'manungo mwathu.

¹¹Thangwi, ife tiri m'maso, tisaperekwa kazinji kene pa kufa na thangwi ya Yezu, toera kuti upulumuki wace uonekerembo m'manungo mwathu a kufa.

¹²Nkhulongera kuti muna ife kufa kusaphata basa, mbwenye muna imwe upulumuki usaphata basa.

¹³Bukhu ya Mulungu yalonga kuti: “Ine ndatawira, na thangwi eneyo ndapilonga.” Na nzimu ubodzi ene wakukhulupira, ife tisatawirambo, na thangwi eneyo tisapilonga.

¹⁴Thangwi ife tisapidziwa kuti Ule adalamusa Mbuya Yezu pa kufa, anatilamusambo ife pabodzi na Yezu mbatipangisa patsogolo pace pabodzi na imwe.

¹⁵Thangwi pyonsene ipi ndi udidi kuna imwe, toera tenepa, kukoma ntima kwa Kirixtu kudzale na kutaikira kuna anthu azinji, kuti anthu apereka takhuta wankulu toera kupasa mbiri Mulungu.

¹⁶Na thangwi eneyi, mbatilekeni kumala mphambvu. Mbitidziwa kuti manungo athu ali kumala, mbwenye n'kati mwathu musasasanyirwa papsa ntsiku na ntsiku,

¹⁷thangwi nyatwa zathu zing'ono pontho zakupita zinaona ife, zisabala kuna ife mbiri ya kwenda na kwenda, ikulu kakamwe kupita nyatwa zonsene.

¹⁸Tenepo, ife nkhabe kulang'anisisa na maso athu pire pinaoneka, mbwenye pinakhonda kuoneka, thangwi pire pinaoneka ndi pyakupita, mbwenye pire pinakhonda kuoneka ndi pya kwenda na kwenda.