Read cisena 2 Akorintu 5 Bible Online

2 Akorintu 5 - cisena bible

2 Akorintu 5

¹Tisadziwa kuti khumbi yathu ya padziko inakhala ife ingafudzika, tinayo nyumba inango kuna Mulungu, nyumba ya kwenda na kwenda kudzulu, yakukhonda kumangwa na manja a anthu.

²Thangwi pa n'dzidzi uno, ife tisatetemera na kufuna kuti tibvazikwe nyumba yathu ya kudzulu.

³Pontho tingabvazikwa nkhabe kudza kagumanika tiri cipezi-pezi.

⁴Mphapo mbatiri mu khumbi iyi, tiri kutetemera mbatitsukwala, thangwi ife nkhabe funa kuti tiduliswe tayu, mbwenye tibvazikwe nyumba yathu ya kudzulu, toera cire cinafa cibvale cakukhonda kufa.

⁵Ndi thangwi eneyodi idatisasanyira Mulungu, pontho mbatipasa Nzimu ninga cipanda.

⁶Na tenepo, cinyindiro tinaco basi, pontho tisadziwa kuti mbatiri na manungo awa, tiri kutali na Mbuya.

⁷Thangwi tiri kufamba na kukhulupira, nkhabe kufamba na pinaona ife.

⁸Thangwi tinako kunyindira pontho tisafuna kakamwe kusiya manungo awa mbatikhala na Mbuya.

⁹Thangwi pa pyonsene ipi, tisafuna kakamwe kuti titsandzaise Mbuya, peno tingakhala na manungo ano, peno tingaasiya.

¹⁰Thangwi tonsene tisatongwa kubulukira patsogolo pa mpando wa kutongera miseru wa Kirixtu, toera kuti m'bodzi na m'bodzi atambire pidankwanira na mabasa adacita iye na manungo ace, peno adidi peno akuipa.

¹¹Na thangwi ya kudziwa kwathu kugopa Mbuya, tisasaka kuti anthu atawire kutibvera. Patsogolo pa Mulungu ife tisadziwika kuti ndife ani, pontho ife tisadikhira kuti tidziwikembo n'kati mwa manyerezero anu a muntima.

¹²Ife nkhabe kusaka kusimbika pontho tekha ene kuna imwe, mbwenye tisakupasani n'dzidzi kuti mugaye muna ife, toera mukhale na cinthu cakutawira kuna ale anagaya na pire pinaona iwo pa nkhope, mbapikhonda kukhala pya muntima.

¹³Thangwi ngakhala ndife madzemwa, ndi thangwi ya Mulungu, ngakhala tina ndzeru, ndi thangwi yanu.

¹⁴Thangwi kufuna kwa Kirixtu kusatikakamiza, thangwi tisatawiradi kuti alipo m'bodzi adafera onsene, na mwenemu onsene afambo.

¹⁵Iye afera onsene toera kuti ale ali m'maso akhonde kupikhalira m'maso okha ene, mbwenye apikhalire m'maso kuna ule adaafera na kulamuswa pa kufa.

¹⁶Na tenepo, ife kutomera lero mpaka kutsogolo, tikhonde kudziwa pontho munthu ninga munadziwa dziko. Pontho ngakhala kale ene tadziwa Kirixtu ninga munan'dziwa dziko, cincino nkhabebve kun'dziwa tenepo tayu.

¹⁷Na tenepo, munthu ali muna Kirixtu alengwa papsa. Pinthu pyonsene pyakale pyamala, cincino pyabwera pipsa!

¹⁸Pyonsene ipi pisabulukira kuna Mulungu, adacita kuti tisekesane na Iye na thangwi ya Kirixtu, pontho mbatipasa basa ya kulonga pya kusekesana.

¹⁹Uku ndiko kubveka kuti, kubulukira muna Kirixtu, Mulungu akhasekesana na dziko mbakhonda kulang'ana kudawa kwa anthu, pontho atisiyira mphangwa za kusekesana.

²⁰Na tenepo, ife ndife atumwi a Kirixtu, pyakhala ninga Mulungu ali kuphemba kuti alonge pinafuna iye kubulukira muna ife. Na dzina ya Kirixtu ife tisakuphembani kuti: Musekesane na Mulungu.

²¹Kuna Ule adakhonda dziwa kudawa, Mulungu aikha kudawa muna iye na thangwi yathu, toera muna Iye tikwanise kulungamiswa na Mulungu.