Read cisena Agalata 1 Bible Online

Agalata 1 - cisena bible

Agalata 1

¹Ine Paulu, mpoxtolo adakhonda kutumwa na anthu peno kuphebza na munthu, mbwenye wakusankhulwa na Yezu Kirixtu[1] pontho na Mulungu Baba adalamusa Yezu pa kufa,

²pabodzi na abale onsene ali na ine, ndisalemba tsamba iyi kuna magereja a ku dziko ya ku Galasya.

³Kukoma ntima na ntendere unabulukira kuna Mulungu Baba wathu, na kuna Mbuya Yezu Kirixtu, mbazikhale na imwe.

⁴Kirixtu aperekeka ekha ene na thangwi ya madawi athu, toera kutiombola pa dziko ino yakuipa, na kufuna kwa Mulungu, Baba wathu,

⁵Iye anakwana kupaswa mbiri kwenda na kwenda. Ameni.

⁶Ndiri kudzumatirwa kusiya kunacita imwe na mwansanga Ule adakucemerani na kukoma ntima kwa Kirixtu, mbamutowerera mphangwa zinango,

⁷kuti si Mphangwadi Zadidi tayu. Pinacitika ndi kuti anthu anango asakudzudzumisani, mbafuna kusanduza Mphangwa Zadidi za Kirixtu.

⁸Mbwenye ngakhala peno ife ene, peno anju m'bodzi wa kudzulu mbalonga mphangwa zadidi zakusyana na zire zidakupangani ife, mbapaswe dzedze!

⁹Ninga mudalonga ife kale, cincino ndinathimiza pontho na kulonga kuti: Ngakhala alipo munthu anakupangani mphangwa zinango zakusyana na zire zidatambira imwe kale, mbapaswe dzedze!

¹⁰Kodi ine cincino ndiri kusaka kusimbwa na anthu, peno na Mulungu? Peno ndisasaka ndikome na anthu? Mbidakhala ine ndisasaka kukoma kuna anthu basi, mbidakhala nyabasa wa Kirixtu tayu.

¹¹Abale anga, ndisafuna mudziwe kuti Mphangwa Zadidi zinamwaza ine, zidabulukira kuna anthu tayu.

¹²Sidazitambira na munthu, peno cita kuzipfundziswa tayu. Mbwenye ndazitambira na Yezu Kirixtu pa kuoneswa kwanga mu Nzimu.

¹³Imwe mwabva pikhacita ine kale mu mwambo wa madjuda, ninga kuzonda kukulu kukhacita ine abale a gereja ya Mulungu, mbindikhasaka kuifudza.

¹⁴Mu mwambo wa madjuda, ine ndikhapiringana madjuda azinji a thunga yanga, pontho ndikhali munthu wakukakamira kakamwe mitemo ya ambuya anga.

¹⁵Mbwenye Mulungu andisankhula mbindiri m'mimba mwa mai wanga, mbandicemera na kukoma ntima kwace. Mudafuna Iye

¹⁶kupangisa mu Nzimu Mwana wace muna ine kuti ndimulonge pakati pa anthu adakhonda kukhala madjuda, sidabvundza munthu unango tayu.[2]

¹⁷Pontho sidenda ku Djerusalema kwenda kaona ale adatoma kukhala apoxtolo ine mbindidzati, mbwenye buluka penepo ndaenderatu ku dziko ya Arabhya, mbindibwerera pontho ku nzinda wa Dhamaxku.

¹⁸Pakumala pyaka pitatu, ndaenda ku Djerusalema kwenda kaonana na Pedhru,[3] mbandikhala na iye ntsiku khumi na zixanu.

¹⁹Sidaonabve mpoxtolo unango tayu, mbwenye ndaona Tiyago basi, m'bale wace Mbuya.

²⁰Ndisadumbira patsogolo pana Mulungu, kuti pinakulemberani ine, si pya uthambi tayu.

²¹Buluka penepo, ndaenda ku madziko a ku Sirya na a ku Silisya.

²²Ine sikhadziwika tayu nkhope yanga na abale a magereja a ku Djudeya, ali muna Kirixtu.

²³Akhabva kwene mbapilongwa kuti: “Ule akhatizonda kale ene, cincino asaenda mbalonga cikhulupiro cikhasaka iye kufudza kale ene.”

²⁴Pontho akhapasa mbiri Mulungu na thangwi yanga.