Read cisena Agalata 3 Bible Online

Agalata 3 - cisena bible

Agalata 3

¹Imwe madzemwa a ku Galata! Mbani adakulodzani? Kodi kukhomerwa kwa Yezu Kirixtu pa ntanda kudapangizwa tayu pamaso panu?

²Ine ndisafuna ndidziwe cinthu cibodzi basi kuna imwe: Mwatambira Nzimu Wakucena na thangwi ya kucita mabasa a Mwambo, peno na thangwi ya kukhulupira pire pidabva imwe?

³Kodi imwe ndimwe madzemwadi kakamwe a kuti pakumala kutoma na Nzimu Wakucena, cincino musafuna mumalisire na mphambvu zanu?[6]

⁴Kodi nyatwa zonsene zidaona imwe ndi zapezi? Ine nkhabe tawira!

⁵Mulungu anakupasani Nzimu wace pontho mbacita pirengo pakati panu, asacita pinthu penepi na mabasa a Mwambo, peno asapicita na thangwi ya kukhulupira kudatambira na imwe fala?

⁶Nyerezerani pidacita Abharaamu: “Iye akhulupira Mulungu. Penepi pyancita kuti iye akhale wakulungama.”

⁷Na tenepo, dziwani kuti ale ana kukhulupira, enewa ndiwo ana a Abharaamu.

⁸Bukhu ya Mulungu na kudziwa nyapantsi kuti, Mulungu anadza kalungamisa ale adakhonda kukhala madjuda na thangwi ya kukhulupira kwawo, apanga Abharaamu nyapantsi mphangwa zadidi zinalonga tenepa: “Na thangwi yako madzindza onsene anakhala na nkhombo.”

⁹Na tenepo, anakhulupira asapaswa nkhombo pabodzi na Abharaamu, mamuna wa kukhulupira.

¹⁰Ale onsene ananyindira mabasa a Mwambo ali na dzedze, thangwi pyalembwa kuti: “Mbapaswe dzedze ale onsene anakhonda kuangisira kucita pyonsene pidalembwa mu bukhu ya Mwambo.”

¹¹Ndimo mwene, patsogolo pana Mulungu nkhabe munthu analungamiswa na Mwambo, thangwi “nyakulungama anapulumuka na thangwi ya kukhulupira.”

¹²Mwambo nkhabe kubulukira pa kukhulupira, mbwenye “ule anacita pinafuna Mwambo, anapulumuka napyo.”

¹³Kirixtu atiombola pa dzedze ya Mwambo, pidacitika Iye nyadzedze pa mbuto yathu, thangwi pyalembwa kuti: “Ana dzedze ale onsene anamanikwa pa ntanda.”

¹⁴Penepi, toera muna Kirixtu Yezu nkhombo za Abharaamu zifikembo kuna anthu adakhonda kukhala madjuda, kuti titambire cipikiriro ca Nzimu Wakucena na thangwi ya kukhulupira.

¹⁵Abale anga, ndisalonga ninga pinacitika kuna anthu. Nkhabe m'bodzi anakwanisa kufudza peno kuthimizira cibverano cidamala kumangwa kale na anthu.

¹⁶Lang'anani, Mulungu acita pipikiriro kuna Abharaamu na kuna dzindza yace. Bukhu ya Mulungu nkhabe kulonga kuti: “Kuna madzindza ako,[7]” ninga ali kulongera mazinji, mbwenye isalonga kuti: “Kuna dzindza yako,” kupangisa kuti pisalongera munthu m'bodzi basi, kulongera Kirixtu.

¹⁷Ndisafuna ndilonge ici: Mwambo udabwera pakupita pyaka madzana manai na makumatatu, nkhabe kubulusa mphambvu ya cibverano cidamangwa kale ene na Mulungu, kuti udze kafudze cipikiriro ca Mulungu.

¹⁸Ngakhala unthaka usatongwa na Mwambo, nkhabebve tongwa na cipikiriro. Mbwenye Mulungu aupasa Abharaamu pezi na thangwi ya cidumbiriro.

¹⁹Mphapo Mwambo waciterwanji? Mwambo wathimizirwa toera kupangisa kudodomeka kwa anthu, mpaka kubwera kwa munthu m'bodzi wa pa dzindza, Ule akhadapikirirwa. Pontho Mwambo unowu waperekwa na maanju m'manja mwa nkhoswe m'bodzi.

²⁰Mphapo nkhoswe nkhabe limirira munthu basi tayu, mbwenye Mulungu ndi m'bodzi.

²¹Na tenepo, Mwambo nkhabe bverana na pipikiriro pidacita Mulungu? Nkhabe citika! Thangwi mbidakhala anthu akhadapaswa mwambo una mphambvu za kupulumusa, ndimo mwenedi kuti iwo mbadakhala akulungama pamaso pa Mulungu na thangwi ya mwambo.

²²Mbwenye Bukhu ya Mulungu yafungira pyonsene pantsi pa madawi, toera kuti cidumbiriro cinabulukira pa kukhulupira Yezu Kirixtu, cipaswe ale anatawira.

²³Cikhulupiro ceneci mbicidzati kubwera, tikhadamangwa na Mwambo mbatifungirwa mu Mwambo, mpaka cikhulupiro cikhafuna kudza, cipangizike.

²⁴Na tenepo, mwambo ukhali ninga makayaya, mbutikwata mpaka kuna Kirixtu, toera tilungamiswe na cikhulupiro.

²⁵Mbwenye cincino, na kubwera kwa cikhulupiro, tinatongwabve na makayaya tayu.

²⁶Thangwi Imwe monsene ndimwe ana a Mulungu kubulukira pa kukhulupira kwanu muna Kirixtu Yezu,

²⁷thangwi onsene adatambira batixmu muna Kirixtu, abvala Kirixtu.

²⁸Nkhabebve n'djuda peno n'gerego, n'dzakazi peno ntumbe, mamuna peno nkazi. Thangwi imwe monsene ndimwe cinthu cibodzi muna Kirixtu Yezu.

²⁹Pontho ngakhala imwe ndimwe a Kirixtu, ndimwembo a dzindza ya Abharaamu, anaciro unthaka ninga mudapikirirwa ipyo.