Read cisena Aefesu 2 Bible Online

Aefesu 2 - cisena bible

Aefesu 2

¹Imwe mukhadafa n'kati mwa kukhonda kubvera kwanu, pontho na m'madawi mwanu,

²mwenemu mukhakhala imwe kale ene pikhatowerera imwe makhaliro a dziko ino, pontho na nkulu wa mizimu ya kuipa inakhala cidzulu-dzulu, nzimu unaphata basa cincino muna ana anakhonda kubvera.

³Kale ene tonsene ife tikhakhalambo pakati pawo, mbatikhacita kufuna kwa nyama yathu, mbatitowerera kufuna kwa nyama na manyerezero ayo. Ife ninga anthu, tikhakwanira kuoneswa nyatwa na Mulungu ninga anangombo.

⁴Mbwenye Mulungu, na ntsisi zace zikulu, pontho na kutifuna kukulu kudaticita Iye,

⁵ife mbatiri anthu a kufa n'kati mwa madawi athu, atipasa upulumuki pabodzi na Kirixtu - mwapulumuswa na kukoma ntima kwa Mulungu.

⁶Mulungu atilamusa pa kufa pabodzi na Kirixtu, pontho atikhazika pabodzi na Iye mu mbuto za kudzulu muna Kirixtu Yezu,

⁷toera kupangisa pa midzidzi inafuna kudza, kukoma ntima kwace kukulu kakamwe, kudapangizika pa udidi wace kuna ife, muna Kirixtu Yezu.

⁸Thangwi mwapulumuswa na kukoma ntima kwa Mulungu, kubulukira pa kukhulupira. Penepi pidabulukira kuna imwe tayu, mbwenye ndi muwoni wa Mulungu.

⁹Pontho penepyo si thangwi ya mabasa tayu, toera munthu akhonde kugaya.

¹⁰Thangwi ife ndife basa ya Mulungu, tacitwa muna Kirixtu Yezu, toera kuphata mabasa adidi adasasanya Mulungu kale ene, toera ife tiacite.

¹¹Na tenepo, kumbukani kuti kale ene imwe, mukhali anthu adakhonda kukhala madjuda pakubalwa, mbamucemerwa anthu akukhonda kusibza pa nyama, na ale akhacemerwa anyakusibza na manja a anthu,

¹²pontho pa n'dzidzi unowu imwe mukhali na Kirixtu tayu, mbamumwazana na mbumba ya Izarayeli, mbamukhala anthu akudza pa thangwi ya pibverano pya cipikiriro, mbamusowa cidikhiro, pontho mbamusowa Mulungu pa dziko.

¹³Mbwenye cincino, muna Kirixtu Yezu, imwe mukhali kutali kale ene, mwadzeswa dhuzi kubulukira mu ciropa ca Kirixtu.

¹⁴Thangwi Kirixtu ndi ntendere wathu, ndiye adacita kuti madjuda na ale adakhonda kukhala madjuda, akhale cinthu cibodzi, mbafudza mpanda wa kuidana ukhaamwazanisa pakati pawo.

¹⁵Yezu afudza na manungo ace Mwambo wa matongero mazinji. Pikhafuna Iye ndi kuti muna Iye, pa awiri awa, acitike munthu m'bodzi mupsa, mbadzesa ntendere

¹⁶pontho, kubulukira pa ntanda wa Yezu, asekesane mu uwiri mwawo na Mulungu m'manungo mabodzi, adamalisa na Iye kuidana.

¹⁷Yezu abwera, mbalonga ntendere kuna imwe mukhali kutali na kuna ale akhali dhuzi,

¹⁸thangwi kubulukira muna Iye, ife na imwe tinayo njira ya kwenda kuna Baba, na Nzimu ubodzi basi wa Mulungu.

¹⁹Na tenepo, imwe cincino simwebve anthu akudza peno afambi tayu, mbwenye ndimwe anthu a dziko ibodzi ene ya mbumba ya Mulungu, pontho ndimwe ana a nyumba ibodzi ene ya Mulungu,

²⁰nyumba idamangwa padzulu pa myala yakutsidzikira idaikhwa na apoxtolo na maporofeta, Kirixtu Yezu mbakhala mwala wa pa nkhomu.

²¹Pa mwala unowu, nyumba yonsene isamangwa cibodzi na cibodzi mbikula, toera ikhale Nyumba ya Mulungu yakucena muna Mbuya.

²²Muna Iye, imwembo muli kumangwa pabodzi, toera mudze kakhale Nyumba ya Mulungu mu Nzimu Wakucena.