Read cisena Aefesu 4 Bible Online

Aefesu 4 - cisena bible

Aefesu 4

¹Ine ninga munthu wa n'kaidi muna Mbuya, ndisakuphembani kuti mufambe na mafambiro adidi adacemerwa na imwe,

²Khalani akucepeseka kakamwe na akukhurudzika, pontho mukhale akuwangisira, m'bodzi na m'bodzi mbapirira ndzace na kufunana.

³Citani mphambvu zonsene toera mukoye kuphatana kwanu kwa mu Nzimu kunamangiwa na ntendere.

⁴Alipo manungo mabodzi basi na Nzimu ubodzi basi, sawa-sawambo ninga cidikhiro cidacemererwa imwe ndi cibodzi basi.

⁵Alipo Mbuya m'bodzi basi, cikhulupiro cibodzi basi, na batixmu ibodzi basi,

⁶na Mulungu m'bodzi basi Baba wa onsene, unowu ali padzulu pa onsene, kubulukira mwa onsene, pontho Iye ali mwa onsene.

⁷Pontho kukoma ntima kweneku kwa Mulungu kwacitirwa m'bodzi na m'bodzi wathu, sawa-sawa ninga muwoni udapimirwa iye na Kirixtu.

⁸Na thangwi eneyo, Bukhu ya Mulungu isalonga kuti: “Mudakwira Iye kudzulu kwa mathambo onsene, atapata anthu azinji mbaenda nawo, pontho mbapasa anthu miyoni.”

⁹Pisalongeranji “Iye akwira,” sikulongera kuti Iye akhadachitambo mpaka pantsi kakamwe pa mataka tayu?[5]

¹⁰Ule adachita ndiye m'bodzi ene adakwira kudzulu kwa mathambo onsene, toera adzadze pinthu pyonsene.

¹¹Pontho Iye ene aikha anango kuti akhale apoxtolo, anango maporofeta, anango anyakumwaza Mphangwa Zadidi, pontho anango kuti akhale akumbidzi na apfundzisi,

¹²na kufuna kusasanyira mbumba ya Mulungu kuti iphate mabasa ace toera manungo a Kirixtu amangike,

¹³mpaka tonsene tafikira kuphatana pa kukhulupira na pakudziwa Mwana wa Mulungu, mbatikwanisa kukula mpaka kufikira thunga yakukwana ya Kirixtu,

¹⁴toera tikhonde kukhala pontho ninga ana ang'ono, mbatikwatiwa na mabimbi kwenda uku-na-uku, peno mbatigwinyiwa na mphepo ya pipfundzo pyakusiyana-siyana, mbatinyengererwa na ucenjeri wa anthu toera kutipitisa mu njira za kudodoma.

¹⁵Mbwenye titowerere pya ndimo mwene mwa kufunana, tikule mwa pyonsene kuna ule nsolo, Iye Kirixtu.

¹⁶Manungo onsene angagumanyizwa pontho mbaphatanizwa na kuphedziwa kwa m'mafunyiro onsene, asakula mbamangika okha ene mwa kufunana, pa n'dzidzi unaphata phindi ibodzi na ibodzi basa yace.

¹⁷Na tenepo, ine ndinakupangani, pontho mbandithimiza na kukupangani muna Mbuya, kuti lekani kukhala ninga anthu akukhonda kudziwa Mulungu,[6] anakhala na manyerezero apezi.

¹⁸Iwo manyerezero awo mban'cidima, pontho apambulwa pa upulumuki wa Mulungu na thangwi yakukhonda kudziwa kwawo, kudabulukira pa kuuma kwawo ntima.

¹⁹Na kusowa kwawo manyadzo, aperekeka m'makhaliro akuipa, mbacita na kufuna kukulu, pyakunyanyasa pyonsene pyakusiyana-siyana.

²⁰Mbwenye si penepyo pidapfundza imwe pa thangwi Kirixtu tayu.

²¹Ndimo mwene, imwe mwam'bva mbalongwa pontho mwapfundziswa muna Iye sawa-sawa na undimo mwene uli muna Yezu.

²²Pa thangwi ya makhaliro anu akale, imwe mwapfundziswa kuti mubuluse munthu wakale anapitiswa mwa kuipa na mafuniro a uthambi,

²³toera mucinjike mu nzimu manyerezero anu,

²⁴pontho mubvale munthu mupsa, adasasanyiwa toera alandane na Mulungu mwakulungama na mwa kucena kunabulukira mwa ndimo mwene.

²⁵Na tenepo, m'bodzi na m'bodzi wanu asatongwa asiye uthambi alonge pya ndimo mwene kuna ndzace, thangwi tonsene ndife mapindi a manungo mabodzi ene.

²⁶“ Imwe mungaipirwa, lekani kudawa.” Lekani kukhala mbumudaipirwa mpaka kufikira dzuwa yadoka,

²⁷pontho lekani kupasa mbuto Dyabu.

²⁸Ule akhaba mbaleke kubabve, mbwenye mbaphate basa na manja ace mbacita cinthu cadidi, toera akhale na cinthu cakuphedza naco anyakusowa.

²⁹Pa mulomo panu mbapaleke kubuluka fala ibodzi ya kuipa, mbwenye mbibuluke basi ire fala yadidi inaphedza anango ninga munafunika, toera ipase kukoma ntima kwa Mulungu kuna ale anaibva.

³⁰Lekani kutsukwalisa Nzimu Wakucena wa Mulungu, ule udadhindwa na imwe mpaka ntsiku ya kuombolwa.

³¹Bulusani nyongo yonsene, bibvu, kuipirwa, ukali, kulongera ndzako pyapezi, na kuzondana konsene.

³²Khalani anthu adidi pontho mubverane ntsisi m'bodzi na m'bodzi, mbamulekererana m'bodzi na m'bodzi, ninga Mulungu akulekereranimbo muna Kirixtu.