Read cisena Afilipi 2 Bible Online

Afilipi 2 - cisena bible

Afilipi 2

¹Ngakhala na thangwi ya kukhala kwathu muna Kirixtu tina cinthu ca kutipasa mphambvu, tina cinthu ca kutimatamiza mwa kufunana, tina cinthu cinatiphataniza mu Nzimu Wakucena, tina cinthu cikulu ca kufunana pontho na kubverana ntsisi,

²dzazani kutsandzaya kwanga, mukhale na ndzeru zibodzi zene, na kufunana kubodzi kwene, na nzimu ubodzi ene pontho na manyerezero mabodzi ene.

³Lekani kucita cinthu na umbirimi peno na kupikuza, mbwenye mucite na kupicepesa, mbamudziwa kuti alipombo anango kupita imwe.

⁴M'bodzi na m'bodzi mbaleke kutsalakana udidi wace ekha basi, mbwenye mbatsalakanembo udidi wa andzace.

⁵Macitiro anu mbakhale mabodzi ene ninga Kirixtu Yezu.

⁶Iye mbali Mulungu, hadatsalakana kuti kukhala sawa-sawa na Mulungu ndi cinthu kuti Iye acikakamire,

⁷mbwenye acepeseka ekha ene, mbadza kacitika n'dzakazi, mbalandana na anthu. Pontho, pakugumanika kwace ninga munthu,

⁸acepesekeratu kakamwe mbakhala wakubvera mpaka kufa, kufa pa ntanda.

⁹Na thangwi eneyo, Mulungu ankuza pikulu kakamwe, pontho mbampasa dzina yakupiringana madzina onsene,

¹⁰toera mabondo onsene ali kudzulu na pantsi, pontho na ali pantsi pa mataka, agodamire dzina ya Yezu,

¹¹pontho anthu onsene alonge pakweca kuti Yezu Kirixtu ndi Mbuya, toera kupasa mbiri Mulungu Baba.

¹²Na tenepo, anyakufunika anga, ninga imwe mwabvera midzidzi yonsene, si pamaso panga basi tayu mbwenye maka-maka cincino mbandiri kutali, phatisani basa upulumuki wanu na kugopa pontho na kutetemera,

¹³thangwi ndi Mulungu anaphata basa muna imwe, pa kufuna na kucita, sawa-sawa ninga munafunira Iye.

¹⁴Citani pyonsene mbamukhonda kudungunya peno kulongana,

¹⁵toera imwe mudze kakhala anthu akukhonda kusandikwa, akulungama pontho na ana a Mulungu akusowa thangwi pakati pa dzindza yakuipa na yakudawa, panayetimira imwe ninga nyenyezi pa dziko,

¹⁶mbamuphatisisa fala ya upulumuki. Na tenepo, pa Ntsiku ya Kirixtu, ine ndinadza kagaya kuti kuthamanga pontho na mphambvu zidacita ine si za pezi tayu.

¹⁷Peno ciropa canga cingathirirwa ninga ntsembe padzulu pa basa idabulukira pa kukhulupira kwanu, ntsembe inapereka imwe kuna Mulungu, ndinakomerwa pontho ndisatsandzaya na imwe monsene.

¹⁸Imwe khalanimbo akukomerwa, pontho mutsandzaye na ine.

¹⁹Ndisadikhira muna Mbuya Yezu kukutumirani Timoti cincino, toera inembo ndikomerwe ndingatambira mphangwa zanu.

²⁰Ine nkhabe munthu unango ana manyerezero mabodzi ene, ananentseka mwakukwana na udidi wa makhaliro anu,

²¹thangwi onsene asasaka udidi wawo, mbakhonda kusaka udidi wa Yezu Kirixtu.

²²Mbwenye imwe musadziwa kuti Timoti anyindirwa, thangwi aphata basa ya Mphangwa Zadidi pabodzi na ine, ninga mwana n'khundu mwa baba wace.

²³Na tenepo, ndiye anadikhira ine kuti ndintume na mwansanga, pakumala kudziwa ninji pinafuna kucitika kuna ine,

²⁴mbandinyindira muna Mbuya kuti na mwansanga ndinadza kabwerambo kweneko.

²⁵Mbwenye ndanyerezera kuti pikhali pyadidi ndikutumireni pontho m'bale wanga Epaforodhitu, ndzanga wa basa, pontho anamenya na ine pabodzi nkhondo, ntumwi adanditumira imwe toera kudza kandiphedza pikhasowa ine.

²⁶Thangwi iye ana citsuwo na imwe monsene, pontho asanentseka na kudziwa kuti imwe mwapibva kuti iye akhabva kupha.

²⁷Ndimo mwene, iye akhabva kupha, dhuzi na kufuna kufa. Mbwenye Mulungu am'bvera ntsisi, si na iye basi tayu, mbwenye abverambo ntsisi na ine ene, toera ine ndikhonde kutsukwala pikulu kakamwe.

²⁸Na thangwi eneyi, ndinati ndintume na mwansanga, toera mungaonana na iye pontho, imwe mutsandzaye, inembo ndipume.

²⁹Pontho ndisakuphembani kuti muntambire muna Mbuya na kutsandzaya konsene, mbamualemedza anthu ninga enewa,

³⁰thangwi iye akhali dhuzi na kufuna kufa na thangwi ya mabasa a Kirixtu, mbakhonda kutsalakana moyo wace toera kundiphedza na pire pikhacimwana imwe kundipasa.