Read cisena Afilipi 3 Bible Online

Afilipi 3 - cisena bible

Afilipi 3

¹Pakumalisa, abale anga, tsandzayani muna Mbuya! Ndisakulemberani pontho kapsa pibodzi-bodzi, ine nkhabe kundinetesa, pontho ndi citsidzikiro kuna imwe.

²Citani mphole na “anambwa’’, citani mphole na enewa anacita kuipa, citani mphole na anyakusibza a uthambi!

³Thangwi ife ndife anyakusibzadi, ife analambira na Nzimu Wakucena, ife anapasika mbiri muna Kirixtu Yezu, pontho ife anakhonda kunyindira pinthu pya nyama,

⁴mbandidziwa pyanga kuti ine ndinawo mathangwi akunyindira pya nyama. Ngakhala alipo munthu ananyerezera na kunyindira pinthu pya nyama, ine ndine akhakwanira kakamwe kunyindira pinthu pya nyama.

⁵Kusibza, ndasibzambo pa ntsiku yacisere pakumala kwanga kubaliwa, ndine wa mbumba ya Izarayeli dzindza ya Bhenjamini, muhebhereu wakukwana, pa Mwambo ndine wa afarisi,

⁶pa thangwi ya kukakamira kutoweza Mwambo, ndikhali munthu wakuzonda abale a gereja. Pa thangwi yakulungama pa Mwambo, ndikhali munthu wakubvera mwakukwana.

⁷Mbwenye pire pikhakhala ninga kuwina kwa ine, ndapiona ndi kuluza, na thangwi ya Kirixtu.

⁸Ande, si penepi basi tayu, mbwenye pa pyonsene ipi ndaona ninga nkhuluza, ndingapilandanisa na nkhombo zikulu kakamwe za kudziwa Kirixtu Yezu, Mbuya wanga, adandiluzisa pinthu pyonsene. Ine ndisapyona ninga khuku, toera ndikwanise kuwina Kirixtu,

⁹pontho ndigumanike muna Iye, mbandikhonda kukhala na kulungama kwanga kokha kunabulukira pa Mwambo, mbwenye kulungama kunabulukira pa thangwi ya kukhulupira Kirixtu, na kulungama kunabulukira kuna Mulungu pontho na pa kukhulupira.

¹⁰Ndisafuna ndidziwe Kirixtu, ndidziwe mphambvu za kulamuka kwace pa kufa, pontho na kuphatana na Iye pabodzi pa nyatwa zace, mbandikhala ninga Iye pa kufa kwace,

¹¹toera na njira zakusiyana-siyana ndikwanise kulamuswa pakati pa anyakufa.

¹²Si kuti ine ndapikwanisa kale pyonsene ipi, peno ndikhadakhala wakukwana tayu, mbwenye ndisathimiza na kupisaka toera ndipikwanise, thangwi ndakwaniswambo na Kirixtu Yezu kuti ndicite penepi.

¹³Abale anga, ine nkhabe kunyerezera kuti ine ene ndapikwanisa, mbwenye cibodzi cinacita ine ndi ici: Kuduwala pinthu pidasala n'nduli, mbindiwangisira kufikira pinthu piri kutsogolo,

¹⁴mbandithimiza kwenda kutsogolo, toera ndikwanise pinafuna ine kuti ndiwine muwoni wa kucemerwa na Mulungu kudzulu muna Kirixtu Yezu.

¹⁵Tonsene ife tidakula mu Nzimu, tisatongwa tipione tenepo pinthu penepi, pontho, ngakhala pa pinthu penepi imwe muna manyerezero anango akusiyana, penepi Mulungu anati akupangizenimbo.

¹⁶Mbwenye mbatifambeni sawa-sawa[3] na mule mudakwanisa ife kale.

¹⁷Abale anga, landirani makhaliro anga na kuphatana, pontho mulang'anise ale ana makhaliro adalandana na makhaliro adakupangisani ife.

¹⁸Thangwi, ninga ndakupangani kale kazinji kene, cincino ndisathimiza kulonga na misozi m'maso, kuti alipo azinji ana makhaliro a anyamalwa a ntanda wa Kirixtu.

¹⁹Kumalisira kwawo ndi kutaika, mulungu wawo ndi mimba zawo, pontho iwo asagaya na pire pinapasa manyadzo. Asanyerezera pinthu pya pantsi pano basi.

²⁰Mbwenye dziko yathu iri kudzulu, ndi kunadikhira ife Mpulumusi, Mbuya Yezu Kirixtu.

²¹Na mphambvu zinancita kuti aikhe pinthu pyonsene pantsi pa utongi wace, Iye anati acinje manungo athu akupwazika, mbakhala sawa-sawa na manungo ace a mbiri.