Read cisena Afilipi 4 Bible Online

Afilipi 4 - cisena bible

Afilipi 4

¹Na tenepo, abale anga akufunika, ndina citsuwo cikulu na imwe. Imwe ndimwe ananditsandzaisa pontho ndimwe nthimba yanga, khalani tenepo dzololo muna Mbuya, imwe anyakufunika.

²Cinaphemba ine kuna Ivodhya na kuna Sintike ndi ca kuti mukhale anthu akubverana muna Mbuya.

³Ndimo mwene, pontho ndisaphemba kuna iwe ndzanga wakunyindirika pa basa,[4] kuti uwaphedze. Thangwi iwo, pabodzi na Kelementi na anango andzanga a pa basa, ndamenya na iwo pabodzi nkhondo pa thangwi ya Mphangwa Zadidi. Iwo madzina awo asagumanika mu Bukhu ya Upulumuki.

⁴Tsandzayani muna Mbuya midzidzi yonsene. Ndisakupangani pontho kuti: Tsandzayani!

⁵Kukhurudzika kwanu mbakukhale kwakudziwika na anthu onsene. Mbuya ali dhuzi.

⁶Lekani kunentseka na cinthu, mbwenye pa pyonsene phembani kuna Mulungu na miphembero na kudembetera, pontho na kupereka takhuta.

⁷Pontho ntendere wa Mulungu unapiringana manyerezero onsene unati ukoye mitima yanu na ndzeru zanu muna Kirixtu Yezu.

⁸Pakumalisira abale anga, pyonsene pya ndimo mwene, pyonsene pyakulemedzeka, pyonsene pyakulungama, pyonsene pyakucena, pyonsene pyakufunika, pyonsene pyakupasa mbiri yadidi, ngakhala kuna cinthu cadidi, peno cinthu cakusimbwa, nyerezerani pinthu penepi.

⁹Piphatiseni basa pyonsene pinapfundza imwe, pidatambira imwe, pidabva imwe na pidaona imwe kuna ine. Tenepo Mulungu wa ntendere anakhala na imwe.

¹⁰Ndisatsandzaya pikulu kakamwe muna Mbuya, thangwi cincino imwe mwatoma pontho kunditsalakana. Ndimo mwene, imwe mukhanditsalakana kale, mbwenye mukhasowa n'dzidzi wakupipangisa.

¹¹Ndisalonga penepi sikulongera kuti ndasowa pinthu tayu, thangwi ndadzowerera kutsandzaya na makhaliro onsene akusiyana-siyana.

¹²Ine ndisadziwa kusowa ndi ninji, pontho ndisadziwa kukhala na pizinji ndi ninji. Ndadzowerera kukhala wakutsandzaya pa makhaliro onsene akusiyana-siyana, peno pa kukhuta peno pakukhala na njala, peno pakukhala na pinthu pizinji, peno pakusowa pinthu.

¹³Pyonsene ndisapikwanisa na mphambvu za ule anandiwangisa.

¹⁴Mbwenye imwe mwacita pyadidi pa kundiphedza pa nyatwa zanga.

¹⁵Imwe anthu a ku nzinda wa Filipi, ninga musadziwa kale, pakutoma kwa Mphangwa Zadidi, pidabuluka ine ku dziko yanu ya Masedhonya nkhabe abale a gereja ibodzi idandiphedza, pakupasa peno pakutambira. Ndimwe basi anandiphedza.

¹⁶Thangwi pikhakhala ine ku Tesalonika, imwe mwandiphedza na pire pikhasowa ine, si kabodzi basi tayu.

¹⁷Sikulongera kuti ine ndisafuna muwoni wanu tayu, mbwenye ndisasaka nsapu wakuthimizira nkhombo zanu.

¹⁸Ndatambira pyonsene, pontho pina ine pyapiringana pire pikhafunika. Kusowa kwanga kwamaliratu cincino, pidatambira ine miyoni yanu idanditumizira imwe na Epaforodhitu. Ndi muwoni wakununkhira, ntsembe yakutawirirwa na Mulungu mbakomerwa nayo.

¹⁹Pontho Mulungu wanga, anati amalise kusowa kwanu konsene, kubulukira mu upfumi wa mbiri yace muna Kirixtu Yezu.

²⁰Mulungu wathu pontho na Baba wathu mbapaswe mbiri kwenda na kwenda, Ameni.

²¹Mbiyende kawange mbumba ya Mulungu yonsene muna Kirixtu Yezu. Abale ana ine kuno, asakuwangisani.

²²Mbumba ya Mulungu yonsene isakuwangisani, maka-maka abale ali ku nyumba kwa mambo Sezari.

²³Kukoma ntima kwa Mbuya Yezu Kirixtu mbakukhale na nzimu wanu.[5]