Read cisena Akolosi 2 Bible Online

Akolosi 2 - cisena bible

Akolosi 2

¹Ndisafuna mudziwe nkhondo yonsene inagwa ine na thangwi yanu, pontho kuna ale ali ku nzinda wa Laudhiseya na kuna ale onsene anakhonda kudziwa nkhope yanga.

²Ndisawangisira toera iwo akhale na mphambvu muntima mwawo, akhale akuphatana pa kufunana, pontho toera akwanise mpfuma yonsene ya ndzeru zakukwana, toera adziwe cinthu cakubisala ca Mulungu. Cinthu ceneci ndi Kirixtu.

³Mpfuma zonsene za udziwisi na za kudziwa zabisalika muna Iye.

⁴Ine ndisakupangani penepi toera akhonde kuoneka munthu wa kukunyengezani na mafala adidi, mbwenye mbakhala authambi.

⁵Thangwi ine ndisapidziwa kuti ndiri kutali na imwe, mbwenye mu nzimu tiri pabodzi, pontho ndiri kutsandzaya na kuona makhaliro anu akubverana na kulimira kwa cikhulupiro canu muna Kirixtu.

⁶Na tenepo, ninga kutambira kudacita imwe Kirixtu Yezu, Mbuya, nyanyani kukhala muna Iye,

⁷mbamukhala na michici pontho na kukula muna Iye, mbamulimira pa kukhulupira ninga mudapfundzisirwa imwe, mbamukhala na kupereka takhuta kukulu.

⁸Citani mphole kuti pakhonde kuoneka munthu wakukucitani udzakazi wa udziwisi wa pezi wa uthambi, unabulukira pa mitemo ya anthu pontho na pipfundzo pya anthu a dziko ino,[5] mbapikhonda kubulukira muna Kirixtu.

⁹Thangwi umulungu onsene usagumanika m'manungo mwa Kirixtu,

¹⁰pontho imwe ndimwe akukwana muna Iye. Iye ndi nsolo wa mphambvu na utongi onsene.

¹¹Muna Iye, imwe mwasibzambo, si kusibza kudacitwa na manja a anthu tayu, mbwenye ndi kusibza kudacitwa na Kirixtu, ndiko kubuluswa kwa manungo a nyama.[6]

¹²Penepi pyacitika pakutambiriswa kwanu batixmu, pa n'dzidzi udaikhwa imwe n'nthumbi pabodzi na Kirixtu, pontho na Iye mwalamuswa pa kufa, na thangwi ya kukhulupira mphambvu za Mulungu adamulamusa pakati pa anyakufa.

¹³Kuna imwe mukhadafa na thangwi ya kudawa kwanu pontho na thangwi yakukhonda kusibza kwanu pa nyama, Mulungu akupasani upulumuki pabodzi na Kirixtu. Iye atilekerera kudawa kwathu konsene,

¹⁴pontho afudza mangawa akhadalembwa, akhakhala ninga mitemo yakukhonda kubverana na ife. Iye aabulusa mbaakhomera pa ntanda,

¹⁵pontho, pakumala kutapata mphambvu na utongi wa mizimu, aapasa manyadzo pamaso pa anthu onsene, mbaakunda pakukhomerwa kwace pa ntanda.

¹⁶Na tenepo, lekani kusiya munthu m'bodzi mbakutongani na pinthu pinadya imwe peno na pinamwa imwe, peno na thangwi ya maphwandu anango a anthu akuphembera peno na maphwandu a mitemo ya kubalwa kwa mwezi, peno na ya ntsiku ya Sabudu.

¹⁷Pinthu penepi ndi pithundzi-thundzi pya pire pikhafuna kudza. Pithundzi-thundzi penepi pisalongera Kirixtu.

¹⁸Lekani kusiya kuti munthu na kufuna kwace kupangisa kucepeseka kwakusangizira pontho na kulambira kwace maanju, akupingizeni kutambira muwoni. Munthu unowu asalonga cibodzi na cibodzi pidaoneswa iye[7] mu nzimu, pontho manyerezero ace a munyama asancita kuti akhale wakupikuza papezi.

¹⁹Ndi munthu adakhonda kuphatana na Nsolo, kubulukira pa Nsolo unowu, manungo onsene asakoiwa mbaphatanizwa na mphindo na m'mafunyiro, mbakula na makuliro anabuluka kuna Mulungu.

²⁰Ngakhala imwe mwafa pabodzi na Kirixtu pa pinthu pya pipfundzo pya anthu a dziko ino, thangwi yanji musakhala ninga muli n'dziko, mbamubvera pontho mitemo ninga ixi:

²¹“Leka kuphata ipi!” “Leka kulawira ipi!” “Leka kukhuya ipi!”

²²Pinthu pyonsene ipi pingaphatiswa basa pisamala, thangwi pisabulukira pa mitemo na pipfundzo pya anthu.

²³Mitemo eneyo ungaiona isakhala ninga ndi udziwisi, isakhala ninga ndi pinthu pyawo pyakulambira napyo Mulungu, kusangizira kupicepesa, pontho na kuonesa nyatwa manungo, mbwenye penepi nkhabe basa ibodzi inaphedzera ipyo toera kukunda kusirira kwa nyama.