Read cisena Akolosi 3 Bible Online

Akolosi 3 - cisena bible

Akolosi 3

¹Na tenepo, ngakhala mwalamuswa pa kufa pabodzi na Kirixtu, sakani pinthu pya kudzulu, kule kunakhala Kirixtu ku khundu ya nkono wa madyo wa Mulungu.

²Khalani na manyerezero a pinthu pya kudzulu, mbamusiya pinthu pya pantsi pano.

³Thangwi imwe mwafa, apo cincino upulumuki wanu wabisalika pabodzi na Kirixtu muna Mulungu.

⁴Kirixtu, upulumuki wanu,[8] angapangizika pakweca, imwembo munadza kapangizikambo na Iye mu mbiri yace.

⁵Na tenepo, phaani pyonsene pyakuipa pya makhaliro anu akale a padziko, ninga: pyalukwali, pyakuzuda, pyakusirira, pyakufuna kuipa, na ntima wakufunisisa pinthu, ndiko kulambira alungu apezi.

⁶Ndi thangwi ya penepi pyonsene pinaipirwa na Mulungu kuna ale anakhonda kubvera.

⁷Pinthu penepyo ndipyo pikhacitambo imwe kale ene pa n'dzidzi ukhakhala imwe n'kati mwa pinthu penepyo.

⁸Mbwenye cincino siyani pyonsene ipi ninga: Kuipirwa, ukali, kukoya pyakuipa muntima, kutikana na makani akupasa manyadzo pa malongero anu.

⁹Lekani kulongerana uthambi m'bodzi na m'bodzi, thangwi imwe mwabulusa kale munthu wakale[9] na macitiro ace ene,

¹⁰pontho mwabvala munthu mupsa, anakhala mbasasanyirwa papsa pa udziwisi, mbalandaniswa na ule Adancita.

¹¹Pa makhaliro enewa mapsa, nkhabe kudza kasiyana n'djuda na ule adakhonda kukhala n'djuda, adasibza na ule adakhonda kusibza, anthu akudza na anthu a ku dziko ya Sita,[10] n'dzakazi na ntumbe. Mbwenye Kirixtu ndiye pyonsene pontho ali muna onsene.

¹²Na tenepo, ninga anyakusankhulwa a Mulungu, mbumba ya Mulungu na akufunika, khalani na ntsisi zikulu, na udidi, na kupicepesa, na kupipoloza pontho na kupirira.

¹³M'bodzi na m'bodzi aphate ntima angaipisirana na ndzace mbamulekererana pyakuipa pidacitirana imwe. Lekereranani ninga Mbuya[11] akulekereranimbo.

¹⁴Mbwenye pa pyonsene ipi, khalanimbo na ntima wa kufunana. Ndiyo pfundo inakumangani mwakukwana.

¹⁵Pontho kuti ntendere wa Kirixtu utonge n'kati mwa mitima yanu. Thangwi imwe mwacemerwa toera mukhale na ntendere, ninga mapindi a manungo mabodzi basi, mbamupereka takhuta.

¹⁶Fala ya Kirixtu mbidzale na kutaikira muna imwe. Pfundzisanani mbamulangana m'bodzi na m'bodzi na udziwisi onsene, mbamuimba masalimu, na nyimbo za kukuza nazo Mulungu, pontho na nyimbo za mu nzimu, mbamupereka takhuta kuna Mulungu na muntima mwanu.

¹⁷Pyonsene pinacita imwe, peno na mafala peno na mabasa, piciteni na dzina ya Mbuya Yezu, mbamupereka takhuta kubulukira muna Iye kuna Mulungu Baba.

¹⁸Imwe akazi, bverani amuna anu ninga pinafunika kuna ale ali muna Mbuya.

¹⁹Imwe amuna, funani akazi anu mbamukhonda kualongera na ukali.

²⁰Imwe ana, bverani ababa anu na amai anu pa pyonsene, thangwi penepi ndipyo pinakomerwa na Mbuya.

²¹Imwe ababa, lekani kusosa ana anu kuti aipirwe, toera akhonde kumala mphambvu.

²²Imwe adzakazi, bverani a mbuya anu a pantsi pano pa pyonsene. Lekani kuabvera pamaso pawo basi tayu toera akusimbeni, mbwenye abvereni na ntima onsene, mbamugopa Mbuya.

²³Pyonsene pinacita imwe, citani na ntima onsene, ninga musacitira Mbuya, mbamukhonda kuona ninga musacitira anthu,

²⁴mbamudziwa kuti Mbuya ndiye anafuna kudza kakupasani unthaka ninga m'bairo wanu. Anaphatira imwe basa, ndiye Kirixtu Mbuya.

²⁵Anacita pinthu pyakukhonda kulungama, anadza katambirambo pinthu pyakukhonda kulungama pidacita iye, pontho Mulungu nkhabe kudza kalang'ana nkhope ya munthu.