Read cisena 1 Atesalonika 2 Bible Online

1 Atesalonika 2 - cisena bible

1 Atesalonika 2

¹Abale, imwe ene musadziwa kuti ulendo wathu udacita ife kudza kakuonani, si wa pezi tayu.

²Imwe musadziwa kuthabuswa na kuoneswa nyatwa kudacitwa ife ku nzinda wa ku Filipi, mbwenye ife na kuphebza na Mulungu, takwanisa kukhala na cipapu ca kukumwazirani Mphangwa Zadidi za Mulungu, pakati pa kuidiwa kukulu.

³Thangwi kukucenjezani kwathu kudabulukira pa kudodomeka, peno pa manyerezero a kuipa, peno pa kusaka kukunyengezani tayu,

⁴mbwenye ninga anthu adatawirirwa na Mulungu kuti tinyindirwe Mphangwa Zadidi, nkhabe kuzilongera toera tisimbwe na anthu tayu, mbwenye na Mulungu analang'ana mitima yathu.

⁵Imwe musadziwa mwadidi mwene kuti cipo talonga mafala akutapira toera kukunyengezani, peno kusaka kukudhobhani pinthu pyanu. Mulungu ndiye m'mboni wathu.

⁶Pontho tiri kusaka kupaswa mbiri na anthu tayu, peno na imwe peno na anango.

⁷Ife ninga apoxtolo a Kirixtu tikhakwanira kukuphembani pinthu. Mbwenye takhala anthu akukhurudzika[4] pakati panu, sawa-sawa ninga mai analera ana ace.

⁸Na tenepo, na kukufunani kukulu, tanyerezera kuti tikhonde kukupasani Mphangwa Zadidi za Mulungu basi, mbwenye pontho tikupasenimbo na moyo wathu ene, thangwi imwe mwadza kakhala anthu akufunika kakamwe na ife.

⁹Abale, ndimo mwene, imwe musakumbuka basa yathu yakuwanga, na kuneta kwathu. Taphata basa masiku na masikati toera tikhonde kulemera munthu, pa midzidzi ikhakumwazirani ife Mphangwa Zadidi za Mulungu.

¹⁰Imwe, pabodzi na Mulungu, ndimwe amboni a makhaliro athu adidi na akulungama na akukhonda kusandikwa pakati panu, imwe anyakutawira.

¹¹Thangwi imwe musadziwa macitiro athu kuna m'bodzi na m'bodzi ninga pinacita baba kuna ana ace,

¹²asaalanga, asaamatamisa pontho asaasandika toera imwe mufambe ninga munafuna Mulungu, adakucemerani mu Umambo wace na mu mbiri yace.

¹³Pontho tisapereka takhuta kuna Mulungu mbatikhonda kuneta na thangwi ya kuti pakutambira kwanu kuna ife fala ya Mulungu, imwe mwaitawira, si ninga fala ya anthu tayu, mbwenye ninga faladi ya Mulungu, inaphata basa muna imwe adatawira.

¹⁴Thangwi imwe abale, mwakhala sawa-sawa na magereja a Mulungu muna Kirixtu Yezu, ale ali ku Djudeya. Thangwi kuoneswa nyatwa kudacita imwe na andzanu a dziko ibodziyene, ndi sawa-sawambo na pidacitika na abale anyakutawira adaoneswa nyatwa na andzawo a ku Djudeya,

¹⁵ale adapha Mbuya Yezu na maporofeta pontho iwo atizondambo. Iwo nkhabe kutsandzaisa Mulungu pontho ndi anyamalwa a anthu onsene,

¹⁶mbacita mphambvu zonsene toera kutipingiza kuti ife tikhonde kulonga kuna ale adakhonda kukhala madjuda, toera enewa akhonde kupulumuswa. Na tenepo, asainjipisiratu basi madawi awo. Mbwenye pakumalisira, kuipirwa kwa Mulungu kwaagwera.

¹⁷Mbwenye ife, abale anga, tamwazana na imwe pa nkhope n'dzidzi ung'ono, mbwenye si muntima tayu. Tisawangisira kakamwe toera tikuoneni nkhope na nkhope, na thangwi ya citsuwo cina ife na imwe.

¹⁸Tikhafuna kudza kakuonani. Ine ene Paulu ndapifuna, si kabodzi basi tayu. Mbwenye Sathani atipingiza.

¹⁹Thangwi ndi cipi cidikhiro cathu, ndi cipi cinafuna kutitsandzayisa peno nthimba inafuna kutipasa mbiri patsogolo pa Mbuya Yezu pakubwera kwace? Kodi simwe tayu?

²⁰Ndimo mwene, imwe ndimwe mbiri yathu na kutsandzaya kwathu.