Read cisena 2 Atesalonika 1 Bible Online

2 Atesalonika 1 - cisena bible

2 Atesalonika 1

¹Ine Paulu, pabodzi na Silivano, na Timoti, ndisalembera abale a gereja ya ku Tesalonika, muna Mulungu Baba wathu, pontho na muna Mbuya Yezu Kirixtu.[1]

²Kukoma ntima na ntendere unabulukira kuna Mulungu Baba, na kuna Mbuya Yezu Kirixtu, mbapikhale na imwe.

³Abale anga, tisatongwa kupereka takhuta midzidzi yonsene kuna Mulungu pa thangwi yanu. Penepi ndi pyadidi, thangwi cikhulupiro cina imwe cisakuliratu kakamwe, pontho kufunana kwanu monsene m'bodzi na m'bodzi, kusakuleratu kakamwe.

⁴Na thangwi eneyo, tisagaya na imwe pakati pa abale a magereja a Mulungu, thangwi ya kuwangisira kwanu pontho na cikhulupiro canu cinapangisa imwe pakuzondiwa konsene, na pa nyatwa zonsene zinapirira imwe.

⁵Penepyo pisapangisa kutonga kwakulungama kwa Mulungu, toera mukhale anthu akukwanira mu Umambo wa Mulungu, unowu unaonerambo imwe nyatwa.

⁶Mphyakulungama kuna Mulungu kubwezera nyatwa ale anakuonesani nyatwa,

⁷pontho mbapasa kupuma kuli imwe munathabuswa, pontho na ifeenembo. Penepyo pinacitika Mbuya Yezu angaonekera kudzulu, pabodzi na maanju ace a mphambvu,

⁸pakati pa malirimi a moto, toera kuonesa nyatwa ale anakhonda kudziwa Mulungu, pontho mbakhonda kubvera Mphangwa Zadidi za Mbuya wathu Yezu.

⁹Iwo anaoneswa nyatwa za kufudziwa kwenda na kwenda, nyatwa zakukhala kutali na nkhope ya Mbuya, pontho kutali na mbiri ya mphambvu yace.

¹⁰Penepyo pinadza kacitika ntsiku inafuna kudza kabwera Iye toera kudza kapaswa mbiri n'kati mwa mbumba yace, pontho mbadzumisa kuna onsene adantawira, pabodzi na imwembo adatawira umboni wathu.

¹¹Na thangwi eneyo, tisakuphembereranimbo midzidzi yonsene, toera Mulungu wathu akuciteni kuti mukhale anthu akukwanira kukhala mudacemererwa imwe, pontho, na mphambvu zace, mukwanise kucita udidi onsene unafuna imwe, pontho na mabasa onsene anabulukira pa cikhulupiro.

¹²Na tenepo, dzina ya Mbuya wathu Yezu inapaswa mbiri muna imwe, imwembo munapaswa mbiri muna Iye, ninga kukoma ntima kwa Mulungu wathu na kwa Mbuya Yezu Kirixtu.