Read cisena 1 Timoti 4 Bible Online

1 Timoti 4 - cisena bible

1 Timoti 4

¹Nzimu Wakucena usalonga pakweca kuti pa midzidzi yakumalisa anthu anango anasiya kukhulupira, mbatowerera mizimu yakunyengerera na pipfundzo pya mizimu ya kuipa.

²Pipfundzo penepi pisabuluka kuna anthu anyakunyengeza na anyauthambi, ana manyerezero awo a muntima akumala kupya na makala a moto,

³mbakhondesa anthu kucita mabanja na kudya pinthu pidacita Mulungu, toera pitambirwe mbapiperekerwa takhuta na ale anatawira pontho mbadziwa pya ndimo mwene.

⁴Thangwi pyonsene pidacita Mulungu ndi pyadidi, nkhabe cibodzi cinafuna kukhondeswa cingaperekerwa takhuta,

⁵thangwi cisaceneswa na fala ya Mulungu pontho na m'phembero.

⁶Iwe ungaapfundzisa abale pinthu penepi, unakhala nyabasa wadidi wa Kirixtu Yezu, mbudyeswa na mafala a cikhulupiro, pontho na cipfundzo cadidi cinatowerera iwe.

⁷Mbwenye ukhonde pithankano pyakusowa basa kuna Mulungu pontho na pya udzemwa,[4] mbukhala na nsambo wakudzowerera kulemedza Mulungu.

⁸Thangwi ungakhala na nsambo wa kudzowereza kucita pinafuna manungo, pisaphedzera pang'ono basi. Mbwenye pyakuphembera Mulungu, pisaphedzera pa pinthu pyonsene, thangwi pina cidumbiriro ca upulumuki wa cincino na unafuna kudza.

⁹Iyi ndi fala yakunyindirika pontho ndi yakukwanira kutawirirwa konsene.

¹⁰Ngakhala tisaphata basa mbatigwa nkhondo, ndi thangwi taikha cidikhiro cathu muna Mulungu wa m'maso, Mpulumusi wa anthu onsene, maka-maka wa anyakutawira Yezu.

¹¹Apange, pontho uwapfundzise pinthu penepi.

¹²Mbapaleke kuoneka munthu wakukupwaza na thangwi yakukhala m'phale, mbwenye cita kuti ale anyakutawira Yezu akwanise kukutoweza makhaliro ako adidi, pa fala, pa macitiro, pa kufunana, pa kukhulupira pontho na pa kulungama.

¹³Mpaka kubwerera kwanga, khala mbuona Bukhu ya Mulungu mbulonga pakweca kuna abale, mbukhalanga na kupfundzisa.

¹⁴Leka kupwaza muwoni udapaswa iwe na mafala a ciporofeta mbuyikhwa manja na nsoka wa atsogoleri.

¹⁵Nyerezera pinthu ipi. Khala mbucita penepi basi, toera anthu onsene aone kukula kwako mu nzimu.

¹⁶Ucite mphole na makhaliro ako na pinapfundzisa iwe. Wangisira pa pinthu penepi, thangwi ungacita penepi, pinapulumusa iwe na ale ene anakubva.