Read cisena 2 Timoti 4 Bible Online

2 Timoti 4 - cisena bible

2 Timoti 4

¹Ndisakupanga pamaso pa Mulungu na pa Kirixtu Yezu, anafuna kudza katonga ali m'maso na akufa, pakupangizika kwace na pa Umambo wace, kuti:

²Mwaza fala, khala mbudasasanyira, pa n'dzidzi wadidi peno pa n'dzidzi wakuipa, asandike, apokanyise, alange mbuapfundzisa na kukhurudzika konsene.

³Thangwi unafika n'dzidzi unafuna kukhonda iwo mapfundzisiro adidi. Mbwenye na kubva ninga kunyangulwa m'makutu, anasaka apfundzisi awo, ninga munapifunira iwo.

⁴Iwo anadza kakhonda kubvera pya ndimo mwene, mbatowerera pyapezi.

⁵Mbwenye iwe, pa pyonsene ipi, pfulika, pirira pa nyatwa, cita basa ya kumwaza Mphangwa Zadidi, mbutoweza mwadidi basa yako.

⁶Mbwenye ine ndiri kuperekwa ninga ntsembe. N'dzidzi wanga wa kwenda uli dhuzi.

⁷Ndamenya nkhondo yadidi, ndamalisa mapika a kuthamanga, ndakoya cikhulupiro.

⁸Cincino ndakoyerwa nthimba yakulungama inafuna kundipasa Mbuya, Ntongi Wakulungama wa miseru, pa ntsiku eneyo. Pontho sine basi tayu, mbwenye na onsene ale anakomerwa na kubwera kwace.

⁹Saka kuti udze kuna ine na mwansanga.

¹⁰Thangwi Dhema, na kufuna dziko ino, andithawa mbaenda ku Tesalonika. Kerexisente aenda ku Galasya, pontho Titu aenda ku Dhalamasya.

¹¹Adasala na ine ndi Luka basi. Bwera pabodzi na Marku, thangwi iye ndi wadidi pa basa kuna ine.

¹²Pontho Tikiku ndantuma kwenda ku Efesu.

¹³Iwe ungabwera, bweresa kapoti wanga adasiya ine ku Thorowadhi pa nyumba ya Karipu, na mabukhu anga, maka-maka ale a nthembe.

¹⁴Alixande, nyakukhoma migoro, andicitira pyakuipa pizinji. Mbuya anam'bwezera na pire pidacita iye.

¹⁵Iwe citambo mphole na iye, thangwi akhapokanya pikulu kakamwe mafala athu.

¹⁶Ntsiku yakutoma idatawira ine mathangwi adandipambazira iwo, nkhabe m'bodzi adabulukira toera kundiphedza, mbwenye onsene amala kundithawa. Mulungu mbaleke kuapasa thangwi na penepi.

¹⁷Mbwenye Mbuya akhala na ine mbandipasa mphambvu, toera kuti ine ndilonge mphangwa mwakukwana, pontho, onsene adakhonda kukhala madjuda azibve. Na tenepo, ine ndapulumuswa n'kanwa mwa nkhalamu.

¹⁸Mbuya anandipulumusa pa mabasa onsene a kuipa pontho mbandikwata wakulungama kwenda ku Umambo wace wa kudzulu. Mbiri mbikhale na iye kwenda na kwenda. Ameni.

¹⁹Mbawange Pirisila, na Akila, na mudzi wa Oneziforu.

²⁰Eraxtu asala ku Korintu, mbwenye Torofimu ndansiya ali kubva kupha ku Miletu.

²¹Saka kuti udze n'dzidzi wa khoni mbudzati kufika. Ebhulu, Purudhenti, Linu, Kalaudhya na abale onsene asakuwangisani.

²²Mbuya mbakhale na nzimu wako. Kukoma ntima kwa Mulungu mbakukhale na imwe.