Read cisena Titu 1 Bible Online

Titu 1 - cisena bible

Titu 1

¹Ine Paulu, bichu wa Mulungu, pontho mpoxtolo wa Yezu Kirixtu[1] toera ndiphedze kuwangisa cikhulupiro ca anyakusankhulwa a Mulungu, pontho adziwe undimo mwene unafikisa pa cilemedzo ca kuphembera,

²pa cikhulupiro pontho na kudziwa kunabulukira pa cidikhiro ca upulumuki wakukhonda kumala, udatipikirira Mulungu wakukhonda kulonga uthambi, kutomera midzidzi ya kale na kale.

³Mbwenye pa kukwana n'dzidzi wace, apangisa fala yace pakweca, kubulukira pa kumwazwa kwa fala idanyindirwa ine, pa kutumwa na Mulungu Mpulumusi wathu.

⁴Ndisalembera iwe Titu mwana wangadi mwakukhulupira kwathu tonsene. Kukoma ntima na ntendere wa Mulungu Baba, na wa Kirixtu Yezu Mpulumusi wathu, mbukukhale na iwe.

⁵Thangwi idakusiyira ine ku Kereta, ndi ya kuti iwe usasanyire pinango pikhadasala, pontho wende mbuyikha akulu nzinda ubodzi na ubodzi, ninga mudakupangira ine.

⁶Pisafunika kuti nkulu akhale munthu wakukhonda kusandikwa, akhale na nkazi m'bodzi basi, akhale na ana akutawira Yezu, akukhonda kupambazirwa pyakuipa, peno akukhonda kubvera.

⁷Pontho na thangwi yakukhala muonereri wa basa ya Mulungu, pisafunika kuti n'tsogoleri akhale wakukhonda kusandikwa, wakukhonda kupikuza, wakukhonda cimbiza na kuipirwa, wakukhonda kukundwa na vinyu, wakukhonda kukhala nyanthonga, pontho akhonde kukhala munthu wakusirira kobiri.

⁸Mbwenye pisafunika kuti akhale munthu wakutambira alendo, xamwali wa udidi, wakukhurudzika, wakulungama, wakulemedza pyakuphembera, pontho akhale munthu wakuphata ntima.

⁹Pontho asafunika kuti akhale dzololo pa fala yakunyindirika, ninga mudapfundzisirwa iwo, toera akwanise kupasa cipapu andzace na cipfundzo cakulungama, akwanise kupokanyisa ale anaikhonda.

¹⁰Thangwi alipo azinji akukhonda kubvera, anyakulonga pya pezi na pya kunyengerera, maka-maka ale a nsoka wa anyakusibza.

¹¹Pisafunika kuti iwo amatamiswe, thangwi iwo ali kwenda mbafudza midzi ya anthu, mbapfundzisa pinthu pinakhonda kwanira kupfundziswa, pyonsene toera kuwina kobiri.

¹²M'bodzi wa maporofeta awo ene, afikira kulonga tenepa: “Anthu a ku Kereta mbauthambi, akhala ninga pinyama pya n'tsanga, anyakudyesa pontho mbanyakupolola.”

¹³Pidalongiwa ndipyodi. Na tenepo, asandike anthu enewa na mphambvu, toera awange pa cikhulupiro cawo,

¹⁴pontho lekani kutsalakana pithankano pinalonga madjuda peno mitemo ya anthu anakhonda undimo mwene.

¹⁵Kuna anthu adaceneswa, pinthu pyonsene pyaceneswa. Mbwenye kuna anthu adakhonda kuceneswa na adakhonda kutawira Yezu, nkhabe cinthu cidaceneswa. Ndimo mwene, kuna anthu enewa, ndzeru zawo na manyerezero awo onsene a muntima, mbakuipa.

¹⁶Iwo asalonga kuti asadziwa Mulungu, mbwenye na mabasa awo asan'khonda. Ndi anthu akunyanyasa, nkhabe kubvera, pontho asacimwana kucita basa yonsene yadidi.