Read cisena Hebhereu 11 Bible Online

Hebhereu 11 - cisena bible

Hebhereu 11

¹Lang'anani, kukhulupira ndi kukhonda kupenula pire pinadikhira ife, pontho ndi undimo mwene wa pinthu pire pinakhonda kuona ife.

²Thangwi na kukhulupira, anthu akale asimbwa na Mulungu.

³Na kukhulupira, tisadziwa kuti dziko yonsene yacitwa na fala ya Mulungu. Na tenepo, pire pinakwanisa kuoneka, pyacitwa na pire pinakhonda kuoneka.

⁴Na kukhulupira, Abheli apereka ntsembe ikulu kuna Mulungu kupiringana ya Kainu. Na kukhulupira, iye asimbwa ninga wakulungama, pa kutambirwa kwa ntsembe yace na Mulungu. Iye afa, mbwenye na kukhulupira kwace, na lero ali kulonga.

⁵Na kukhulupira, Enoki akwatwa wa m'maso kuti akhonde kufa. “Pontho hadadza kaonekabve tayu, thangwi Mulungu akhadankwata.” Thangwi mbadzati kukwatiwa, asimbwa kuti iye atsandzaisa Mulungu.

⁶Cingasoweka cikhulupiro, nkhabe kwanisika tsandzaisa Mulungu, thangwi ule anafendedzera kuna Iye, asafunika atawire kuti Mulungu alipo, pontho kuti Iye asapasa m'bairo ale anansaka.

⁷Na kukhulupira, Nowa, pa kucenjezwa kwace mu Nzimu pa pinthu pikhafuna kudza kacitika, na kugopa kwace Mulungu, asasanya Arika toera kupulumusa mudzi wace. Na kukhulupira, iye akonesa dziko pontho adza kakhala mwanacinthu unthaka wakulungama kudabuluka pa cikhulupiro.

⁸Na kukhulupira, Abharaamu mudacemerwa iye na Mulungu, abvera mbaenda ku mbuto ya unthaka ikhafuna kudza kapaswa iye, mbakhonda dziwako ndi kupi kukhaenda iye.

⁹Na kukhulupira, Abharaamu atama mbaenda kakhala ku dziko idapikirirwa iye, mbakhala m'makumbi ninga munthu wakudza pabodzi na Izaki na Djakobo, ale akhadadumbirirwambo unthaka pabodzi na iye.

¹⁰Thangwi iye akhadikhira nzinda wakutsidzikirwa na machikwa akuwanga, kuti nyakutanda na nyakumanga nzinda unowu ndi Mulungu.

¹¹Na kukhulupira, Abharaamu na iyenembo Sara, na kukhonda kubala kukhali na iye, pontho na kukalamba kukhali na iye, apaswa mphambvu za kubala mwana-mamuna, thangwi iye akhanyindira ule akhadampikirira.

¹²Na tenepo, pa munthu unowu m'bodzi, wa kuti akhali nkhabebve mphambvu, adza kabalwa madzindza mazinji ninga nyenyezi za kudzulu, pontho mbacimwana kulengeseka ninga checa ya m'bara.

¹³Onsene awa afa mbakhakhulupira, mbacimwana kutambira pire pidapikirirwa iwo. Mbwenye iwo apyona na kutali mbakomerwa napyo, mbacita umboni kuti ndi anthu akudza pontho ndi anyakutama pa dziko.

¹⁴Analonga tenepa asapangisa kuti asasaka dziko yakukhala.

¹⁵Mbidakhala akhainyerezera dziko ire idabuluka iwo, mbadakwanisa kubwererako pontho.

¹⁶Mbwenye iwo akhadikhira na kukomerwa, dziko yadidi kakamwe, uku nkhubveka kuti: akhadikhira dziko yakubuluka kudzulu. Na thangwi eneyo, Mulungu nkhabe kukhala na manyadzo angacemerwa Mulungu wawo, pontho Iye aasasanyira nzinda.

¹⁷Na kukhulupira, Abharaamu mudaleserwa iye na Mulungu, apereka Izaki ninga ntsembe. Ule akhadapikirirwa, akhadamala kusasanyika kuti apereke mwana wace m'bodzi ekha basi,

¹⁸pakumala kupangwa kale na Mulungu kuti: “Dzindza yako inabulukira kuna Izaki.”

¹⁹Abharaamu akhatawira kuti Mulungu ana mphambvu za kulamusa anyakufa, peno tilonge kuti, ampaswa pontho Izaki ninga mwana wakulamuswa pa kufa.

²⁰Na kukhulupira, Izaki apasa nkhombo Djakobo na Izauu, pa thangwi ya makhaliro awo akutsogolo.

²¹Na kukhulupira, Djakobo, mukhali iye dhuzi na kufuna kufa, apasa nkhombo ana a Zuze, m'bodzi na m'bodzi. Iye atsamira pa ntsonga ya mpsimbo yace, mbalambira Mulungu.

²²Na kukhulupira, Zuze, mukhafuna iye kufa, alonga pa thangwi ya kubuluka kwa ana a Izarayeli mu Idjipitu, pontho mbaapanga pikhafuna kucita iwo na magogodo ace.

²³Na kukhulupira, Mozesi, iye mbali khombwani, abisiwa myezi mitatu na babace na mace, thangwi iwo amuona kuti mwana ndi wakubalika, pontho mbakhonda kugopa ntemo ukhadalonga mambo.

²⁴Na kukhulupira, Mozesi mbali nkulu kale, akhonda kucemerwa mwana wa mwanace Farau wa nkazi,

²⁵mbatawira pyace kuthabuswa pabodzi na mbumba ya Mulungu, kupiringana kutsandzaya pa n'dzidzi ung'ono basi na pyakudawa.

²⁶Mozesi, aona kupwazwa kwa Kirixtu ninga mpfuma ikulu kupiringana mpfuma ya mu Idjipitu, thangwi akhalang'anisa m'bairo wace kudzulu.

²⁷Na kukhulupira, abuluka mu Idjipitu mbakhonda kugopa kuipirwa kwa mambo, mbakhala na phinga thangwi akhaona Ule akhacimwana kuoneka.

²⁸Na kukhulupira, Mozesi acita phwandu ya Paxkwa, mbakhwaza ciropa m'misuwo, toera nyakupha akhonde kufika kuna ana a utombo a Izarayeli.

²⁹Na kukhulupira, mbumba ya Izarayeli yawambuka Bara Yakufuira, ninga ali kufamba pa ntunda. Mbwenye ana a mu Idjipitu mukhafuna leserambo iwo kupicita, amala kufa na madzi.

³⁰Na kukhulupira, ana a Izarayeli amala ntsiku zinomwe mbakhazungulira nzinda wa Djeriko, mipanda ya nzinda mbigomoka.

³¹Na kukhulupira, Raabhi nkazi wa lukwali, aatambira mwadidi anthu akhadza katapa nduwa, mbakhonda kuphiwa pabodzi na anyakukhonda kubvera.

³²Ndinalonganji pontho? Nkhabe n'dzidzi wa kulonga pya Gidhiyoni, pya Bharaki, pya Sansau, pya Djefete, pya Dhavidhi, pya Samweli na pya maporofeta.

³³Enewa, na kukhulupira, anango atapata madziko a amambo, acita pyakulungama, apipaswa pidapikirirwa iwo, afunga milomo ya nkhalamu,

³⁴akunda mphambvu ya moto, pontho apulumuka pa kuphiwa na tarasada. Pa mbuto ya kusowa mphambvu, adza kawanga, mbadza kakhala na mphambvu za kucita nkhondo, mbathamangisa anyankhondo a madziko a kunja.

³⁵Na kukhulupira, alipo akazi adatambira anyakufa awo adalamuswa pa kufa. Anango athabuswa mpaka kufa mbakhonda kutawira kuombolwa, toera akwanise kuona kulamuka kukulu pa kufa.

³⁶Anango apirira kusingirirwa na kukwapulwa, amangwa na unyolo mbafungirwa n'kaidi,

³⁷aphiwa na myala, agwandiwa pakati na saroti, aleserwa,[10] aphiwa na matarasada. Akhafamba balala-balala, mbakhabvala nthembe za mabira, na za mbuzi. Akhacherenga, akhazondiwa, pontho mbakhathabuswa.

³⁸Iwo akhakhondiwa pa dziko ino yakuipa. Akhaenda mbandzendza n'thando, m'mapiri, m'madzimba na m'madjenje.

³⁹Awa onsene, asimbwa na thangwi ya kukhulupira kwawo, mbwenye nkhabe m'bodzi wawo adatambira pikhadapikirirwa iwo.

⁴⁰Mulungu akhadamala sasanyira kale pinthu pyadidi kakamwe kuna ife, toera iwo akhale akukwana pabodzi na ife.