Read cisena Hebhereu 2 Bible Online

Hebhereu 2 - cisena bible

Hebhereu 2

¹Na thangwi eneyo, tisafunika tipibvesese kakamwe pire pidabva ife, kuti na lini tikhonde kutaika.

²Thangwi ngakhala mphangwa zidalongwa na maanju zapangizika kuti ndi za maso, pontho ale adadodomeka na ale adakhonda kuzibvera, aoneswa nyatwa za kuakwanira,

³tinaomboleka tanimbo ife, tingapwaza kupulumuswa uku kukulu kakamwe? Kupulumuswa kweneku kukhadalongwa pakutoma na Mbuya, ale adapibva mbatipangambo kuti mphyamaso.

⁴Mulungu acitambo umboni wa penepi na pidzindikiro, na pyakudzumisa, na pirengo pizinji, pontho na miyoni ya Nzimu Wakucena ukhagawiza Iye ninga munafuna ntima wace.

⁵Dziko eneyi inafuna kudza, Mulungu hadaipasa maanju kuti aitonge tayu,

⁶mbwenye alipo adacita umboni pa mbuto ibodzi mbalonga kuti: “Kodi ndi ani munthu, kuti Imwe munkumbuke? Peno ndi ani mwana wa munthu kuti muntsalakane?

⁷Imwe mwancepesa pa n'dzidzi pang'ono kupita maanju, pontho mbamumpasa mbiri na kunkuza. [1]

⁸Pyonsene mwapiyikha pantsi pa manyalo ace.” Pakuikha kwace pinthu pyonsene pantsi pa manyalo ace, nkhabe cibodzi cidasiya Iye kuti cikhonde kukhala pantsi pace. Mphapo cincino, tidzati kupiona kuti pinthu pyonsene piri pantsi pace.

⁹Mbwenye anaona ife ndi Yezu, adacepeswa pa n'dzidzi ung'ono, mbaikhwa pantsi pa maanju, toera na kukoma ntima kwa Mulungu, Iye afe, fera anthu onsene. Cincino Iye apaswa mbiri na kukuzwa na thangwi ya kufa kwace.

¹⁰Thangwi Mulungu nciti na nkoyi wa pinthu pyonsene, acita kuti Yezu, pa nyatwa zidaona Iye, akwanire kukhala mwanacinthu upulumuki, na tenepo mbakwanisa kukwata ana azinji mpaka ku mbuto ya mbiri.

¹¹Apo ule anacenesa na ale anaceneswa, onsene asabuluka kuna m'bodzi basi. Ndi thangwi eneyo, Yezu nkhabe khala na manyadzo na kuacemera abale.

¹²Iye alonga tenepa: “Ndinalonga dzina yanu kuna abale anga. Pa nsonkhano wawo ndinakusimbani.”

¹³Alonga pontho kuti: “Ine ndinanyindira Iye.” Mbathimiza pontho na kulonga kuti: “Ine ndiri pano, pabodzi na ana adandipasa Mulungu.”

¹⁴Na tenepo, thangwi ana ndi anthu ana nyama na ciropa, Iye akhalambo ninga munthu ana nyama na ciropa, toera na kufa kwace akunde Dyabu, ule ana mphambvu za kupha,

¹⁵pontho asudzule ale a kuti ntsiku zonsene akhacitwa udzakazi, na thangwi ya kugopa kufa.

¹⁶Thangwi ndimo mwene, pisapangizika pakweca kuti anaphedza Iye si maanju tayu, mbwenye asaphedza a dzindza ya Abharaamu.

¹⁷Na thangwi eneyo, pikhafunika kuti akhale sawa-sawa na abale ace pa pyonsene, toera adze kakhale nkulu wa anyantsembe, wa ntsisi, pontho na wakunyindirika na Mulungu, toera kufudza madawi a mbumba.

¹⁸Thangwi na nyatwa zidaona Iye ene pa kunyengererwa kwace, anakwanisa kuphedzambo ale ananyengererwa.