Read cisena Hebhereu 6 Bible Online

Hebhereu 6 - cisena bible

Hebhereu 6

¹Na thangwi eneyo, tendeni kutsogolo na pipfundzo pyacikulu mbatisiya pipfundzo pyakutoma pya thangwi ya Kirixtu. Tikhonde kuikha pontho nchici zakutoma ninga: pya kuchunyuka kucita mabasa anatiyendesa mwa kufa, pya thangwi ya kukhulupira Mulungu,

²pya thangwi ya pipfundzo pya mabatixmu, pya kusandzika manja, pya kulamuka kwa anyakufa, na pya kutongwa kwa kwenda na kwenda.

³Tenepa tinenda kutsogolo, Mulungu angafuna.

⁴Lang'anani, nkhabe kwanisika kuna ale adamwanikirwa kale, adalawira kale muwoni wa kudzulu, akhali nanthu pa kuphata basa kwa Nzimu Wakucena,

⁵adalawira kale udidi wa fala ya Mulungu pontho na mphambvu za midzidzi inafuna kudza,

⁶mbwenye mbagwa pa kukhulupira, kuti acemerwe pontho kwenda kachunyuka. Thangwi kuna iwo ene, asan'khomera pontho papsa pa ntanda Mwana wa Mulungu, mban'nyadzisa pakweca.

⁷Thangwi mataka anabvumbirwa kazinji kene na mulungu, mbabala misapu ya kuinjipa kuna nyakulima, enewa asatambira nkhombo za Mulungu.

⁸Mbwenye mataka anabala minga na tsanga ya kuipa, mataka enewa nkhabebve basa, pontho anati apaswe dzedze mbamalisira kupisiwa.

⁹Abale akufunika, pa pyonsene pidalonga ife, tisatawira kuti mwasankhula pinthu pyadidi kuna imwe, pinthudi pya upulumuki.

¹⁰Mulungu ndi wakulungama. Iye nkhabe kudza kaduwala basa yanu, na kunfuna kudampangisa imwe. Thangwi mwakwanisa kuphatira basa mbumba ya Mulungu, pontho na lero musaiphatira.

¹¹Tisafuna kuti m'bodzi na m'bodzi wanu, apangize phinga ibodzi ene mpaka pakumalisira, toera mukhale na kudikhira kwakukwana.

¹²Na tenepo, mukhonde kukhala anthu a kupolola, mbwenye mutoweze ale a kuti kubulukira pa kukhulupira na pa kupirira kwawo, asatambira pidapikirirwa iwo na Mulungu.

¹³Mulungu pidapikirira Iye Abharaamu, na kusoweka unango wankulu kupita Iye kuti adumbire na dzina yace, adumbirika ekha ene,

¹⁴mbalonga tenepa: “Dziwa kuti Ine ndinati ndikupase nkhombo, pontho mbandicita kuti dzindza yako ikule kakamwe.”

¹⁵Na tenepo, pakumala kudikhira na kupirira konsene, Abharaamu atambira pikhadapikirirwa iye na Mulungu.

¹⁶Anthu asadumbira na dzina ya unango munthu wankulu kupiringana iwo. Kudumbira nkhulongera kuti pidalongwa ndimo mwene, mbakumalisa mphoka yonsene.

¹⁷Na thangwi eneyo, Mulungu, mukhafuna Iye kupangisa mwakukwana kuna anyaunthaka akupikirirwa kuti pinafuna Iye nkhabe cinjika, apisimbisa na kudumbira.

¹⁸Pa pinthu piwiri ipi pinakhonda kucinja, pikirira na kudumbirira, Mulungu nkhabe kwanisa kulonga uthambi. Tenepo tinakhala dzololo na kuwangisira, ife adathawira muna Iye toera tikwate cidikhiro ciri patsogolo pathu.

¹⁹Cidikhiro cakhala ninga nangula pa makhaliro athu. Ico ndi cakuwanga pontho ciri dzololo. Cidikhiro ceneco cisapita mpaka kunduli kwa nguwo yakusitira inagumanika mu nyumba ya ntsembe,

²⁰kudapita Yezu adatitsogolera pa mbuto yathu, mbakhala nkulu wa anyantsembe wa kwenda na kwenda, ninga unyantsembe wa Melikizedheki.