Read cisena Hebhereu 9 Bible Online

Hebhereu 9 - cisena bible

Hebhereu 9

¹Lang'anani, cibverano cakutoma cikhali na mitemo yace ya kulambira nayo Mulungu, pontho cikhali na mbuto ya Mulungu pantsi pano.

²Yamangwa khumbi ya ntsembe ya Mulungu. Ku khundu ya kutsogolo, mule munacemerwa Mbuto Yakucena, mukhali na nyale ikulu, na meza ikhaikhirwa mikate.

³Kuntsi kwa nguwo yaciwiri yakusitira, kukhali na mbuto ikhacemerwa Mbuto Yakuceneratu Kakamwe.

⁴Mwenemu mukhagumanika guwa ya ntsembe ya oro, ikhapisirwa ntsembe ya pinthu pyakununkhira pinacemerwa isensu. Mukhagumanikambo kaxa ya cibverano yakumala finikizwa na oro. N'kati mwa kaxa eneyi mukhali na mulinga wa oro ukhali na manaa, mpsimbo ya Arau ikhadaphwikira, pontho na matabwa a myala a cibverano

⁵za Mbiri, zikhadagudumira na mithundzi yawo mbuto ikhalekererwa madawi. Pa pinthu penepi, nkhabe kwana kupilonga cincino cibodzi na cibodzi tayu. [7]

⁶Pyonsene ipi pingamala sasanyirwa, anyantsembe akhapita kazinji kene mu Mbuto Yakucena, N'khumbi ya ntsembe ya Mulungu, kwenda kaphatisa basa yawo.

⁷Mbwenye ku Mbuto Yakuceneratu Kakamwe, akhapitako ndi nkulu wa anyantsembe basi, kabodzi basi pa caka. Iye nkhabe pitamo mbakhonda kukwata ciropa ca cinyama, cikhaikha iye ntsembe ikhira iye ekha ene, pontho mbakhaikhirambo kudawa kukhacita mbumba mbakhonda kupidziwa.

⁸Na penepi, Nzimu Wakucena ukhapangisa kuti njira ya kwenda ku Mbutodi Yakuceneratu Kakamwe ikhadadzati kufungulwa, pa n'dzidzi ukhaphatiswa basa khumbi yakutoma ya ntsembe ya Mulungu.

⁹Penepi ndi cipangizo ca ntsiku zathu za lero, cinapangisa kuti miyoni na ntsembe zikhaikhwa, nkhabe kwanisa kupasa nyakulambira, manyerezero akukwana a muntima.

¹⁰Eneyi ikhali mitemo ya pyakudya basi, na ya pyakumwa, na ya pinango pikhacita iwo pyakucenesa pinthu na madzi. Mitemo eneyo ya kucenesa kunja, ikhatongwa kutowezwa mpaka kupita kwa midzidzi ipsa.

¹¹Mbwenye Kirixtu pakubwera kwace ninga nkulu wa anyantsembe wa udidi unaona ife cincino, apita mu khumbi ikulu ya ntsembe ya Mulungu yakukwana kakamwe, yakukhonda mangwa na munthu, uku nkhubveka kuti: Si nyumba ya pantsi pano tayu.

¹²Hadapitamo na ciropa ca bokho, peno ca mwana ng'ombe tayu, mbwenye na ciropa cace cene, Iye apita kabodzi basi mu Mbuto Yakuceneratu Kakamwe, mbakwanisa kutiombola kwenda na kwenda.

¹³Mphapo ngakhala ciropa ca bokho na ca ng'ombe, pontho na madotha a mwana ng'ombe, pingawazirwa kuna ale adakhonda kuceneswa pa mwambo pikhaacenesa pa manungo awo,

¹⁴ndiye tani ciropa ca Kirixtu adasowa madawi, cidapereka Iye na Nzimu wa kwenda na kwenda kuna Mulungu! Cinati cikwanise kutsuka manyerezero athu a muntima pa mabasa anatiyendesa n'kufa, toera tiphatire basa Mulungu wa m'maso.

¹⁵Na thangwi eneyo, Kirixtu ndiye nkhoswe wa cibverano cipsa toera kuti ale adacemerwa, atambire cidumbiriro ca unthaka wakukhonda kumala, thangwi Iye afa ninga muomboli wa madawi adacita iwo mu cibverano cakutoma.

¹⁶Pa thangwi ya cibverano,[8] pisafunika kuti kufa kwa ule adacita cibverano, kudziwikedi na anthu.

¹⁷Thangwi cibverano ca kuphatana cinatoma kuphata basa pa kufa kwa munthu. Ico nkhabe kuphata basa mwanacinthu adacicita mbali m'maso.

¹⁸Na thangwi eneyo, cibverano cakale kuti citome kuoneka, cikhafunikambo ciropa.

¹⁹Mozesi, pakumala kupanga mbumba yonsene mitemo yonsene ya Mwambo, akwata ciropa ca ng'ombe na ciropa ca mabokho pontho na madzi, mbakwata uweya wa kufuira na tsandzu ya muti unacemerwa isopo, mbawazira na iwo bukhu ya Mwambo na mbumba yonsene,

²⁰mbakhalonga tenepa: “Ici ndi ciropa ca cibverano cidalonga Mulungu kuti imwe mucibvere.”

²¹Na ciropa, awazirambo sawa-sawa khumbi ya ntsembe ya Mulungu, na pyombo pyonsene pyakulambira napyo Mulungu.

²²Ndimo mwene, ninga munalongera Mwambo, pinthu pizinji pisaceneswa na ciropa, pontho pangakhonda kutaika ciropa, nkhabepo kulekererwa.

²³Na tenepo, pikhafunika kuti pinthu pidalandana na pinthu pya kudzulu piceneswe na ntsembe zenezi, mbwenye ipyo pyene pinthu pya kudzulu, piceneswembo na ntsembe ikulu kakamwe.

²⁴Thangwi Kirixtu hadapita mu nyumba ya ntsembe yakucitwa na anthu, ire ikhali cithundzi-thundzi ca ndimo mwene tayu. Mbwenye Iye apita kudzulu, toera cincino atibulukirire patsogolo pana Mulungu.

²⁵Pontho si kuti aende kaperekeke pontho kazinji kene, sawa-sawa ninga nkulu wa anyantsembe anakhala mbapita pyaka pyonsene, mu Mbuto Yakuceneratu Kakamwe na ciropa ca unango tayu.

²⁶Mbidakhala ndi tenepo, Kirixtu akhafunika aone nyatwa kazinji kene, kutomera pakutoma kwa dziko. Mbwenye cincino Iye apangizika kabodzi basi, pakumala kwa midzidzi, toera abuluse kudawa na ntsembe idaperekeka Iye ekha.

²⁷Sawa-sawa ninga munthu asatongwa kuti afe kabodzi basi, angamala mbadikhira kutongwa,

²⁸tenepambo Kirixtu aperekeka ntsembe kabodzi basi, toera kubulusa madawi a azinji. Iye anadza kabwera pontho kacikawiri, si kudza kabulusa pontho kudawa tayu, mbwenye toera adzese upulumuki kuna ale anan'dikhira.