Read cisena 1 Pedhru 1 Bible Online

1 Pedhru 1 - cisena bible

1 Pedhru 1

¹Ine Pedhru, mpoxtolo wa Yezu Kirixtu,[1] ndisalembera ale adasankhulwa na Mulungu, anyakutama adamwazika ku dziko ya Pontu, ali ku Galasya, ali ku Kapadhosya, ali ku dziko ya Azya pontho na ali ku Bhitinya,

²adasankhulwa kale na kufuna kwa Mulungu Baba, na basa ya Nzimu ya kuperekeka kuna Mulungu toera kubvera Yezu Kirixtu, pontho mutsukwe na ciropa cace. Kukoma ntima na ntendere mbakuinjipe muna imwe.

³Mbasimbwe Mulungu Baba wa Mbuya wathu Yezu Kirixtu! Na thangwi ya ntsisi zace zikulu, Iye atibala papsa toera tikhale na cidikhiro ca m'maso, na thangwi ya kulamuka kwa Yezu Kirixtu pa akufa,

⁴toera tikhale na unthaka wakukhonda kubvunda, wakusoweka midonthi, pontho wakukhonda kumala, udakoyerwa imwe kudzulu

⁵kuti, kubulukira pa kukhulupira, musakoiwa na mphambvu za Mulungu mpaka kufika kwa upulumuki uli dhuzi na kupangizwa pa n'dzidzi wakumalisa.

⁶Na thangwi eneyo imwe tsandzayani, mbwenye tisapidziwa kuti cincino, pa n'dzidzi ung'ono basi, musatongwa mutsukwale na kuleserwa kwakusiyana-siyana.

⁷Penepi pisacitika toera kulesera cikhulupiro cina imwe, cikulu kakamwe kupiringana oro wakusungulwa na moto mbwenye usamala, ndi ca ndimo mwene pontho cinabala kukuzwa, na mbiri, pontho na kusimbwa Yezu Kirixtu angadza kapangizika.

⁸Imwe cipo mudzati kumuona, mbwenye musanfuna. Imwe musacimwana kumuona cincino, mbwenye musan'khulupira pontho musankuza na kukomerwa kwakukhonda kulongeka na kwa mbiri,

⁹thangwi imwe muli kutambira misapu ya cikhulupiro canu, ndiko kupulumuswa kwa mizimu yanu.

¹⁰Ndi thangwi ya kupulumuswa kweneku kudacita kuti maporofeta adalonga pya thangwi ya kukoma ntima kwa Mulungu kukhadakoyerwa imwe, apipfundza pontho mbapinyerezera mwadidi,

¹¹mbakhasaka kudziwa n'dzidzi na makhaliro ale akhaapangisa Nzimu wa Kirixtu ukhakhala muna iwo, mukhaapanga iwo nyapantsi nyatwa za Kirixtu mbazidzati kucitika, pontho na mbiri zikhafuna kucitika kutsogolo kwa nyatwa zenezo.

¹²Iwo apangizwa mu Nzimu kuti basa inacita iwo asaphatira iwo ene tayu, mbwenye asaphatira imwe, mukhalonga iwo pinthu pinapangwa imwe cincino na ale adakupangani Mphangwa Zadidi na mphambvu za Nzimu Wakucena udatumwa buluka kudzulu. Pinthu pya kuti na anju zene zisafunambo kupidziwa.

¹³Na tenepo, khalani akusasanyira mwadidi manyerezero anu pa pire pinafuna imwe kucita. Cenjerani, pontho mbamudikhira kukoma kwa Mulungu kunafuna kupaswa imwe na Yezu Kirixtu pa kupangizika kwace.

¹⁴Ninga ana akubvera Mulungu, lekani kusangizira pontho pinthu pyakuipa pikhasirira imwe kale ene, mbamudzati kudziwa pya ndimo mwene.

¹⁵Mbwenye ninga Ule adakucemerani ndi wakucena ntima, imwe khalanimbo akucena ntima pa pyonsene pinacita imwe,

¹⁶thangwi pyalembwa kuti: “Khalani akucena ntima, thangwi Ine ndine wakucena ntima.”

¹⁷Lang'anani, ngakhala imwe musancemera Baba ule anatonga mbalang'ana mabasa a m'bodzi na m'bodzi basi, mbakhonda kulang'ana nkhope ya munthu, fambani na kugopa pa ulendo wanu pano pa dziko.

¹⁸Thangwi imwe musadziwa kuti si na pinthu pyakumala ninga parata, peno oro, pidaombolwa na imwe pa makhaliro anu apezi a kupulumuka, adakusiyirani ambuya anu tayu,

¹⁹mbwenye mwaombolwa na ciropa cakufunika kakamwe ca Kirixtu, ninga ca mwana bira wakusowa madamba pontho wakukhonda kulamala,

²⁰wakudziwika[2] dziko mbidzati kucitwa, mbwenye apangizika pa midzidzi ino yakumalisa pa thangwi yanu.

²¹Na thangwi yace, imwe mwatawira Mulungu adamulamusa pa akufa, pontho mbampasa mbiri, kuti kukhulupira na kudikhira kwanu kuli muna Mulungu.

²²Cincino imwe pakumala kuceneswa makhaliro anu pakubvera pya ndimo mwene, toera kufunana muubale mwa ndimo mwene, mufunanedi m'bodzi na m'bodzi pontho na ntima onsene.

²³Imwe mwabalwa kapsa, si na mbeu inafa tayu mbwenye inakhonda kufa, na thangwi ya fala ya m'maso ya Mulungu, pontho ya kwenda na kwenda.

²⁴Thangwi “anthu onsene akhala ninga tsanga, pontho mbiri yawo yonsene, ninga maluwa a n'tsanga. Tsanga isanyala, maluwa ace mbagwa,

²⁵mbwenye fala ya Mbuya isakhala kwenda na kwenda.” Iyi ndiyo fala idapangwa imwe.