Read cisena 1 Pedhru 3 Bible Online

1 Pedhru 3 - cisena bible

1 Pedhru 3

¹Sawa-sawambo imwe akazi, bverani amuna anu, toera ngakhala iwo adzati kutawira fala, akundike na macitiro adidi a akazi awo mbamukhonda kulonga cinthu,

²pakulang'ana makhaliro anu adidi pontho akulemedzeka.

³Kubalika kwanu mbakuleke kukhala kwa kunja, ninga kwakumanga tsisi, pontho na kubvala mphete za oro, peno na nguwo za ntengo ukulu.

⁴Mbwenye kubalika kwanu kwakukhonda kumala mbakukhale n'kati mwa ntima, kubalika kunapangisa nzimu wakubverana na wakukhurudzika, penepyo ndipyo pinafunika kakamwe kuna Mulungu.

⁵Thangwi akazi akale akulungama, ale akhadikhira Mulungu, akhakhala na nsambo wakubvalirambo tenepo. Iwo, m'bodzi na m'bodzi akhabvera amuna awo,

⁶ninga Sara, akhabvera Abharaamu pontho mbakhancemera mbuya. Imwe munakhala ana ace, mungacita udidi pontho mungakhonda kugopa.

⁷Sawa-sawambo na imwe amuna, dziwani kukhala na akazi anu, mbamualemedza ninga combo cakukhonda nentsa kusweka, pontho iwo apaswambo muwoni wa kukoma ntima kwa Mulungu wa kudya unthaka wa upulumuki, kuti miphembero yanu ikhonde kupingizwa.

⁸Pakumalisa, khalani monsene na manyerezero mabodzi ene, mubalangazane, mbamufunana muubale, mukhale anthu akubvera ntsisi pontho na akupicepesa.

⁹Lekani kubwezerana kuipa na kuipa, peno kutikanizana na kutikanizana, mbwenye phembereranani m'bodzi na m'bodzi. Thangwi imwe mwacemererwa penepi, toera mutambire nkhombo za unthaka.

¹⁰Thangwi “ule anafuna kukhala mwadidi na kuona ntsiku za kutsandzaya, mbakoye lirimi yace pa pinthu pyakuipa pontho na mulomo wace pa pinthu pya uthambi.

¹¹Thawa pyakuipa, cita udidi, saka ntendere mbutowerera.

¹²Thangwi maso a Mbuya asalang'ana anyakulungama pontho makutu ace ali kubvesera miphembero yawo, mbwenye Mbuya asapasira nkhodolo ale anacita kuipa.”

¹³Imwe mungakakamira kucita udidi, mbani anafuna kukucitani kuipa?

¹⁴Mbwenye mungadza kaona nyatwa thangwi mwacita udidi, imwe munadza katsandzaya. “Lekani kuagopa, lekani kuthuswa.”

¹⁵Mbwenye simbani Kirixtu m'mitima mwanu ninga Mbuya. Khalani basi mbamudasasanyira toera mutawire munthu onsene anasaka kudziwa pa thangwi ya cidikhiro cina imwe.

¹⁶Mbwenye piciteni na kupfulika pontho na cilemedzo, mbamukoya manyerezero adidi a muntima, kuti analonga kuipa macitiro anu adidi muna Kirixtu, akhale na manyadzo na pire pinakulongani iwo.

¹⁷Thangwi ngakhala ndi kufuna kwa Mulungu, mphyadidi muone nyatwa na thangwi ya kucita udidi, kupiringana kuona nyatwa na thangwi ya kucita kuipa.

¹⁸Thangwi Kirixtu aonambo nyatwa kabodzi basi, na thangwi ya madawi athu. Munthu wakulungama, kufera adakhonda kulungama, toera akuyendeseni kuna Mulungu. Iye aphiwa pa nyama, mbwenye alamuswa mu nzimu.

¹⁹Mu nzimu unowu aendambo, pontho amwaza Mphangwa Zadidi kuna mizimu iri n'kaidi,

²⁰idakhonda kubvera kale ene pa n'dzidzi ukhadikhira Mulungu na ntima wakulekerera ntsiku za Nowa, mukhamangwa Arika. Mwenemu adapulumuswa ndi anthu pang'ono basi, peno tilonge anthu asere adapulumuswa na madzi,

²¹pontho penepi pisalongera na thangwi ya batixmu ire inakupulumusanimbo cincino - si kubulusa pinaswipisa manungo tayu, mbwenye ndi cidumbiriro ca manyerezero adidi a muntima patsogolo pana Mulungu - na thangwi ya kulamuka pa kufa kwa Yezu Kirixtu,

²²adakwira kudzulu pontho ali ku nkono wa madyo wa Mulungu. Iye asabverwa na maanju, na utongi, na mphambvu za kudzulu.