Read cisena 1 Pedhru 5 Bible Online

1 Pedhru 5 - cisena bible

1 Pedhru 5

¹Na tenepo, ndisaphemba kuna akulu a gereja ali pakati panu, pontho ndisapicita ninga nkulu sawa-sawa na iwo, na mboni wa nyatwa za Kirixtu, ninga m'bodzi anafuna kukhala nanthu pa mbiri inafuna kudza kapangizika kuti:

²Kumbizani nkumbi wa mabira a Mulungu anaonera imwe. Aonereni mbamukhonda kukakamizwa, mbwenye mucite na ntima wanu onsene, ninga munafunira Mulungu. Lekani kucita penepi na ntima wakufuna cinthu, mbwenye mucite na ntima wanu onsene.

³Lekani kucita ninga anyakuponderera ale adanyindirwa imwe, mbwenye muapangize macitiro anu adidi toera akutowezeni.

⁴Angadza kapangizika Nkumbidzi Wankulu, imwe munadza katambira nthimba ya mbiri yakukhonda kubvunda.

⁵Sawa-sawambo kuna imwe ang'ono, bverani akulu anu. Monsene khalani akucepeseka kuna m'bodzi na m'bodzi, thangwi “Mulungu asaidana na anapikuza, mbwenye asapangisa kukoma ntima kuna ale anacepeseka.”

⁶Na tenepo, cepesekani mukhale pantsi pa manja a mphambvu a Mulungu, toera Iye akukuzeni n'dzidzi wace ungakwana.

⁷Perekani m'manja mwa Mulungu pyonsene pinakunentsani, thangwi ndiye anakukoyani.

⁸Khalani akucenjera mbamulang'anira. Dyabu nyamalwa wanu, asafamba n'khundu ninga nkhalamu mbakhuwa, kusaka mbani anafuna iye kudya.

⁹Wangisirani na kun'khonda mbamukhala dzololo pa kukhulupira, mbamudziwa kuti abale anu anagumanika n'dziko yonsene ya pantsi, ali kuona nyatwa zibodzi-bodzi.

¹⁰Pakumala kuthabuka n'dzidzi ung'ono, Mulungu wa kukoma ntima konsene, adakucemerani ku mbiri yace ya kwenda na kwenda muna Kirixtu Yezu, anakulamusani pontho, anakuwangisani, anakupasani mphambvu mbamukhala akukhonda kutekenyeka.

¹¹Mulungu mbakhale na mphambvu kwenda na kwenda, Ameni.

¹²Na kuphebza na Silivano,[3] ule m'bale ananyindira ine, ndakulemberani n'cigwagwa mbandikupasani cipapu, pontho mbandicita umboni wa kuti uku ndi kukoma ntimadi kwa Mulungu. Khalani dzololo n'kati mwa kukoma ntima kweneku.

¹³Nsoka wa anyakutawira Yezu wa ku Bhabhilonya, usakumwanyikani, pabodzi na mwana wanga Marku, muna Kirixtu.

¹⁴Mwanyikanani m'bodzi na m'bodzi na mpsompsono wakufunana muna Kirixtu. Ntendere mbukhale na imwe monsene ali muna Kirixtu.