Read cisena 1 Juwau 3 Bible Online

1 Juwau 3 - cisena bible

1 Juwau 3

¹Lang'anani kutifuna kukulu kudacita Baba, na kuticita kuti ife ticemerwe ana a Mulungu. Ndimo mwene, ndifedi ana a Mulungu. Ndi thangwi eneyo dziko nkhabe kutidziwa, thangwi iyo nkhabe kun'dziwambo tayu.

²Anyakufunika, ife cincino ndife ana a Mulungu, pontho pidzati kudziwika kuti tinadza kakhala tani. Mbwenye tisadziwa kuti Kirixtu angadza kapangizika,[4] ife tinadza kalandana na iye. Thangwi tinadza kamuona kukhala kudacita iye.

³Mphapo munthu onsene ana cidikhiro ceneci muna Kirixtu, asatongwa kuti akhale wakucena, ninga Kirixtu ndi wakucena.

⁴Munthu onsene anacita kudawa, anumpha Mwambo wa Mulungu. Ndimo mwene, kudawa ndi kunumpha Mwambo.

⁵Imwe musapidziwa kuti Kirixtu abwera kudza kabulusa madawi athu, pontho muna Iye nkhabe kudawa.

⁶Onsene ale anakhala muna Kirixtu, nkhabe kukhala n'kudawa.[5] Onsene ale anakhala n'kudawa, adzati kumuona, pontho adzati kun'dziwa.

⁷Ananga, lekani kunyengezwa na munthu. Ule anacita pinthu pyakulungama ndi wakulungama, sawa-sawa ninga Kirixtu ndi wakulungama.

⁸Apo ule anakhala mbadawa, unowu ndi munthu wa Sathani. Thangwi Sathani adza mbadawa kutomera kale na kale. Ndi thangwi eneyo Mwana wa Mulungu abwera, toera kufudza mabasa a Sathani.

⁹Onsene adabalwa na Mulungu nkhabe kukhala mbacita kudawa, thangwi mbeu ya Mulungu iri muna iye. Na mwenemu, unowu nkhabe kwanisa kukhala mbacita kudawa, thangwi abalwa na Mulungu.

¹⁰Na tenepo, tisadziwa mbani ana a Mulungu, peno mbani ana a Sathani. Onsene ale anakhonda kucita pinthu pyakulungama, na onsene anakhonda funa m'bale wace, hadabuluka kuna Mulungu tayu.

¹¹Izi ndizo mphangwa zidabva imwe kutomera pakutoma kuti: Tifunane m'bodzi na m'bodzi.

¹²Mbatilekeni kukhala ninga Kainu, munthu wa Sathani, adapha m'bale wace. Apo thangwi yanji iye apha m'bale wace? Amupha thangwi mabasa ace akhali akuipa, mbwenye mabasa a m'bale wace akhali akulungama.

¹³Abale anga, lekani kudzudzumika mungazondiwa na dziko.

¹⁴Tisadziwa kuti ife tabuluka pa kufa, mbwenye cincino tapulumuka thangwi tisafuna abale athu. Mphapo ule anakhonda funa m'bale wace, ali n'kufa.

¹⁵Munthu onsene anazonda m'bale wace ndi phanga. Pontho imwe musadziwa kuti phanga nkhabe upulumuki wakukhonda kumala muna iye.

¹⁶Na tenepo, ife tisadziwa ndi ninji kufunana: Yezu Kirixtu apereka moyo wace na thangwi yathu. Na tenepo, ife tisatongwambo kupereka moyo wathu na thangwi ya abale athu.

¹⁷Munthu wakupfuma pa dziko ino mbaona m'bale wace ali kucherenga mbakhonda kum'bvera ntsisi, munthu unowu analonga kuti asafuna Mulungu?

¹⁸Ananga, kufunana kwathu mbukuleke kukhala kwa mafala na mulomo basi tayu, mbwenye mbukukhale kwa mabasa na mwa ndimo mwene.

¹⁹Na tenepo, tinadziwa kuti ife ndife a ndimo mwene, pontho tinakhurudzisa ntima wathu patsogolo pana Mulungu,

²⁰ntima wathu ungatipanga kuti tadawa. Mulungu ndi nkulu kakamwe kupita ntima wathu, pontho asadziwa pinthu pyonsene.

²¹Axamwali anga akufunika, ntima wathu ungakhonda kutipanga kuti tadawa, tina cinyindiro patsogolo pana Mulungu.

²²Pontho pyonsene pinaphemba ife anatipasa, thangwi tisabvera matongero ace pontho tisacita pinafuna Iye.

²³Matongero ace ndi awa: Kuti titawire dzina ya Yezu Kirixtu Mwana wace, pontho tifunane m'bodzi na m'bodzi, ninga mudatipangira Iye.

²⁴Ule anabvera matongero a Mulungu, asakhala muna Mulungu, Mulungumbo asakhala muna iye. Na tenepo, tisadziwa kuti Iye asakhala muna ife, na thangwi ya Nzimu udatipasa Iye.