Read cisena 3 Juwau 1 Bible Online

3 Juwau 1 - cisena bible

3 Juwau 1

¹Ndine nkulu, ndisalemba tsamba iyi kuna wakufunika Gayo, unowu anafuna ine mwa ndimo mwene.

²Wanga wakufunika, ndisaphembera kuti ukhale manungo akuwanga, pyonsene pikufambire mwadidi, ninga nzimu wako uli mwadidi.

³Ndatsandzaya pikulu kakamwe mudatambira ine abale anango mbandipanga na thangwi ya kukhulupira kwako, na kufamba mwa ndimo mwene kunacita iwe.

⁴Nkhabe kutsandzaya kunango kwa ine, kunapiringana kubva kudacita ine kuti ananga ali kufamba mwa ndimo mwene.

⁵Wanga wakufunika, iwe ndiwe wakunyindirika pa pire pinacita iwe kuli abale, iwo mbakhala anthu anyakutama.

⁶Iwo acita umboni pamaso pa abale a gereja, mbalonga pya thangwi ya kukoma ntima kwawo. Mphyadidi uwaphedze kufamba pa ulendo wawo, toera Mulungu atsandzaye napyo.

⁷Thangwi na dzina ya Yezu, iwo abuluka, mbakhonda tawira kuphebza cinthu cibodzi na ale adakhonda kutawira Yezu.

⁸Thangwi tisatongwa tiatambire na ntsisi abale ninga enewa, toera tikhale anthu akuphatana pa kuphata basa ya kumwaza pya ndimo mwene.

⁹Ndalemba tsamba kuna abale a gereja, mbwenye Dhiyoterefi, na kufuna kwace ukulu pa nsoka wawo, akhonda kutitambira.

¹⁰Na tenepo, ine ndingafika kweneku ndinansandika, na thangwi ya pinacita iye na mafala ace a kuipa anatilongera iye. Mbwenye iye nkhabe komerwa basi na penepi tayu. Abale angafika kweneku iye nkhabe kuatambira. Pontho munthu unango angafuna kuatambira, iye asan'khondesa mpaka kufikira kun'thamangisa pa abale gereja.

¹¹Wanga wakufunika, leka towerera pyakuipa, mbwenye towerera pyadidi. Ule anacita pyadidi ndi wa Mulungu, mbwenye ule anacita pyakuipa adzati kuona Mulungu.

¹²Mbwenye Dhemetiru, anthu onsene asansimba. Pyamaso pinaphata iye pisancitira umboni. Na ifeenembo tisancitira umboni. Pontho iwe usadziwa kuti umboni wathu ndi wa ndimo mwene.

¹³Ndikhali na pinthu pizinji pya kufuna kukulembera, mbwenye sinafuna cita kupilemba tayu,

¹⁴thangwi ndisadikhira kudza kakuona cincino. Na tenepo, tinadza kaceza mwadidi tingadza kaonana nkhope na nkhope.

¹⁵Ntendere mbukhale na iwe. Axamwali a kuno asakuwangisa. Wangisambo axamwali a kweneko, m'bodzi na m'bodzi.