Read cisena Cidziwiso 21 Bible Online

Cidziwiso 21 - cisena bible

Cidziwiso 21

¹Na tenepo, ndaona kudzulu kupsa na pantsi papsa, thangwi kudzulu kwakutoma na pantsi pakutoma pakhadamala, pontho bara ikhalipobve tayu.

²Ndaona Nzinda wakucena, Djerusalema ipsa, mbukhachita buluka kudzulu kuna Mulungu, mbudamala sasanyika ninga mwali wa nkazi wakumala bvazikwa, kuti aonane na mamuna wace.

³Penepo, ndabva fala ikulu ikhabuluka ku mpando wa umambo, mbikhalonga na mphambvu kuti: “Cincino khumbi ya ntsembe ya Mulungu iri na anthu! Mulungu anakhala na iwo. Iwo anakhala mbumba yace. Iye ene Mulungu anadza kakhala na iwo [pontho anadza kakhala Mulungu wawo.[32]]

⁴Iye anapukuta misozi yonsene ya m'maso mwawo. Kufa, kutsukwala, kulira peno kubva kupha, nkhabe kudza kaonekabve, thangwi pinthu pya kale pyamala.”

⁵Ule akhakhala nawa pa mpando wa umambo alonga tenepa: “Lang'anani, ndisacita pinthu pyonsene papsa!” Mbathimiza pontho na kulonga kuti: “Pilembe ipi, thangwi mafala awa mba ndimo mwene na akunyindirika.”

⁶Andipanga pontho tenepa: “Pyamala kucitwa. Ine ndine Alufa na Omega, ndine Wakutoma na Wakumalisa. Kuna ule ana nyota, Ine ndinadza kampasa pezi mbamwa mphuno ya madzi a upulumuki.

⁷Anakunda, anadza kakhala mwanacinthu unthaka wa pyonsene ipi, pontho Ine ndinadza kakhala Mulungu wace, iye anadza kakhala mwana wanga.

⁸Mbwenye anyakugopa, anyakukhonda kutawira, anyakucita pyakunyanyasa, mapanga, anyalukwali, anyaufiti, anyakulambira madzimunthu, na onsene anyauthambi, mbuto yawo inadza kakhala n'thawala ya moto unagaka na inxofiri. Uku ndi kufa kwaciwiri.”

⁹M'bodzi wa anju zinomwe zire, zikhali na ndiko zinomwe zakudzala na nyatwa zinomwe zakumalisa, andifendedzera mbandipanga tenepa: “Bwera, ine ndinakupangisa mwali wankazi, nkazace Mwana Bira.”

¹⁰Iye andikwata mu Nzimu mpaka pa phiri ikulu yakulapha, mbandipangisa Djerusalema, Nzinda wa Mulungu, mbukhachita buluka kudzulu kuna Mulungu.

¹¹Nzinda ukhayetimira na mbiri ya Mulungu. Kuyetimira kwace kukhali ninga kwa mwala wakubalika, ninga kwa mwala wa djaxpe, wakuphenekera ninga matalala.

¹²Ukhali na mpanda ukulu wakulapha, na misuwo mikulu khumi na miwiri, pontho pakhali na anju khumi na ziwiri, m'bodzi na m'bodzi mbakhalimira pa nsuwo wace. M'misuwo mukhadalembwa madzina a madzindza khumi na mawiri a ana a Izarayeli.

¹³Ku mabulukira dzuwa, kukhali na misuwo mikulu mitatu. Ku khundu ya kubangwe, kukhali na misuwo mitatu. Ku madokera dzuwa, kukhali na misuwo mitatu na ku khundu ya mbalu kukhali na misuwo mitatu.

¹⁴Mpanda wa nzinda ukhadamangwa padzulu pa myala khumi na miwiri. Pa mwala ubodzi na ubodzi, pakhadalembwa dzina ibodzi ya apoxtolo khumi na awiri a Mwana Bira.

¹⁵Anju akhalonga na ine akhali na mpsimbo ibodzi ya kupima nayo, yakucitwa na oro, toera kupima nayo nzinda, misuwo yace mikulu, na mipanda yace.

¹⁶Nzinda ukhali na makhundu manai. Ulaphi wace na ugugumi wace ukhali sawa-sawa. Iye aupima nzinda na mpsimbo yace. Ulaphi wace ukhali wa pikwi piwiri[33] na madzana mawiri anacemerwa makilometuru ncizungu. Ugugumi wace na cengo cace, pikhali sawa-sawa na ulaphi wace.

¹⁷Iye apimambo mpanda,[34] mbukwana meturu makumatanthatu na zixanu.[35] Anju akhapima na mapimiro a anthu.

¹⁸Mpanda ukhadacitwa na myala yakubalika inacemerwa djaxpe, pontho nzinda ukhali wa oro wakukhonda kubvungazwa, mbulandana na vidhuru yakucena.

¹⁹Myala ikhatsidzikira mipanda ya nzinda ikhadabalikiswa na myala yakubalika yakusiyana-siyana. Mwala wakutsidzikira wakutoma ukhadabalikiswa na myala inacemerwa djaxpe. Mwala wakutsidzikira waciwiri ukhadabalikiswa na myala ya safira. Wacitatu ukhadabalikiswa na myala ya kalisedhonya. Wacinai ukhadabalikiswa na ejimiradha.

²⁰Mwala wakutsidzikira wacixanu ukhadabalikiswa na myala ya saridhonyo, wacitanthatu na myala ya saridhyo, wacinomwe na myala ya kirizolito. Mwala wakutsidzikira wacisere ukhadabalikiswa na myala ya bherilo, wacipfemba na myala ya topazyo, wacikhumi na ya kirizoparazo. Wacikhumi na ubodzi ukhadabalikiswa na myala ya jasintu, wacikhumi na miwiri ukhadabalikiswa na myala ya ametixta.

²¹Misuwo mikulu khumi na miwiri, ikhali ya myala yakubalika inacemerwa perola. Nsuwo ubodzi na ubodzi, ukhadacitwa na mwala ubodzi basi. Nseu ukulu kakamwe wa nzinda, ukhali wa oro wakukhonda kubvungazwa, wakuphenekera ninga vidhuru.

²²Mu nzinda sidaonamo Nyumba ya Mulungu tayu, thangwi Mbuya Mulungu wa mphambvu zonsene na Mwana Bira, ndiwo Nyumba yawo ya Mulungu.

²³Nzinda nkhabe funika kuti umwanikwe na dzuwa peno na mwezi, thangwi cieza ca Mulungu cinaumwanika, pontho Mwana Bira ndi nyale yawo.

²⁴Mbumba zinadza kafamba n'cieza ca nzinda, pontho amambo a pantsi pano anaudzesera mbiri yawo.

²⁵Misuwo mikulu ya nzinda nkhabe kudza kafungwabve ntsiku zonsene, thangwi mwenemu nkhabe kudza kaonekabve masiku.

²⁶Madziko anadza kaulemedza[36] na kuupasa mbiri.

²⁷Mwenemu cipo munadza kapita cinthu cakukhonda kuceneswa, peno kupita unango anacita pyakunyanyasa peno pyauthambi. Mbwenye anafuna pita mwenemu ndi ale basi a kuti madzina awo alembwa mu Bukhu ya Upulumuki ya Mwana Bira.