Read cisena Cidziwiso 3 Bible Online

Cidziwiso 3 - cisena bible

Cidziwiso 3

¹“Lemba kuli anju wa abale a Gereja ya ku Saridhi kuti: “Awa ndiwo mafala a ule ana mizimu minomwe ya Mulungu na nyenyezi zinomwe. Ine ndisadziwa pinacita iwe. Iwe usabvekera kuti uli m'maso, mbwenye ndiwe wakufa.

²Khala wakulang'anira! Pasa mphambvu pire pidasala piri dhuzi na kufuna kufa, thangwi ndaona kuti mabasa ako hadalungama tayu pamaso pa Mulungu wanga.

³Mphapo kumbuka pidatambira iwe na pidabva iwe, bvera mbuchunyuka. Mbwenye iwe ungakhonda kulang'anira, ine ndinabwera ninga mbava, iwe mbukhonda kudziwa na pang'ono pene ndi n'dzidzi wanji unafuna ine kubwera kuna iwe.

⁴“Mbwenye iwe unawo kweneku ku Saridhi anthu anango pang'ono, adakhonda kuswipisa nguwo zawo. Iwo anati afambe na ine na nguwo zakucena, thangwi ndiwo adakwana kucitirwa penepi.

⁵“Anakunda anati abvazikwembo sawa-sawa nguwo zakucena. Cipo ndinadza kafudza dzina yace mu Bukhu ya Upulumuki, mbwenye ndinampangisa patsogolo pa Baba wanga na pa maanju ace.

⁶Ule ana makutu akubva, mbabve pinalonga Nzimu Wakucena kuna abale a magereja.

⁷“Lemba kuli anju wa abale a Gereja ya ku Filadhelifya kuti: “Awa ndiwo mafala a ule wakucena na wa ndimo mwene, ana cavi ca Dhavidhi. Cinafungula iye, nkhabe anakwanisa kucifunga, pontho cinafunga iye nkhabe anakwanisa kucifungula.

⁸Ine ndisadziwa pinacita iwe. Lang'ana, ndaikha patsogolo pako nsuwo wakufunguka kuti nkhabe munthu anakwanisa kuufunga. Ndisadziwa kuti iwe mphambvu zako zacepa. Mbwenye wakoya fala yanga, pontho dzina yanga hudaikhonda tayu.

⁹Lang'anani pinafuna cita ine na ale a nyumba ya kuphemberera ya Sathani, analonga kuti ndife madjuda, mbakhonda kukhala madjuda, mbwenye asalonga uthambi. Ndinaacita kuti abwere kudza kalambira pa myendo pako, pontho mbadziwa kuti ine ndakufuna.

¹⁰Thangwi iwe wakoya fala yanga idakupanga ine kuti uwangisire, inembo ndinakukoya pa n'dzidzi wa kuleserwa unafuna kudza pa dziko yonsene, toera kulesera anthu a pantsi pano.

¹¹“Ndinabwera na mwansanga! Koya pire pina iwe, toera paleke kuoneka unango wa kukukwatira nthimba yako.

¹²Ule anakunda, ndinancita chikwa ya nyumba ya ntsembe ya Mulungu wanga, pontho penepo iye nkhabe kudza kabulukabve. Ine ndinadza kamulemba dzina ya Mulungu wanga m'manungo mwace, na ya nzinda wa Mulungu wanga unacemerwa Djerusalema ipsa, unachita buluka kudzulu kuna Mulungu, pontho ndinamulembambo dzina yanga ipsa.

¹³“Ule ana makutu akubva, mbabve pinalonga Nzimu Wakucena kuna abale a magereja.

¹⁴“Lemba kuli anju wa abale a Gereja ya ku Laudhiseya kuti: “Awa ndiwo mafala a Ameni, ndiye m'mboni wakunyindirika na wa ndimo mwene, mwanacinthu wa pidacitwa na Mulungu.

¹⁵Ine ndisadziwa pinacita iwe. Iwe siwe wakutonthola, siwe wakupisa. Pikhali pyadidi mbudakhala pyako wakutonthola, peno wakupisa!

¹⁶Na tenepo, thangwi ndiwe wakupisira pang'ono, nkhabe kupisa maka, pontho nkhabe kutonthola, ndinati ndikutapike pa mulomo panga.

¹⁷Iwe usalonga kuti: ‘Ndine m'pfumi, ndapasiwa mpfuma, nkhabe cinthu cinasowa ine.’ Nkhabe dzindikira kuti ndiwe wakusowa pyonsene, wakupasa ntsisi, n'cherengi, boli-boli, pontho kuti uli cipezi-pezi.

¹⁸Na tenepo, ndiri kukulanga kuti ugule na ine oro wakusungulwa na moto toera upfume. Gula nguwo zakucena ubvale, toera ukhonde kuoneka pezi kwakupasa manyadzo, pontho ugule ntombwe wa m'maso udzoze m'maso mwako, toera ukwanise kuona.

¹⁹“Ine ndisasandika mbandidzudza ale anafuna ine. Na tenepo, wangisira pontho uchunyuke.

²⁰Lang'anani! Ine ndiri pa nsuwo, ndiri kugogodza. Munthu anabva fala yanga mbafungula citseko, ine ndinapita n'nyumba mwace, mbandidya pabodzi pene iye na Ine.

²¹“Ule anakunda, ndinansiya kuti akhale na ine pabodzi pa mpando wanga wa umambo, ninga inembo ndakunda mbindikhala pabodzi na Baba wanga pa mpando wace wa umambo.

²²Ule ana makutu akubva, mbabve pinalonga Nzimu Wakucena kuna magereja.”