Read cisena Cidziwiso 5 Bible Online

Cidziwiso 5 - cisena bible

Cidziwiso 5

¹Na tenepo, ndaona m'manja a nkono wa madyo a ule ali pa mpando wa umambo, bukhu[6] ibodzi yakulembwa n'kati na kunja, mbifungwa kanomwe na upula.

²Ndaona pontho anju m'bodzi wa mphambvu, mbakhakhuwa na mphambvu zonsene kuti: “Mbani anakwanira kukaula upula na kufungula bukhu?”

³Mbwenye nkhabe munthu m'bodzi adaoneka kudzulu peno pantsi pano, peno pantsi pa mataka, adakwanira kufungula bukhu peno kuilang'ana.

⁴Apo ine ndikhalira pikulu, na thangwi yakukhonda kugumanika munthu m'bodzi adakwanira kufungula bukhu na kuilang'ana.

⁵Na tenepo, m'bodzi wa akulu-akulu andipanga tenepa: “Leka kulira! Lang'ana, nkhalamu ya dzindza ya Djudaa, N'chici[7] wa Dhavidhi! Akunda toera afungule bukhu, pontho na kukaula upula udafungwa na iyo kanomwe.”

⁶Pakumala, ndaona Mwana Bira m'bodzi ninga wakufa, mbali dzololo pakati pa mpando wa umambo, mbazungulirwa na pinthu pinai pya m'maso na akulu-akulu. Mwana Bira akhali na nyanga zinomwe na maso manomwe. Penepyo ndipyo Mizimu minomwe ya Mulungu idatumwa pantsi pano ponsene.

⁷Na tenepo, Mwana Bira afendedzera mbatambira bukhu ikhali m'manja a nkono wa madyo a ule akhakhala pa mpando wa umambo.

⁸Mwana Bira pidaitambira iye bukhu, pinthu pinai pya m'maso, na akulu-akulu makumawiri na anai, pyonsene pyagwa pantsi mbipimulambira. Penepo m'bodzi na m'bodzi akhali na bhangwe wace, na ndiko za oro zakudzala na pinthu pyakununkhira pinacemerwa “isensu,” ndipyo pinapangisa miphembero ya mbumba ya Mulungu.

⁹Iwo akhaimba nyimbo ipsa tenepa: “Imwe ndimwe munakwanira kutambira bukhu, na kukaula upula wace. Thangwi mwaphiwa, pontho na ciropa canu mbumugula anthu a madzindza onsene, a malongero onsene, a madziko onsene na a mbumba yonsene, gulira Mulungu.

¹⁰Imwe mwaacita kuti iwo akhale umambo pontho akhale anyantsembe kuna Mulungu wathu. Pontho iwo anati atonge pantsi pano.”

¹¹Na tenepo, ndalang'ana mbandibva fala ya maanju azinji, pikwi na pikwi pyakukhonda kulengeseka. Iwo akhazungulira mpando wa umambo, akhazungulira pinthu pya m'maso na akulu-akulu.

¹²Pontho akhaimba na kugaluza tenepa: “Mwana Bira adaphiwa ndiye anakwanira kutambira mphambvu za utongi, mpfuma, udziwisi, na mphambvu, kulemebza, kupaswa mbiri na kukuzwa!”

¹³Buluka penepo, ndabva pinthu pyonsene pidacitwa kudzulu, pantsi pano, pantsi pa mataka, m'bara, na pyonsene piri mwenemu, pikhalonga tenepa: “Kuna ule adakhala pa mpando wa umambo na kuna Mwana Bira, mbakuzwe, mbasimbwe, mbapaswe mbiri na mphambvu za utongi kwenda na kwenda!”

¹⁴Pinthu pinai pya m'maso pyalonga tenepa: “Ameni!” Penepo, akulu-akulu agwa pantsi mbamulambira.