Read Мукъаддес Китап къырымтатар тилинде, Башланув 1 Bible Online

Башланув 1 - Мукъаддес Китап къырымтатар тилинде, bible

Башланув 1

¹Башта Алла коклерни ве ерни яратты.

²Ер юзю шекильсиз ве бош эди, теренликни къаранлыкъ къаплай эди, ве Алланынъ Руху сувларнынъ устюнден учып юре эди.

³Сонъ Алла деди: — Ярыкъ олсун! Ве ярыкъ олды.

⁴Алла ярыкънынъ насыл яхшы олгъаныны корьди. Сонъ Алла оны къаранлыкътан айырды.

⁵Алла ярыкъны «куньдюз», къаранлыкъны исе «гедже» деп адландырды. Акъшам тюшти, саба ачылды — бу, бир кунь сайылды.

⁶Сонъ Алла деди: — Сувларнынъ арасында къуббе олсун, ве о, сувларны сувлардан айырсын.

⁷Алла къуббени яратты ве къуббе тюбюндеки сувларны къуббе устюндеки сувлардан айырды. Ойле де олды.

⁸Алла къуббени «кок» деп адландырды. Акъшам тюшти, саба ачылды — бу, экинджи кунь эди.

⁹Сонъ Алла деди: — Коклер тюбюндеки сувлар бир ерге топлансынлар, ве къуру топракъ пейда олсун. Ойле де олды.

¹⁰Алла топракъны «ер» деп адландырды, сув топламыны исе «денъиз» деп адландырды. Алла буны насыл яхшы олгъаныны корьди.

¹¹Сонъ Алла деди: — Ер осюмликлерни: урлугъыны берген отларны ве чешитине коре урлугъы ичинде олгъан махсул берген мейва тереклерини ер устюнде осьтюрсин. Ойле де олды.

¹²Ер осюмликлерни: чешитине коре урлугъыны берген отларны ве чешитине коре урлугъы ичинде олгъан махсул берген тереклерни осьтюрди. Алла буны насыл яхшы олгъаныны корьди.

¹³Акъшам тюшти, саба ачылды — бу, учюнджи кунь эди.

¹⁴Сонъ Алла деди: — Кок къуббесинде ярыкъ менбалары пейда олсунлар. Олар куньдюзни геджеден айырсынлар ве заманларны, куньлерни ве йылларны бельгилесинлер.

¹⁵Олар ер юзюни ярыкълатмакъ ичюн, кок къуббесинде ярыкъ менбалары олсунлар. Ойле де олды.

¹⁶Алла эки балабан ярыкъ менбасы яратты: куннинъ сабысы олсун деп, балабанджа ярыкъ менбасыны, гедженинъ сабысы олсун деп, уфакъча ярыкъ менбасыны, ве йылдызларны яратты.

¹⁷[17-18] Ер юзюни ярыкълатмакъ, куньдюз ве геджени идаре этмек ве ярыкъны къаранлыкътан айырмакъ ичюн, Алла оларны кок къуббесине къойды. Алла буны насыл яхшы олгъаныны корьди.

¹⁹Акъшам тюшти, саба ачылды — бу, дёртюнджи кунь эди.

²⁰Сонъ Алла деди: — Сув тири джанларгъа, махлюкъларгъа толсун, ве къушлар кок къуббесинде ер юзю устюнден учсунлар.

²¹Алла балабан денъиз аждерхаларыны, сувда толу олгъан чешитине коре эр бир сюйрелип юрген тири джанларны ве союна коре чешит тюрлю къанатлы къушларны яратты. Алла буны насыл яхшы олгъаныны корьди.

²²Алла оларны: — Чокъ балалар догъып чокълашынъыз, денъиздеки сувларны толдурынъыз. Учкъан махлюкълар исе ер юзюнде чокълашсынлар, — деп багъышлады.

²³Акъшам тюшти, саба ачылды — бу, бешинджи кунь эди.

²⁴Сонь Алла деди: — Чешитине коре тири джан: сойларына коре айванлар, сюйрелип юрген махлюкълар ве ер юзюндеки кийик айванлар ер ичинден чыкъсынлар. Ойле де олды.

²⁵Алла ер юзюндеки кийик айванларны сойларына коре, эв айванларыны сойларына коре ве ер юзюндеки эписи сюйрелип юрген махлюкъларны сойларына коре яратты. Алла буны насыл яхшы олгъаныны корьди.

²⁶Сонъ Алла деди: — Бизим къыяфетимизге коре ве Бизге ошагъан адамны ясайыкъ. Олар денъиздеки балыкъларгъа, коклердеки къушларгъа ве айванларгъа — бутюн ер юзюне ве ер юзюнде бутюн сюйрелип юрген махлюкъларгъа падишалыкъ этсинлер.

²⁷Алла Озюнинъ къыяфетине коре адамны яратты, оны Алланынъ корюнишине коре яратты: оларны эр киши ве къадын киши оларакъ яратты.

²⁸Алла оларны багъышлады. Алла оларгъа бойле деди: — Чокъ балалар догъып чокълашынъыз, ер юзюни толдурынъыз ве оны озюнъизге бойсундырынъыз. Денъиздеки балыкъларгъа, коклердеки къушларгъа ве ер юзюнде юрген эр бир махлюкъларгъа ве айванларгъа падишалыкъ этинъиз.

²⁹Алла деди: — Сизге аш олсун деп, Мен бутюн ер юзюнде олгъан, урлугъыны берген эписи отларны сизге бердим, махсул ичиндеки урлугъы олгъан эписи тереклерни де бердим.

³⁰Ер юзюндеки эписи айванларгъа, коклердеки эписи къушларгъа ве ер юзюнде сюйрелип юрген эписи махлюкъларгъа, — ичинде тири джаны олгъан эписине исе Мен бутюн ешиль осюмликлерни ашамакъ ичюн бердим. Ойле де олды.

³¹Сонъ Алла Озю яраткъан эр бир шейге бакъты, ве о, керчектен де пек яхшы эди. Акъшам тюшти, саба ачылды — бу, алтынджы кунь эди.