Read Мукъаддес Китап къырымтатар тилинде, Башланув 11 Bible Online

Башланув 11 - Мукъаддес Китап къырымтатар тилинде, bible

Башланув 11

¹О заманда бутюн ер юзюнде бир тиль эди, сёзлер де бир эдилер.

²Шаркъ тарафтан баргъанда, адамлар Шинар мемлекетиндеки вадийни таптылар ве анда ерлештилер.

³Олар бир-бирлерине бойле айттылар: — Келинъ, кирпичлерни япайыкъ да, оларны атешке пиширейик. Бойлеликнен, оларда таш ерине тола, киреч иринтиси ерине исе зифт эди.

⁴Сонъ олар бойле дедилер: — Келинъ, озюмизге шеэр ве башы кокке тийген къулле къурайыкъ; бутюн ер юзюнде дагъылмайыкъ деп, озюмизге нам къазанайыкъ.

⁵РАББИ, адам огъуллары къургъан шеэрге ве къуллеге бакъмакъ ичюн энди.

⁶РАББИ деди ки: — Иште, бир халкъ ве эр кесте бир тиль. Мына не япып башлайлар олар! Эм де ниетлеринден къайтмазлар.

⁷Келинъ, тюшейик де, бири башкъасынынъ тилини анъламасын деп, анда оларнынъ тилини къарыштырайыкъ.

⁸РАББИ оларны андан къувып бутюн ер юзюнде дагъытты, ве олар шеэр къурмакъны токътаттылар.

⁹Бойлеликнен, бу шеэрге Вавилон [16] деген ад берильди, чюнки анда РАББИ бутюн ер юзюндеки тильни къарыштырды ве чюнки РАББИ халкъны андан къувып бутюн ер юзюнде дагъытты.

¹⁰Мына Шем ве онынъ эвлятлары акъкъында ривает. Сув ташкъынындан эки йыл кечкен сонъ, Шем 100 яшында олгъанында, онынъ Арпакъшад адлы огълу олды.

¹¹Арпакъшад догъгъан сонъ, Шем даа 500 йыл яшады, ве онынъ даа огъуллары ве къызлары бар эди.

¹²Арпакъшад 35 яшында олгъанда, онынъ Шелах адлы огълу олды.

¹³Шелах догъгъан сонъ, Арпакъшад 403 йыл яшады, ве онынъ даа огъуллары ве къызлары бар эди.

¹⁴Шелах 30 яшында олгъанда, онынъ Эвер адлы огълу олды.

¹⁵Эвер догъгъан сонъ, Шелах 403 йыл яшады, ве онынъ даа огъуллары ве къызлары бар эди.

¹⁶Эвер 34 дёрт яшында олгъанда, онынъ Пелег адлы огълу олды.

¹⁷Пелег догъгъан сонъ, Эвер 430 йыл яшады, ве онынъ даа огъуллары ве къызлары бар эди.

¹⁸Пелег 30 яшында олгъанда, онынъ Реу адлы огълу олды.

¹⁹Реу догъгъан сонъ, Пелег 209 йыл яшады, ве онынъ даа огъуллары ве къызлары бар эди.

²⁰Реу 32 яшында олгъанда, онынъ Серуг адлы огълу олды.

²¹Серуг догъгъан сонъ, Реу 207 йыл яшады, ве онынъ даа огъуллары ве къызлары бар эди.

²²Серуг 30 яшында олгъанда, онынъ Нахор адлы огълу олды.

²³Нахор догъгъан сонъ, Серуг 200 йыл яшады, ве онынъ даа огъуллары ве къызлары бар эди.

²⁴Нахор 29 яшында олгъанда, онынъ Терах адлы огълу олды.

²⁵Терах догъгъан сонъ, Нахор 119 йыл яшады, ве онынъ даа огъуллары ве къызлары бар эди.

²⁶Терах 70 яшында олгъанда, онынъ Ибрам, Нахор ве Харан адлы огъуллары олдылар.

²⁷Мына Терах ве онынъ эвлятлары акъкъында ривает. Терахнынъ Ибрам, Нахор ве Харан адлы огъуллары бар эди. Хараннынъ Лут адлы огълу олды.

²⁸Харан, даа онынъ бабасы Терах сагъ олгъанда, озю догъгъан ерде, касдийлилернинъ Ур деген шеэринде, кечинди.

²⁹Ибрам ве Нахор эвлендилер. Ибрам апайынынъ ады Сарей эди. Нахор апайынынъ ады исе Милка эди; о, Хараннынъ къызы эди. Харан Милканынъ ве Исканынъ бабасы эди.

³⁰Сарей исе бала тапып оламай эди, онынъ баласы ёкъ эди.

³¹Терах, касдийлилернинъ Ур шеэринден чыкъып, Ханаан топрагъына кетмек ичюн ёлгъа чыкъты. О, огълу Ибрамны, Хараннынъ огълу олгъан Лут торуныны ве огълу Ибрамнынъ апайы олгъан Сарей келинини янына алды. Лякин олар Харан шеэрине келип, анда ерлештилер.

³²Терах 205 беш йыл яшады, сонъ о, Харанда кечинди.