Read Мукъаддес Китап къырымтатар тилинде, Башланув 12 Bible Online

Башланув 12 - Мукъаддес Китап къырымтатар тилинде, bible

Башланув 12

¹РАББИ Ибрамгъа: — Озь юртунъдан чыкъып, сой-сопларынъны ве баба эвини къалдыр да, Мен санъа косьтереджек ерге кет.

²Мен сенден буюк халкъ асыл этерим, сени багъышларым, адынъны намлы этерим. Сен озюнъ исе Алланынъ бахшышы ол!

³Сени багъышлагъанларны — багъышларым, сени къаргъагъанларны — къаргъарым. Сенинъ вастанънен ер юзюндеки бутюн халкъларны багъышларым! — деди.

⁴Ибрам, РАББИ айткъаны киби, ёлгъа чыкъты. Ибрамнен берабер Лут да кетти. Харан шеэринден чыкъкъанда, Ибрам 75 яшында эди.

⁵О, къадыны Сарей, огълан къардашынынъ огълу Лут, озюнинъ Харандаки бутюн ишлеп тапылгъан мал-мулькюни ве эписи хызметчилерини янына алды. Олар, Ханаан мемлекетине ёл алып, анда кельдилер.

⁶Ибрам, Ханаан топрагъында бой-бойгъа кочип юрген сонъ, Шекем шеэринедже Морэ деген терек янына кельди. Бу ерде о заман ханаанлылар яшай эдилер.

⁷РАББИ Ибрамгъа келип: — Бу ерни сенинъ эвлятларынъа береджегим, — деди. Ибрам, алдында пейда олгъан РАББИге къурбан чалынгъан ерни къурды.

⁸Сонъра о, Бет-Эльден шаркъта яткъан байырларгъа тараф узакъ ёлгъа чыкъты ве анда озь чадырларыны ойле къойды ки, Бет-Эль ондан гъарпта, Ай шеэри исе шаркъта олдылар. Анда Ибрам къурбан чалынгъан ерни къурып, РАББИге дуа этти.

⁹Сонъра Ибрам тургъан еринден кочип, дженюп тарафындаки Негев деген ерге узакъ ёлуны девам эттирди.

¹⁰О заманда мемлекетте ачлыкъ эди. Мемлекетте ачлыкъ агъыр олгъаны себебинден, Ибрам, яшамакъ ичюн, Мысыргъа [17] кетти.

¹¹Мысыргъа якъынлашкъанда исе, о, апайы Сарейге бойле деди: — Сен дюльбер апай олгъанынъны мен билем.

¹²Мысырлылар сени корип: «Бу онынъ апайыдыр», — дерлер, мени ольдюрирлер, сени исе сагъ къалдырырлар.

¹³Сен, манъа яхшы олсун ве сенинъ ярдымынънен джаным къуртулсын десенъ, оларгъа къыз къардашым олгъанынъны айт.

¹⁴Ибрам Мысыргъа кельген сонъ, мысырлылар Сарей пек дюльбер олгъаныны корьдилер.

¹⁵Фыравуннынъ башлыкълары да Сарейни корип, оны фыравунгъа макътадылар, ве Сарей фыравуннынъ сарайына алынгъан эди.

¹⁶Сарейнинъ маначыгъынен Ибрамнынъ ишлери яхшы юре эдилер: онынъ эм къой-эчкилери, эм туварлары, эм эшеклери, эм хызметчи къызлары ве къуллары, эм девелери бар эдилер.

¹⁷Амма РАББИ Ибрамнынъ апайы олгъан Сарей ичюн фыравуннынъ башына ве онынъ эвине мушкюль белялар йиберди.

¹⁸Фыравун Ибрамны чагъыртты ве онъа бойле деди: — Сенинъ меннен япкъанынъ недир? Не ичюн Сарей сенинъ апайынъ олгъаныны айтмадынъ манъа?

¹⁹Не ичюн сен: «О, меним къыз-къардашым ола», — дединъ? Бунынъ ичюн мен оны озюме апай этип алдым. Энди мына сенинъ апайынъ, ал оны да, кет.

²⁰Фыравун адамларына Ибрамнынъ акъкъында эмир берди, ве олар оны апайынен ве бутюн мал-мулькюнен берабер йибердилер.