Read Мукъаддес Китап къырымтатар тилинде, Башланув 14 Bible Online

Башланув 14 - Мукъаддес Китап къырымтатар тилинде, bible

Башланув 14

¹Шинар падишасы олгъан Амрафел, Элласар падишасы олгъан Арьёк, Элам падишасы олгъан Кедорлаомер ве Гоим падишасы олгъан Тидал падишалыкъ эткен заманларда

²дженк олды. Олар Содом падишасы олгъан Бера, Гомора падишасы олгъан Бирша, Адма падишасы олгъан Шинав, Цевоим падишасы олгъан Шемевер ве Беланынъ, я да Цоарнынъ, падишасына къаршы чыкътылар.

³Булар эписи, я да беш падиша, Сиддим вадийинде, я да Тузлу денъиз олгъан ерде, бирлештилер.

⁴Он эки йыл олар Кедорлаомерге бойсуна эдилер, он учюнджи йылына исьян котердилер.

⁵Он дёртюнджи йылы исе Кедорлаомер ве онен олгъан падишалар келип, рефалыларны — Аштерот-Карнаимде, зузлыларны — Хамда, эмлилерни — Шаве-Кирьятаимде,

⁶хорлуларны да Сеир деген дагълы топрагъында урдылар, ёлларыны исе сахранынъ четинде олгъан Эл-Парангъадже девам эттилер.

⁷Андан къайтып, олар Эн-Мишпат, я да Кадеш янына кельдилер ве амалеклилернинъ бутюн мемлекетини ве Хацецон-Тамарда яшагъан аморлыларны да урып йыкътылар.

⁸[8-9] Содом падишасы, Гомора падишасы, Адма падишасы, Цевоим падишасы ве Беланынъ, я да Цоарнынъ, падишасы оларнынъ къаршыларына чыкътылар ве Сиддим вадийинде Элам падишасы олгъан Кедорлаомернен, Гоим падишасы олгъан Тидалнен, Шинар падишасы олгъан Амрафелнен ве Элласар падишасы олгъан Арьёкнен дженк этип башладылар. Дёрт падиша беш падишагъа къаршы чыкътылар.

¹⁰Сиддим вадийинде исе зифт чукъурлары пек чокъ эди. Содом ве Гоморанынъ падишалары къачып башлагъанда, бу чукъурларгъа тюштилер, къалгъанлары исе дагъларгъа тараф къачып кеттилер.

¹¹[11-12] Гъалип чыкъкъанлар Содом ве Гоморанынъ бутюн мал-мулькюни ве бутюн ашайтларыны алып Содомда яшагъан, Ибрам къардашынынъ огълу олгъан Лутны да малы-мулькюнен алып кеттилер.

¹³Сагъ къалгъанлардан бири келип, Ибрам еудийни хабердар этти. Ибрам о заман Мамре адлы аморлынынъ эмен орманы янында яшай эди. Мамренинъ Эшкол ве Анер агъа-къардашлары бар эдилер. Олар Ибрамнынъ тарафдарлары эдилер.

¹⁴Ибрам, озюнинъ сою эсирге алынгъаныны эшитип, эвинде догъгъан 318 ишанчлы аскерини чагъырды ве душманларны Дангъадже къувалады.

¹⁵Болюшип, озю ве аскерлери оларгъа геджесинен уджюм этип, оларны урып йыкъты ве Дамаскнынъ шималь тарафында яткъан Ховагъадже къувалады.

¹⁶Ибрам бутюн мал-мульклерини басып алды, эм сою олгъан Лутны ве онынъ мал-мулькюни де, апайларыны ве башкъа адамларны биле басып алды.

¹⁷Кедорлаомерни ве онен берабер олгъан падишаларны енъгенинден сонъ къайткъанда, Шаве вадийинде, я да Падиша вадийинде, Ибрамнынъ къаршысына Содом падишасы чыкъты.

¹⁸Салимнинъ падишасы Мелкиседек де отьмекнен шарап алып чыкъты. О, Юдже Алланынъ руханийи эди.

¹⁹О, Ибрамны бойле сёзлернен багъышлады: — Кок ве ернинъ Яратыджысы олгъан Юдже Алла Ибрамны багъышласын!

²⁰Душманларынъны сенинъ къолунъа берген Юдже Аллагъа шукюрлер олсун! Сонъ Ибрам эписининъ он пайда бир пайыны Мелкиседекке берди.

²¹Содом падишасы Ибрамгъа: — Адамларны манъа къайтар, мал-мулькни исе озюнъе къалдыр, — деди.

²²Амма Ибрам Содом падишасына бойле деди: — РАББИге, Юдже Аллагъа, коклернинъ ве ернинъ Яратыджысына къолумны котерип,

²³ант этем: сен сонъундан: «Мен Ибрамны бай эттим», — айтма деп, сенинъ мал-мулькюнъден йип ве аякъкъап къайышы биле алмайджагъым.

²⁴Адамларым ашагъанындан гъайры ве меннен баргъан Анер, Эшкол ве Мамре адамларынынъ пайындан гъайры ич бир шей алмайджагъым. Олар озь пайларыны алсынлар.