Read Мукъаддес Китап къырымтатар тилинде, Башланув 15 Bible Online

Башланув 15 - Мукъаддес Китап къырымтатар тилинде, bible

Башланув 15

¹Сонъра Ибрамгъа руя олды. Ибрам РАББИнинъ: — Къоркъма, Ибрам. Мен — сенинъ къалкъанынъдырым, аркъа-къаянъдырым. Мукяфатынъ пек бол-берекетли оладжакътыр, — дегенини эшитти.

²Ибрам: — РАББИ-ТААЛЯм! Мен бала-чагъасыз ольсем, Сенинъ мукяфатларынъ манъа не керек? Олюмимден сонъ бутюн мал-мулькюмни аладжакъ Мешек (Дамаск дегени) огълу Элиезердир, — деди.

³— Бакъ, Сен манъа бала бермегенинъ ичюн, эвимде яшап тургъан огълан мирасчым оладжакътыр! — деп девам этти о.

⁴Ибрам да РАББИнинъ бойле сёзлерини эшитти: — О, сенинъ мирасынъны алмайджакъ. Ялынъыз сенден догъгъан бала сенинъ мирасчынъ оладжакътыр.

⁵РАББИ Ибрамны чадырдан чыкъарды ве онъа: — Кокке бакъып, йылдызларны сай: сайып оладжакъсынъмы? — деди. — Эвлятларынъ да бойле оладжакътыр!

⁶Ибрам РАББИге иман этти, ве РАББИ тарафындан бу онъа инсафлыкъ деп сайылды.

⁷РАББИ Ибрамгъа: — Мен — сен бу топракънынъ саиби ол деп, санъа оны бермек ичюн, сени касдийлилернинъ Ур шеэринден чыкъаргъан РАББИм, — деди.

⁸— РАББИ-ТААЛЯм! — деди Ибрам. — Мен бу топракънынъ саиби оладжагъымны къайдан билейим?

⁹РАББИ онъа: — Манъа учь яшлы тана, учь яшлы эчки, учь яшлы къочкъар, бир гогерджин ве бир яш къуш алып кель, — деди.

¹⁰Ибрам айванларны алып кельди, экиге болип кести ве бир къысымны экинджи къысымнынъ къаршысында къойды. Къушларны исе экиге больмеди.

¹¹Йыртыджы къушлар учып келип беденлерге эндилер, амма Ибрам оларны къувды.

¹²Кунь баткъанда, Ибрамны къатты юкъу сарды, ве оны дешетли буюк къаранлыкъ басты.

¹³РАББИ Ибрамгъа бойле деди: — Сенинъ эвлятларынъ гъурбетликте кельмешек оладжагъыны биль. Оларны къул этип, 400 йыл зулум этеджеклер.

¹⁴Амма оларны къул эткен миллетни Мен махкеме этеджегим. Бундан сонъ олар буюк мал-мулькнен андан кетеджек.

¹⁵Сен исе сагъ-селямет озь баба-деделеринъе къошулып, баягъы яшта олгъан къарт олып дефн этиледжексинъ.

¹⁶Ялынъыз дёртюнджи неслинъ мында къайтаджакъ, чюнки аморлыларнынъ яманлыгъы озь къарарына даа етмеди.

¹⁷Кунь батып къаранлыкъ тюшкен сонъ, иште, болюнген айванларнынъ арасындан тютеген атеш къазаны ве атеш алеви кечти.

¹⁸Бу куню РАББИ Ибрамгъа буны айтып, васиет этти: — Мысыр дерьясындан башлап, буюк дерья Фираткъадже бутюн бу ерни сенинъ эвлятларынъа бердим.

¹⁹Кенлилернинъ, кенизлилернинъ, кадмонлыларнынъ,

²⁰хитлилернинъ, перизлилернинъ, рефалыларнынъ,

²¹аморлыларнынъ, ханаанлыларнынъ, гиргашлыларнынъ ве евуслыларнынъ бутюн топракъларыны да эвлятларынъа бердим.