Read Мукъаддес Китап къырымтатар тилинде, Башланув 16 Bible Online

Башланув 16 - Мукъаддес Китап къырымтатар тилинде, bible

Башланув 16

¹Ибрамнынъ апайы Сарей онъа бала тапмай эди. Онынъ Хагар адлы мысырлы хызметчи къызы бар эди,

²ве Сарей Ибрамгъа: — Бакьса, РАББИ манъа бала тапмакъ къысмет этмей. Хызметчи къызымнен ят, бельки, мен ондан бала корерим, — деди. Ибрам Сарейни динъледи.

³Ибрамнынъ апайы Сарей озь хызметчи къызыны, мысырлы Хагарны акъайы Ибрамгъа апай этип берди. Ибрам о заман Ханаан топрагъында энди он йылдан берли яшай эди.

⁴Ибрам Хагарнен ятты, ве Хагар юкке къалды. Юкке къалгъаныны корип, Хагар саибесине олгъан сайгъысыны джойып башлады.

⁵Сонъ Сарей Ибрамгъа бойле деди: — Манъа япкъан акъсызлыгъында сен къабаатлысынъ. Мен сенинъ къолларынъа озь хызметчимни бердим, о, исе юкке къалгъан сонъ, манъа олгъан сайгъысыны джойды. Санъа ве манъа РАББИнинъ козю догъру олсун.

⁶— Мына, хызметчинъ сенинъ къолунъда, — деди Ибрам Сарейге. — Онен не истесенъ, оны яп. Сарей Хагарны ойле азарлап башлады ки, тап Хагар ондан къачып кетти.

⁷РАББИнинъ Мелеги оны сахрадаки сув чокърагъы янында тапты. Бу сув чокърагъы Шургъа кеткен ёлда ерлешкен эди.

⁸Мелек ондан: — Хагар, Сарейнинъ хызметчиси! Сен къайдан кельдинъ ве къайда кетесинъ? — деп сорады. — Мен саибем олгъан Сарейден къачам, — деди Хагар.

⁹РАББИнинъ Мелеги онъа: — Саибенъе къайт да, онынъ япкъанларына сабыр эт, — деди.

¹⁰РАББИнинъ Мелеги онъа даа бойле деди: — Сенинъ эвлятларынъны о къадар чокъ этерим ки, тап онынъ микъдарыны саймакънынъ чареси олмаз.

¹¹Даа РАББИнинъ Мелеги онъа бойле деди: — Мына, сен юклюсинъ. Сен огълан бала тападжакъсынъ ве онъа Исмаил [18] деген ад къояджакъсынъ, чюнки РАББИ сенинъ чеккен азабынъны корьди.

¹²О, кийик эшек дайын оладжакъ: о, эр кеске къаршы — эр кес де онъа къаршы оладжакътыр. О, агъаларынен душманлыкъта яшайджакъ.

¹³Онен лакъырды эткен РАББИге Хагар Эл-Рои [19] деген ад берди. О: «Керчектен де мен мында мени Корьгенни корьдим», — деди.

¹⁴Онынъ ичюн бу чокъракъ Беэр-Лахай-Рои [20] деп адлана. О, Кадеш ве Беред арасында ерлешкендир.

¹⁵Хагар Ибрамгъа огълан бала тапты, ве Ибрам онъа, Хагардан олгъан огълуна, Исмаил деген ад берди.

¹⁶Хагар Ибрамгъа Исмаилни тапкъанда, Ибрам 86 яшында эди.