Read Мукъаддес Китап къырымтатар тилинде, Башланув 17 Bible Online

Башланув 17 - Мукъаддес Китап къырымтатар тилинде, bible

Башланув 17

¹Ибрам 99 яшында олгъанда, онъа РАББИ келип: — Мен — Къудретли Алладырым. Козюм огюнде ачыкъ яшап, къусурсыз ол.

²О вакъыт Мен васиетимни беджеририм ве эвлятларынъны чокълаштырырым, — деди.

³Ибрам седждеге къапанды. Алла исе девам этти:

⁴— Меним санъа васиетим будыр: сен чокъ халкъларнынъ бабасы-дедеси оладжакъсынъ.

⁵Адынъ да энди «Ибрам» дегиль де, «Ибраим» оладжакъ. Чюнки Мен сени сайысыз халкъларнынъ бабасы-дедеси этеджегим.

⁶Сенинъ бала-чагъанъны чокъ сайылы этерим. Сенден халкълар асыл олурлар. Ве сенден падишалар да асыл оладжакълар!

⁷Мен санъа ве эвлятларынъа берген васиетимни эбедиен сакълайджагъым. Меним эбедий васиетим будыр: «Мен сенинъ Алланъ ве эвлятларынънынъ Алласы оладжагъым.

⁸Санъа ве эвлятларынъа шимди сен кочип юрген бу ерни — бутюн Ханаан топрагъыны эбедиен къулланмагъа береджегим. Мен оларнынъ Алласы оладжагъым».

⁹Алла Ибраимге бойле деди: — Сен исе Меним васиетимни тут, эм сен, эм сенден сонъ несильден несильге олгъан эвлятларынъ.

¹⁰Сиз, Меним сизге ве сизден сонъ олгъан эвлятларгъа бу васиетимни тутмагъа борджлусынъыз: эписи акъайлар сизде сюннет этильсин.

¹¹Тери парчанъызны кесип сюннет этинъиз, ве бу Меним сизге васиетимнинъ бельгиси оладжакътыр.

¹²Сизде несильден несильге эр бир секиз куньлюк огъланчыкъ сюннет этильсин: эм эвинъде догъгъан сою, эм сенинъ эвлятларынъ олмагъан, амма насылдыр ябанджыдан кумюшке сатын алынгъан сою.

¹³Экиси де: эм эвинъде догъгъан, эм сенинъ кумюшинъе сатын алынгъан огълан мытлакъа сюннет этильсинлер. Бойле этип, беденинъизде олгъан Меним васиетим эбедий васиет оладжакътыр.

¹⁴Сюннет этильмеген эр киши исе, я да тери парчасыны кесип сюннет этмеген адамнынъ джаны озь халкъындан айырылсын, чюнки о, Меним васиетимни бозды.

¹⁵Алла Ибраимге бойле деди: — Сарейге, сенинъ апайынъа «Сарей» деп айтма, онъа «Сарех» деген ад бериледжек.

¹⁶Мен оны багъышларым, ве санъа ондан огълан бала биле берерим. Сарени багъышларым, ве ондан миллетлер ве халкъ падишалары асыл олурлар.

¹⁷Ибраим бет устюне йыкъылды ве кулип, ичинден озю-озюне: «Юз яшлы къарттан огълан бала олурмы, аджеба? Эм де 90 яшына кельген Саре догъармы, аджеба?» — деди.

¹⁸Ибраим Аллагъа: — Ич олмагъанда, Исмаил Сенинъ огюнъде яшасын! — деди.

¹⁹Алла исе Ибраимге бойле деди: — Саре, сенинъ апайынъ, санъа огълан бала догъаджакъ, ве сен онынъ адыны Исхакъ деп къояджакъсынъ. Меним онъа эткен васиетим, сенден олгъан эвлятларгъа эбедий васиет оладжакъ.

²⁰Исмаил акъкъындаки риджанъны да эшиттим. Мен оны мытлакъа багъышларым, онъа чокъ бала берерим ве онынъ эвлятларыны пек чокъ сайылы этерим. Ондан он эки башлыкъ догъаджакъ, ве Мен ондан улу халкъ асыл этерим.

²¹Лякин Меним васиетимни Исхакъкъа этеджегим. Келеджек йылы тамам бу вакъытта Саре оны санъа догъаджакъ.

²²Сонъ Ибраимнен лакъырды этмекни токътатып, Алла ондан кетти.

²³Ибраим огълу Исмаилни, эписи эвинде догъгъан ве эписи онынъ кумюшине сатын алынгъан адамларны, озь эвиндеки бутюн кишилерни алды ве, Алла айткъаны дайын, тамам о куню тери парчасыны кесип оларны сюннет эттирди.

²⁴Ибраим сюннет этильгенде, о, 99 яшында эди.

²⁵Огълу Исмаил исе сюннет этильгенде, он учь яшында эди.

²⁶Ибраим ве онынъ огълу Исмаил бир куньде сюннет этильген эдилер,

²⁷ве оларнен берабер эвиндеки эписи акъайлар: эм эвинде догъгъанлары, эм ябанджылардан кумюшке сатын алынгъанлары сюннет этильген эдилер.