Read Мукъаддес Китап къырымтатар тилинде, Башланув 18 Bible Online

Башланув 18 - Мукъаддес Китап къырымтатар тилинде, bible

Башланув 18

¹Уйле сыджагъында, Ибраим чадырнынъ къапусы огюнде, Мамре деген эмен орманы янында отургъанда, РАББИ онъа пейда олды.

²Ибраим бакъып, огюнде учь ёлджу тургъанларыны корьди. О, оларнынъ къаршыларына атылып турып, седждеге къапанды ве:

³— Эфендим, эгер мен урьметинъе малик олгъан олсам, огюмден кечме.

⁴Сизге аякъ ювмагъа сув кетирирлер. Терек тюбюне отурып раатланынъыз.

⁵Мен исе Сизге къапынмакъ ичюн отьмек кетиририм. Сонъ кетерсинъиз, эписи бир огюмден, къулунъызнынъ огюнден кечесинъиз, — деди. — Яхшы, — дедилер олар, — ойле де яп.

⁶Ибраим чадыргъа чапып кирди ве Сареге: — Тез-тез учь ольчю [21] энъ яхшы ундан ал да, хамыр басып, пите пишир, — деди.

⁷Сонъ Ибраим сюрю тарафкъа чапып кетти, яш, яхшы бакъылгъан бузавчыкъны алып, къулуна берди. Къулу исе оны тез-тез азырламагъа ашыкъты.

⁸Ибраим мусафирлернинъ оглерине озю къаймакъ, сют, пишкен бузав этини къойды да, терек тюбюнде турып, оларнынъ ашагъанларыны бекледи.

⁹Олар Ибраимден: — Къадынынъ Саре къайдадыр? — деп сорадылар. — Мында, чадырда, — деп джевап къайтарды Ибраим.

¹⁰Олардан бири деди ки: — Келеджек йылы тамам бу вакъыт Мен кене санъа келирим. О вакъыт Сареде энди огълан бала догъаджакъ. Саре исе онынъ аркъасында, чадырнынъ къапусы артында, динълеп тура эди.

¹¹Олар экиси де: эм Саре, эм Ибраим энди баягъы яшта къарт адамлар эдилер, ве адетиндже къадынларда олгъан шей Сареде токъталгъан эди.

¹²Саре ичинден кулип: — Манъамы, къартайгъанымда, бу къуванчкъа саип олмакъ? Эфендим де энди къарт, — деп тюшюнди.

¹³РАББИ Ибраимге: — Саренинъ: «Манъа, къарт къадынгъа, бала тапмакъмы?» — деп кульгени недир?

¹⁴РАББИ ичюн къыйын ве япып оламайджакъ шей бармы? Келеджек йылы, кесильген куню санъа Мен келирим, ве о заман Сареде энди огълан бала олур, — деди.

¹⁵— Мен кульмедим, — деп ялан айтты къоркъкъан Саре. — Ёкъ, — деди онъа РАББИ, — сен кульдинъ.

¹⁶Акъайлар, ёлларыны девам этмек ичюн, ерлеринден турдылар ве Содомгъа тараф ёл алдылар. Ибраим исе, оларны озгъармакъ ичюн, оларнен кетти.

¹⁷«Япаджакъларымны Ибраимден гизлейджегимми?

¹⁸Ибраимден улу ве кучьлю халкъ асыл оладжакътыр, ве ер юзюндеки бутюн халкълар Ибраим вастасынен багъышланаджакълар.

¹⁹Ибраим балаларына ве эписи несиллерине адалетли ве инсафлы яшайышны огретсин деп, РАББИнинъ ёлунда юрмеге эмир этсин деп, Мен оны сайлап алдым. Сонъ Мен онъа бутюн ваде эткенлеримни япарым», — деп тюшюнди РАББИ.

²⁰— Содом ве Гомора тарафларындаки къыямет кучьленди, — деди РАББИ. — Гуналары да пек агъырдыр.

²¹Тюшейим де, олар манъа келип еткен къыямет дайын, тамам ойле япалармы-ёкъмы, бакъайым. Сонъ билирим.

²²Акъайлар айланып, Содом тарафкъа кеттилер. Ибраим исе, эп РАББИнинъ алдында тура эди.

²³Онъа якъынджа келип, Ибраим: — Сен ярамай адамларнен берабер инсафлы адамларны да ёкъ этерсинъми?

²⁴Бельки бу шеэрде 50 инсафлы адам тапылыр. Аджеба Сен бу шеэрни андаки 50 инсафлы адамларнынъ хатири ичюн афу этмейип, къырарсынъмы?

²⁵Олмайджакъ шей! Сен ойле япмазсынъ! Сен ярамай адамларнен берабер инсафлы адамларны ёкъ этмезсинъ. Эм ярамай, эм инсафлы адамнынъ такъдири бир олмаз. Сенден оладжакъ шей дегиль! Бутюн ер юзюнинъ Къадысы адалетсизлик япармы? — деди.

²⁶РАББИ: — Эгер Мен Содом шеэринде элли инсафлы адам тапсам, оларнынъ хатири ичюн бутюн шеэрни афу этерим, — деди.

²⁷— Мен тоз ве куль олсам да, — деп девам этти Ибраим, — Эфендимден сорамагъа джесюрлик таптым.

²⁸Эгер эллиге беш инсафлы адам етмесе, аджеба бу етишмеген беши ичюн Сен бутюн шеэрни къырарсынъмы? — Ёкъ, эгер Мен анда къыркъ беш инсафлы адам тапсам, къырмам, — джевап къайтарды РАББИ.

²⁹— Эгер анда тек къыркъ инсафлы адам тапылса? — сёзюни девам этип сорады Ибраим. — Къыркънынъ хатири ичюн де япмам, — деди РАББИ.

³⁰— Эфендим, айткъанларыма гъазапланма. Я тек отуз инсафлы адам олса? — деди Ибраим. — Эгер анда отуз инсафлы адам олса биле, буны япмам, — деди РАББИ.

³¹— Сенден, Эфендим, сорамагъа джесюрлик таптым. Эгер анда тек йигирми инсафлы адам олса? — деди Ибраим. — Йигирмининъ хатири ичюн де къырмам, — деп джевап къайтарды РАББИ.

³²— Эфендим, гъазапланма! Меним даа бир суалим бар. Эгер анда тек он инсафлы адам тапылса? — деп сорады Ибраим. — Оннынъ хатири ичюн де къырмам, — деп джевап къайтарды РАББИ.

³³Ибраимнен лафыны битирген сонъ, РАББИ кетти. Ибраим исе озюнинъ ерине къайтты.