Read Мукъаддес Китап къырымтатар тилинде, Башланув 2 Bible Online

Башланув 2 - Мукъаддес Китап къырымтатар тилинде, bible

Башланув 2

¹Бойле этип, коклер ве ер, ве яратмаларнынъ бутюн сафы ясалып биткен эдилер.

²Единджи кунюне Алла Озюнинъ япкъан ишлерини битирген эди. Единджи куню де О, Озюнинъ япкъан эписи ишлеринден раатланды.

³Алла единджи кунни багъышлады ве оны айырды, чюнки бу куню О, Озю яраткъан ве япкъан эписи ишлеринден раатланды.

⁴Мына, кокнинъ ве ернинъ яратылгъан вакътында оларнынъ несили. РАББИ ер юзю ве кокни яраткъанда,

⁵ер юзюнде не бир тарла чалысы, не бир тарла оту бар эди. Чюнки РАББИ ер юзюне даа ягъмур ягъдырмагъан эди, ве топракъны бакъмакъ ве ишлемек ичюн адамлар ёкъ эди.

⁶Ялынъыз ер ичинден чыкъкъан дерья ер юзюни сувгъа тойдура эди.

⁷РАББИ топракъ тозундан адамны яратып, бурнунынъ тешиклерине яшайыш нефесини уфюрип киргизди, ве адам тири джан олды.

⁸РАББИ шаркъта олгъан Эдемде багъча осьтюрип, анда Озю яраткъан адамны ерлештирди.

⁹Багъчада РАББИ чешит тюрлю козьге гузель ве ашкъа ляйыкъ махсуллары олгъан тереклерни осьтюрди. Даа багъчада омюр терегини ве яхшылыкънен яманлыкъны айырып таныткъан терегини сачты.

¹⁰Эдемден дерья акъып чыкъа ве багъчаны сувгъа тойдура эди. Бу дерья дёрт озенге болюне эди.

¹¹Олардан бири Пишон деп адлана эди. О, алтыны олгъан Хавила мемлекетининъ четинден айланып акъа эди.

¹²О мемлекеттеки алтын яхшыдыр. Анда даа бедолах [1] ве шохам деген къыйметли таш бардыр.

¹³Экинджи озен Гихон деп адлана эди. О, Куш мемлекети бою акъа эди.

¹⁴Учюнджи озеннинъ ады — Хиддекель. О, Ашшурнынъ шаркъ тарафына акъмакътадыр. Дёртюнджи озен — Фираттыр [2].

¹⁵Эдем багъчасынынъ топрагъыны бакъып-ишлеп, сакълап-къорчаламакъ ичюн, РАББИ адамны алып, Эдем багъчасына ерлештирди.

¹⁶РАББИ адамгъа: — Багъчада олгъан эр бир терегининъ махсулындан санъа алып ашамакъ мумкюн.

¹⁷Лякин яхшылыкънен яманлыкъны айырып таныткъан терегинден ашамакъны Мен санъа ясакъ этем. Чюнки шу теректен махсул ашагъан куню оледжексинъ, — деп эмир этти.

¹⁸РАББИ Озь-Озюне: — Адамгъа янъгъызлыкъ ярашмаз. Мен онъа келишкен бир ярдымджы яратайым, — деди.

¹⁹РАББИ чешит тюрлю айванларны ве къушларны топракътан яратып, адам оларгъа насыл адлар къояджагъыны бакъмакъ ичюн, онынъ алдына кетирди. Адам айванларгъа насыл ад берген олса, оларнынъ ады ойле де къалды.

²⁰Бутюн эв айванларына, бутюн кок къушларына, бутюн кийик айванларгъа адам ад къойды, амма оларнынъ арасындан озюне келишкен ярдымджы тапалмады.

²¹О вакъыт РАББИ адамны къатты юкъугъа далдырып, къабургъаларынынъ бирини алды ве о ерни вуджутнен къапатты.

²²Шу къабургъадан РАББИ къадынны яратты ве адам алдына кетирди.

²³Адам: — Бу, меним кемигимден къопкъан кемиктир, джан-джигеримден къопкъан парчамдыр, ве акъайдан алынгъаны ичюн, апай [3] деп адланаджакъ о, — деди.

²⁴Шу себептен акъай, ана-бабасыны къалдырып, апайына япыша, ве олар бир вуджут олалар.

²⁵Олар экиси: эм Адем, эм онынъ апайы чыплакъ олып да, утанмай эдилер.