Read Мукъаддес Китап къырымтатар тилинде, Башланув 20 Bible Online

Башланув 20 - Мукъаддес Китап къырымтатар тилинде, bible

Башланув 20

¹Ибраим андан чыкъып, Негев деген ерге ёл алды ве Кадешнен Шур арасында яшап башлады. Сонъ вакътынджа Герар шеэринде ерлешти.

²Озюнинъ апайы олгъан Саре акъкъында Ибраим: «О, меним къыз-къардашым», — деди. Сонъ Герарнынъ падишасы олгъан Авимелек адамларны ёллап, Сарени озюне алды.

³Амма геджеси Алла Авимелекке тюшюнде келип, онъа: — Динъле, сен алгъан о апай ичюн оледжексинъ, чюнки онынъ акъайы бар, — деди.

⁴Авимелек исе онъа даа токъунмагъан эди ве: — Эфендим, аджеба, Сен къабаатсыз миллетни ольдюрирсинъ? — деди. —

⁵Бу адам озю манъа: «О, меним къыз-къардашым», — деп айтмадымы? Апай да: «О, меним агъамдыр», — деди. Мен буны темиз юрекнен ве къабаатсыз эльнен яптым.

⁶Алла онынъ тюшюнде онъа бойле деди: — Сен буны темиз юрекнен япкъанынъны Мен билем. Онынъ ичюн, Меним огюмде гуна япма деп, санъа о апайгъа токъунмагъа бермедим.

⁷Шимди исе апайны акъайына къайтар, чюнки о пейгъамбер. О, сенинъ ичюн дуа этер, ве сен сагъ-селямет къалырсынъ. Къайтармасанъ эгер, биль ки, сен мытлакъа оледжексинъ. Сен ве бутюн сенинъ эвинъдекилеринъ да оледжеклер.

⁸Саба танъда турып, Авимелек озь хызметчилерини чагъыртты ве оларгъа бутюн бу шейни айтып берди. Олар пек къоркътылар.

⁹Сонъ Авимелек Ибраимни озюне чагъыртып, онъа бойле деди: — Недир бу сенинъ бизнен япкъанынъ? Санъа къаршы мен насыл гуна яптым ки, сен мени ве падишалыгъымны бу буюк гунагъа батырдынъ? Сен манъа олмайджакъ шейлер яптынъ.

¹⁰Сонъ даа къошты Авимелек Ибраимге: — Бу ишни япкъанда, акъылынъда не тута эдинъ?

¹¹— Белледим ки, керчектен де бу ерде Алладан къоркъмайлар ве апайым ичюн мени ольдюрирлер, — деди Ибраим.

¹²— Ондан гъайры о, керчектен де меним къыз-къардашым: анамнынъ къызы олмайып, о, бабамнынъ къызыдыр. О меним апайым олды.

¹³Алла манъа бабамнынъ эвинден кетмеге буюргъанда, мен Сареге айттым: «Ялварам санъа, манъа бир эйилик яп: къайда кельмесек де, мен сенинъ агъанъ олгъанымны айт».

¹⁴Авимелек къой-эчкилер, туварлар, хызметчи къызлар ве къуллар алып, Ибраимге берди, апайы Сарени де къайтарды.

¹⁵Сонъ Авимелек деди ки: — Бакъ, бутюн ерим сенинъ огюнъде: къайда истесенъ, анда яша.

¹⁶Сареге исе бойле деди: — Мен агъанъа 1000 кумюш бердим. Бу, санъа якъын адамларнынъ козюнде ашалангъанынънынъ устюни къаплар, ве эр кеснинъ огюнде сен темиз олурсынъ.

¹⁷Ибраим Аллагъа дуа этти, ве Алла Авимелекни, онынъ апайыны ве хызметчи апайларыны тедавийледи. Олар кене бала тапып башладылар.

¹⁸Эвель исе РАББИ Ибраимнинъ апайы олгъан Саре ичюн, Авимелекнинъ эвинде олгъан эписи апайларгъа бала догъмагъа къысмет этмей эди.